ខេត្តកែប ៖ អាជ្ញាធរខេត្តធ្លាប់បានទៅពិនិត្យដីសហគមន៍ម្ដងរួចមកហើយ នៅជាប់នឹងឆ្នេរសមុទ្រអង្កោល ឃុំអង្កោល ស្រុកដំណាក់ចង្អើរ ។ ពេលដែលអាជ្ញាធរចុះទៅពិនិត្យដីព្រៃលិចទឹកជាដីសហគមន៍ នៅឆាំ្ន២០១៨នោះ ក៏បានដកបង្គោលបេតុងចំនួន២ដើមចេញពីឆ្នេរ ព្រោះជាបង្គោលរំលោភយកតំបន់ឆ្នេរ លុះមកដល់ឆាំ្ន២០១៩នេះ អ្នកដាំបង្គោលរំលោភយកឆ្នេរសមុទ្របានបោះបន្ថែមដដែលគឺបោះច្រើនលើសដើម និងខ្លះទៀតបានបោះបង្គោលជាជួររាប់សិបបង្គោលធ្វើជាព្រំដីរបស់ខ្លួន ទំនងគិតថាគ្មានអ្នកណាហ៊ានធើអីអញទេ ។ ហើយបុគ្គលថ្លើមធំខ្លះទៀតហ៊ានរហូតដល់សង់ផ្ទះផងដែរនៅលើឆ្នេរ ។
ពលរដ្ឋម្នាក់ដែលមានឈ្មោះនៅក្នុងដីសហគមន៍នេះបាននិយាយថា ដីសហគមន៍នេះចំនួន៧៥ហិកតា នៅជាប់ឆ្នេរសមុទ្រអង្កោលនេះបច្ចុប្បន្នកំពុងត្រូវបានគេយកធ្វើជាកម្មសិទ្ធិ មិនដឹងថាពួកគេទាំងនោះសំអាងទៅលើអ្វីនោះទេ ហើយគាត់សង្ឃឹមថា អាជ្ញាធរខេត្តមិនបណ្តែតបណ្តោយឱ្យមានការចាប់យកជាកម្មសិទ្ធិអនាធិបតេយ្យបែបនេះឡើយ ។ អ្នកតំណាងឱ្យសហគមន៍និយាយថា អ្នកខ្លាចនៅតែខ្លាចអ្នកហា៊ននៅតែហា៊ន ទៅចាប់យកហើយលក់បានលុយទៀតចែកគ្នាសម្ងំយកសុខរៀងខ្លួន ។
អ្នកតំណាងឱ្យសហគមន៍រូបនេះនិយាយទៀតថា បើអាជ្ញាធរស្រុក-ខេត្តមិនយកចិត្តទុកដាក់ហើយព្រងើយកន្តើយនោះ អាចនឹងបាត់បង់ដីសហគមន៍នេះមិនខាន ។ ពលរដ្ឋម្នាក់ទៀតបានសុំឱ្យអាជ្ញាធរដោះស្រាយរឿងដីសហគមន៍ឱ្យបានឆាប់ កុំឱ្យអ្នកមានលុយមកទិញដីពីពលរដ្ឋដែលយកដីសហគមន៍លក់តៗគ្នាតាមចិត្តទៅហើយ ។
ទាក់ទងតាមទូរស័ព្ធទៅលោក មីុ ជី មេឃុំអង្គោលកាលពីថ្ងៃទី១៨ កុម្ភៈ តែលោកមេឃុំប្រាប់ថាជាប់ប្រជុំមិនអាចឆ្លើយឬធ្វើសម្ភាសន៍បានទេ ។ ទាក់ទងតាមទូរស័ព្ទទៅលោក គុជ វីរៈ នាយខណ្ឌជលផលខេត្តកែបចំនួន២ដង កាលពីថ្ងៃទី១៨និងថ្ងៃទី១៩ កុម្ភៈ ទូរស័ទ្ទរោទិ៍ហើយគ្មានអ្នកលើក ។ ទោះជាបែបណា ដីសហគមន៍មួយនេះកំពុងតែកើតជម្លោះរវាងអ្នកទិញ និងអ្នកលក់ព្រោះដីមួយកន្លែងនេះអ្នកទិញមានម្ចាស់ដល់ទៅពីរផ្សេងគ្នា សង្ស័យខាងជលផលដឹងដែរហើយមើលទៅ ។
សូមបញ្ជាក់ថា ដីសហគមន៍នេះជាដីព្រៃលិចទឹកដែលអាជ្ញាធររក្សាទុកផ្តល់ឱ្យប្រជាពលរដ្ឋប្រើប្រាស់ក្នុងសហគមន៍របស់ខ្លួនសម្រាប់ការប្រកបរបរនេសាទ រកក្តាម រកគ្រំក្នុងតំបន់ព្រៃកោងកាងនេះពេលទឹកជោរទឹកនាច ។ ការចាប់យកដីសហគមន៍នេះកំពុងបង្ហាញថាមិនមែនពលរដ្ឋតូចតាចទេដែលហ៊ានថ្លើមធំបែបនេះ គឺមានតែអ្នកមានលុយឬមានអំណាចមានយក្សធ្វើខ្នងទើបហ៊ានឬក៏ជាមន្ត្រីគ្រាប់ល្ពៅ ៕
ចែករំលែកព័តមាននេះ