ខេត្តបន្ទាយមានជ័យ ៖ មន្ត្រីគយ និងរដ្ឋាករចល័តបានចុះប្រតិបត្តិការបិតមិនអោយឈ្មួញនាំធ្យូងចេញទៅអោយឈ្មួញថៃមានច្រកតំបន់បឹងត្រកួន និងរបៀងធ្នង់ដែលត្រូវបានបិតឈប់អោយនាំចេញ កាលពីថ្ងៃទី១៨ ខែកុម្ភៈ ឆ្នាំ២០១៩កន្លងទៅ ។
លោក វ៉ាន់ ដារ៉ាន់ ប្រធានគណៈកម្មការច្រកទ្វារតំបន់ព្រំដែនបឹងត្រកួនបានប្រាប់នៅ ល្ងាចថ្ងៃទី១៨ ខែកុម្ភៈ ឆ្នាំ២០១៩នេះថា មន្ត្រីគយ និងរដ្ឋាករចល័តសាខាខេត្តបន្ទាយមានជ័យបានចុះប្រតិបត្តិការបិតមិនអោយឈ្មួញនាំធ្យូងចេញទៅប្រទេសថៃដែលត្រូវបានបិតមានរយៈពេលជាង១សប្តាហ៍មកហើយ តែទុកពេលអោយឈ្មួញនាំចេញធ្យូងអោយអស់ធ្យូងចាស់ ហើយហាមមិនអោយទិញចូល និងនាំចេញទៀតឡើយ ។
លោកបានបញ្ជាក់ថា ក្រោយពេលដែលមន្ត្រីគយ និងរដ្ឋាករចល័តចុះហាមឃាត់មិនអោយឈ្មួញនាំធ្យូងចេញដែលទុកពេលអោយចេញអស់ ហើយនៅថ្ងៃទី១៨ ខែកុម្ភៈ ឆ្នាំ២០១៩នេះឃើញមានមន្ត្រីគយ និងរដ្ឋាករសាខាខេត្តបន្ទាយមានជ័យ និងស្នាក់ការគយ និងរដ្ឋាករច្រកតំបន់ព្រំដែនបឹងត្រកួនបានចុះទៅហាមឃាត់មិនអោយឈ្មួញនាំចេញធ្យូងនៅច្រករបៀងខុសច្បាប់ធ្នង់ដែលគ្រប់គ្រងដោយកម្លាំងយោធាតំបន់ប្រតិបត្តិការសឹករងខេត្ត និងកម្លាំងនគរបាលការពារគោក ។
លោក វ៉ាន់ ដារ៉ាន់ បានបញ្ជាក់ថា បញ្ហាធ្យូងរយៈពេលកន្លងមកឈ្មួញនាំចេញតាមច្រកតំបន់ព្រំដែនបឹងត្រកួនស្រុកថ្មពួកដោយគ្មានច្បាប់អោយនាំចេញនោះទេ នេះជាការយោគយល់ដោយធ្យូងឈ្មួញទិញពីអ្នកដឹកលក់ពីខាងខេត្តឧត្តរមានជ័យនាំយកមកលក់អោយឈ្មួញទិញនាំចេញទៅលក់អោយឈ្មួញថៃ តែក្រោយមកត្រូវបានមន្ត្រីគយ និងរដ្ឋាករចល័តសាខាខេត្តបន្ទាយមានជ័យបិតមិនអោយឈ្មួញនាំធ្យូងចេញលក់ថៃដែលត្រូវបានបិតទាំងស្រុងនៅថ្ងៃទី១៨ ខែកុម្ភៈ ឆ្នាំ២០១៩នេះ ។
ជាក់ស្តែងធ្យូងឃើញមានប្រជាពលរដ្ឋនៅឃុំអូរបីជាន់ ស្រុកអូរជ្រៅ បានដុតជាច្រើនកន្លែងដែលមានឈើកំណាត់ និងឡដុតធ្យូងហុយដែលប្រជាពលរដ្ឋបានដុតសម្រាប់លក់អោយឈ្មួញនាំចេញលក់អោយថៃ ដែលភាគីឈ្មួញទិញនាំចេញតាមច្រករបៀងខុសច្បាប់តំបន់ប្រាំស្ថិតភូមិសាស្ត្រ ស្រុកស្វាយចេក ដែលឃើញសកម្មភាពឈ្មួញទិញនាំចេញរាល់ថ្ងៃ តែចង្រៃអីបិតខាងច្រកតំបន់ព្រំដែនបឹងត្រកួន និងច្រករបៀងខុសច្បាប់ធ្នង់បិតមិនអោយឈ្មួញនាំធ្យូងចេញលក់អោយឈ្មួញថៃត្រូវបានបិតតែធ្យូងទេ តែទំនិញផ្សេងនាំចូលដោយសេរី ៕
ចែករំលែកព័តមាននេះ