តើអ្នកចង់បង្កើនប្រសិទិ្ធភាពការងាររបស់អ្នកដែរឬទេ? តើអ្នកធ្លាប់គិតថា អ្នកចំណាយពេលមួយថ្ងៃដោយមិនបានសម្រេចកិច្ចការច្រើនដែរទេ? បើសិនជាចង់ និងធ្លាប់ អ្នកគួរតែធ្វើតាមវិធីងាយៗខាងក្រោមដើម្បីគ្រប់គ្រងពេលវេលាបានល្អប្រសើរជាងមុន ។
១. ត្រូវដឹងថាអ្នកចំណាយពេលវេលាច្រើនលើអ្វី
មនុស្សម្នាក់ៗងាយនឹងធ្លាក់ចូលក្នុងអន្ទាក់នៃកម្មភាពដែលធ្វើឲ្យយើងចំណាយពេលច្រើនដូច្នេះអ្នកគួរដឹងថាអ្នកចំណាយពេលមិនមានប្រយោជន៍លើអ្វីខ្លះ? តើអ្នកចំណាយពេលវេលាភាគច្រើនលើអ៊ីនធើណែត អានអ៊ីមែល លើហ្វេសប៊ុក ផ្ញើសារ ឬខលតាមទូរស័ព្ទជាដើម?
តើអ្នកកំពុងខ្ជះខ្ជាយពេលវេលាឬទេ? អ្នកគួរតែតាមដានសកម្មភាពប្រចាំថ្ងៃរបស់អ្នកដើម្បីដឹងថាតើអ្នកចំណាយពេលវេលាដែលមានលើសកម្មភាពអ្វីខ្លះ ។
២. ដាក់គោលដៅសម្រាប់ការគ្រប់គ្រងពេលវេលាច្បាស់លាស់
ត្រូវចងចាំថា អ្វីដែលសំខាន់ក្នុងការគ្រប់គ្រងពេលវេលាគឺការផ្លាស់ប្តូរទម្លាប់របស់អ្នក មិនមែនផ្លាស់ប្តូរពេលវេលាទេ ។ អ្នកអាចចាប់ផ្តើមដោយលុបបំបាត់សកម្មភាពដែលអ្នកចំណាយពេលលើ ។ ឧទាហរណ៍ដូចជាដាក់គោលដៅថាមួយសប្តាហ៍អ្នកនឹងនិយាយទូរស័ព្ទសម្រាប់រឿងផ្ទាល់ខ្លួនតែក្នុងម៉ោងក្រៅធ្វើការប៉ុណ្ណោះជាដើម ។
៣. រៀនមើលសារៈសំខាន់នៃការងារនីមួយ
អ្នកគួរតែចាប់ផ្តើមថ្ងៃនីមួយៗដោយមើលថាកិច្ចការមួយណាមានសារៈសំខាន់ជាងគេដែលអ្នកត្រូវតែបំពេញ។ ប្រសិនបើអ្នកមានកិច្ចការសរុប ២០កិច្ចការក្នុងមួយថ្ងៃ តើមានប៉ុន្មានដែលអ្នកចាំបាច់ត្រូវតែសម្រេចវាជាដាច់ខាត?
៤. រៀនផ្ទេរការងារ
ការផ្ទេកការងារអាចជារឿងដែលពិបាកធ្វើជាងគេសម្រាប់ម្ចាស់អាជីវកម្មជាច្រើន ប៉ុន្តែមិនថាអាជីវកម្មរបស់អ្នកតូចឬធំទេ អ្នកមិនគួរធ្វើជាមនុស្សម្នាក់ដែលត្រូវធ្វើកិច្ចការទាំងអស់ដែលមានឡើយ ។ អ្នកគួរតែរៀនផ្ទេកកិច្ចការមួយចំនួនទៅមនុស្សដទៃដើម្បីអ្នកអាចប្រើពេលវេលាដែលអ្នកមានឲ្យមានប្រសិទ្ធិភាព ។
៥. ដាក់កម្រិតពេលវេលាចំណាយលើកិច្ចការ
ការអាននិងឆ្លើយតបអ៊ីមែលអាចខ្ជះខ្ជាយពេលមួយថ្ងៃរបស់អ្នកប្រសិនបើអ្នកអនុញ្ញាត ។ ដូច្នេះអ្នកគួរតែដាក់កម្រិតពេលវេលាដែលអ្នកគួរតែចំណាយលើកិច្ចការណាមួយឲ្យបានច្បាស់លាស់ ។
៦. កុំចំណាយពេលវេលារងចាំ
មិនថាអ្នកកំពុងរងចាំជួបអតិថិជន ឬជួបគ្រូពេទ្យទេ អ្នកមិនអាចជៀសវាងការរងចាំអ្វីមួយ ឬនរណាម្នាក់ឡើយ ។ ប៉ុន្តែប្រសិនបើអ្នកគ្រាន់តែអង្គុយចាំនិងមិនធ្វើអ្វីសោះ អ្នកនឹងចំណាយពេលវេលារបស់អ្នកដោយខ្ជះខ្ជាយ ។
បច្ចេកវិទ្យាធ្វើឲ្យអ្នកអាចធ្វើការមិនថាអ្នកនៅទីណាឡើយ ដូចជាថាប្លេតឬស្មាតហ្វូនរបស់អ្នកជាដើម ។ អ្នកអាចអង្គុយអានរបាយការណ៍ ត្រួតពិនិត្យឯកសារ ឬរៀបចំផែនការផ្សព្វផ្សាយបន្ទាប់របស់អ្នកជាដើមក្នុងកំឡុងពេលរងចាំនោះ ៕
ចែករំលែកព័តមាននេះ