ខេត្តកំពង់ឆ្នាំង ផ្ទះក្បឿងពីរខ្នងធ្វើអំពីឈើខាងលើ ថ្មខាងក្រោម ត្រូវបានអគ្គីភ័យឆាបឆេះ ខណៈម្ចាស់ផ្ទះទាំង២នាក់ប្តីប្រពន្ឋមិននៅផ្ទះ ។ ហេតុការណ៍នេះបានបង្កឱ្យមានការភ្ញាក់ផ្អើលកាលពីវេលាម៉ោង៥និង៣០នាទីរសៀលថ្ងៃទី១៩ ខែកុម្ភៈ ឆ្នាំ២០១៩ នៅក្នុងភូមិត្រពាំងខ្ទុំ ឃុំឈូកស ស្រុកកំពង់ត្រឡាច ។
លោក នន ស៊ីណាត អធិការនគរបាលស្រុកកំពង់ត្រឡាច បានអោយដឹងថា ផ្ទះដែលត្រូវបានអគ្គីភ័យឆេះខាងលើជាកម្មសិទ្ធិរបស់ឈ្មោះ ឯល ហូសាន់ ភេទប្រុស អាយុ២៥ឆ្នាំ ជាខ្មែរអ៊ិស្លាម ត្រូវជាប្តី ហើយនៅពេលកើតហេតុគាត់មិនបាននៅផ្ទះនោះទេ គឺចេញទៅនេសាទត្រី ។ ចំណែកប្រពន្ធឈ្មោះ ទាំ ហ្វាស់អុីសាស ក៏មិនបាននៅផ្ទះដែរ គឺនៅរាជធានីភ្នំពេញ ។
លោកអធិការបានស្រង់សំដីបុរសឈ្មោះយ៉ា ទាំ ដែលត្រូវជាឪពុកគ្រួសាររងគ្រោះខាងលើបានឲ្យដឹងថា នៅសុខៗ ស្រាប់តែឃើញអណ្តាតភ្លើងឆាបឆេះយ៉ាងសន្ឋោសន្ឋៅទៅហើយ ពេលនោះគាត់បានស្រែក អោយគេជួយ ហើយគាត់មិនដឹងថាភ្លើងបានឆេះផ្ទះបណ្តាលមកពីអ្វីនោះទេ តែគាត់សង្ស័យថាមូលហេតុមកពីទុស្សេចរន្តអគ្គីសនី ព្រោះពេលកើតហេតុមិនមានអ្នកនៅផ្ទះនោះទេ ។
ក្នុងហេតុការណ៍ខាងលើបណ្តាលឱ្យរងការខូចខាតគឺឆេះអស់ផ្ទះឈើខាងលើមានទំហំ៨ម៉ែត្រ គុណនឹង៦ម៉ែត្រ ប្រក់ក្បឿងជញ្ជាំងក្តារ ត្រូវអណ្តាតភ្លើងឆេះខ្ទេចទាំងស្រុង នៅសល់តែថ្មខាងក្រោម ។ រីឯទ្រព្យសម្បត្តិខូចខាត គឺមិនទាន់ដឹងច្បាស់នៅឡើយទេ ព្រោះម្ចាស់មិននៅ។
ក្នុងករណីខាងលើនេះដែរ សមត្ថកិច្ច បានប្រើប្រាស់រថយន្តពន្លត់អគ្គិភ័យអស់ចំនួន២គ្រឿងមកធ្វើការបាញ់ទឹកពន្លត់ ទើបភ្លើងរលត់ទាំងស្រុង មិនឆេះឆ្លងរាលដាលទៅផ្ទះអ្នកដទៃ ៕
ចែករំលែកព័តមាននេះ