ខេត្តសៀមរាប ៖ កូនប្រសារប្រុសខឹងឪពុកក្មេកស្តីបន្ទោសឱ្យដោយសារឪពុកឃើញឈ្លោះទាស់ទែងគ្នាជាមួយប្រពន្ធ(កូនបង្កើត) ខណៈពេលនោះឪពុកខឹងដែលយកកូនស្រីរបស់គាត់ចាប់ដាក់ឃុំក្នុងផ្ទះ ក៏ស្តីបន្ទោសឱ្យបន្តិចបន្តួច ស្រាប់តែជនសង្ស័យ(ជាកូនប្រសារ)ខឹងដើរចូលទៅក្នុងផ្ទះទាញយកកាំបិតខ្វែវកាប់ទៅលើឪពុកក្មេក គ្មានត្រាប្រណីដៃបណ្តាលឱ្យដួលស្លាប់ភ្លាមៗនៅហ្នឹងកន្លែង រួចគេចខ្លួនបាត់ដោយសុវត្ថិភាព បង្កឱ្យមានការភ្ញាក់ផ្អើលពេញភូមិ រហូតដឹងដល់សមត្ថកិច្ចនគរបាលស្រុកអង្គរជុំ ភ្លាមៗផងដែរ ។
ហេតុការកូនប្រសារកាប់ឪពុកក្មេកស្លាប់នោះបានកើតឡើងនៅវេលាម៉ោង៧និង០០នាទីយប់ ថ្ងៃទី១៩ ខែកុម្ភៈ ឆ្នាំ២០១៩ ស្ថិតនៅមុខផ្ទះជនរងគ្រោះក្នុងភូមិគោកត្របែក ឃុំគោកដូង ស្រុកអង្គរជុំ ខេត្ត សៀមរាប មានករណីឃាតកម្មដោយចេតនាកើតឡើងលើជនរងគ្រោះឈ្មោះ ផន ប្រេម ភេទប្រុសអាយុ៨៥ឆ្នាំ រស់នៅភូមិគោកត្របែក ឃុំគោកដូង ស្រុកអង្គរជុំ ខេត្តសៀមរាប ។
លោកវរសេនីយ៏ឯក ម៉ាន់ សុខាត់ អធិការនគរបាលស្រុកអង្គរជុំបានឱ្យដឹងថា ករណីឃាតកម្មដោយចេតនារវាងកូនប្រសារប្រុស និងឪពុកក្មេកនោះបានបង្កឡើងដោយកូនប្រសារប្រុសឈ្មោះ សាន ចិក អាយុ៦៥ឆ្នាំ មានស្រុកកំណើតនៅភូមិខ្ជាយ ឃុំសរសរស្ដម្ភ ស្រុកពួក ខេត្តសៀមរាប បច្ចុប្បន្ននៅភូមិ គោកត្របែក ឃុំគោកដូង ស្រុកអង្គរជុំ ខេត្តសៀមរាប ។
លោកបានបន្តទៀតថា មូលហេតុដែលបណ្តាឱ្យកើតករណីឃាតកម្មនេះឡើងគឺនៅថ្ងៃទី១៩ ខែកុម្ភៈ ឆ្នាំ២០១៩ វេលាម៉ោង៦និង៤០នាទីល្ងាច ជនសង្ស័យឈ្មោះ សាន ចិក បានទាស់សម្តីគ្នាជាមួយប្រពន្ធ ឈ្មោះ សែន អាក់ អាយុ៣៨ឆ្នាំ នៅភូមិកើតហេតុខាងលើ ដោយសារការប្រចណ្ឌជាមួយប្រពន្ធរបស់ខ្លួនក៏បានឈ្លោះប្រកែកគ្នាមួយសន្ទុះ ហើយក៏ចាប់ប្រពន្ធដាក់ក្នុងផ្ទះបិទទ្វារជិត ។
ខណៈពេលនោះប្រពន្ធជនសង្ស័យក៏បានលោតចុះពីលើផ្ទះមកដីវិញ តាមទ្វារស្រាប់តែឪពុកបង្កើត ឃើញក៏បានស្ដីបន្ទោសឱ្យជនសង្ស័យ(កូនប្រសារប្រុស) ពេលនោះ ជនសង្ស័យខឹងនឹងឪពុកក្មេកស្តីឱ្យក៏បានចូលទៅក្នុងផ្ទះទាញកាំបិតខ្វែវមកកាប់លើជនរងគ្រោះដែលជាឪពុកក្មេកចំនួន៣ខ្វែវបណ្ដាលឱ្យឪពុកក្មេកដួលស្លាប់នៅហ្នឹងកន្លែងភ្លាមៗមុខផ្ទះរបស់ជនរងគ្រោះតែម្តង ។
ក្រោយពេលកាប់ហើយជនសង្ស័យឃើញឪពុកក្មេកស្លាប់ក៏បានរត់គេចខ្លួនយកប្រាស់អាយុទៅទិសខាងត្បូងឈៀងខាងកើតបាត់ទៅតែម្តង ហើយបច្ចុប្បន្នកម្លាំងសមត្ថកិច្ចនគរបាលស្រុកអង្គរជុំកំពុងស្រាវជ្រាវស៊ើបអង្កេតបន្តតាមនីតិវិធីដើម្បីនាំខ្លួនជនសង្ស័យ មកកាត់ទោសទៅតាមផ្លូវច្បាប់ឱ្យទាល់តែបាន ៕
ចែករំលែកព័តមាននេះ