ប្រទេសឥណ្ឌា ៖ មនុស្ស៩នាក់ទៀតបានត្រូវស្លាប់កាលពីថ្ងៃទី១៨កុម្ភៈ នៅតំបន់កាស្មៀរឥណ្ឌា ក្នុងប្រតិបត្តិការយោធាមួយរបស់កងទ័ពឥណ្ឌា ប្រឆាំងពួកបះបោរជាការតបតចំពោះការវាយប្រហារអត្តឃាត ដែលសម្លាប់សមាជិកកងកម្លាំងសន្តិសុខឥណ្ឌា៤១នាក់នៅទីនោះ កាលពីសប្ដាហ៍មុន ហើយនាំឲ្យមានភាពតានតឹងថ្មីរវាងឥណ្ឌានិងប៉ាគីស្ថាន។
កងទ័ពឥណ្ឌាបានធ្វើប្រតិបត្តិការតាមប្រមាញ់មនុស្ស ដើម្បីតាមរកពួកឧទ្ទាមដែលសង្ស័យថា រៀបចំការវាយប្រហារអត្តឃាតកាលពីថ្ងៃទី១៤កុម្ភៈ ប្រឆាំងសមាជិកកងកម្លាំងសន្តិសុខដែលវិលត្រឡប់ពីបំពេញបេសកកម្ម។ នោះជាការវាយប្រហារយ៉ាងបង្ហូរឈាមបំផុត តាំងពីចាប់ផ្ដើមការបះបោរបំបែកខ្លួននិយម ប្រឆាំងក្រុងញូវដែល្លីពីដំណាច់ឆ្នាំ១៩៨៩ក្នុងតំបន់ហ៊ីម៉ាឡៃយ៉ានោះ ដែលមានជម្លោះជាមួយប៉ាគីស្ថានមក ។
កាលពីថ្ងៃទី១៨កុម្ភៈកងកម្លាំងសន្តិសុខឥណ្ឌា បានធ្វើការវាយឆ្មក់លើកន្លែងលាក់ខ្លួនមួយរបស់ពួកឧទ្ទាម ក្នុងស្រុកពុលវ៉ាម៉ាដែលកើតមានការវាយប្រហារភេរវកម្ម ត្រង់កន្លែងមួយចម្ងាយប្រមាណជា៣០គីឡូម៉ែត្រ ខាងត្បូងក្រុងស្រ៊ីណាហ្គា ជាទីក្រុងធំបំផុតនៅកាស្មៀរ។ យោងតាមប្រភពប៉ូលិសនិងកងយោធាថា ទាហាន៤នាក់ ប៉ូលិសម្នាក់ ឧទ្ទាម៣នាក់នៃក្រុមអ៊ិស្លាមនិយម JAISH-E-MOHAMMED មានមូលដ្ឋាននៅប៉ាគីស្ថាន ព្រមទាំងជនស៊ីវិលម្នាក់ បានត្រូវស្លាប់ ក្នុងការបាញ់តតាំងគ្នា។ ម្យ៉ាងទៀតទាហាន៦នាក់និងប៉ូលិសម្នាក់បានត្រូវរបួស ក្នុងការប្រយុទ្ធដែលមានរយៈពេលជាច្រើនម៉ោង។
យោងតាមបណ្ដាសារព័ត៌មានក្នុងស្រុកថាឧទ្ទាមម្នាក់ដែលត្រូវសម្លាប់ ឈ្មោះABDUL RASHID GAZI ជាជនជាតិប៉ាគីស្ថាន មានតួនាទីមួយក្នុងការវាយប្រហារកាលពីថ្ងៃទី១៤កុម្ភៈ។ ឥណ្ឌាបានចោទប្រកាន់ប៉ាគីស្ថានចាប់តាំងពីយូរមកហើយថា ជាអ្នកជួយទ្រទ្រង់ដល់ការជ្រៀតចូល របស់ពួកឧទ្ទាមប្រដាប់អាវុធ តែប៉ាគីស្ថានបដិសេធជានិច្ច។ ប្រទេសទាំង២បានកោះហៅឯកអគ្គរដ្ឋទូតរៀងៗខ្លួនដើម្បីពិគ្រោះយោបល់។
នាយករដ្ឋមន្ត្រីឥណ្ឌា លោកណារេនដ្រាម៉ូឌីថ្លែងថា ការវាយប្រហារភេរវកម្មយ៉ាងសាហាវព្រៃផ្សៃនៅពុលវ៉ាម៉ា បង្ហាញថាការចរចាត្រូវបានបញ្ចប់។ ការវាយប្រហារដោយរថយន្តផ្ទុកគ្រឿងផ្ទុះ សំដៅលើក្បួនរថយន្តដែលដឹកសមាជិកកងកម្លាំងសន្តិសុខ ប្រមាណជា២៥០០នាក់ ស្ថិតក្នុងកងកម្លាងប៉ូលិស នាំឲ្យមានរលកកំហឹងនៅក្នុងប្រទេសឥណ្ឌាទាំងមូល ដោយពួកអ្នកធ្វើអត្ថាធិប្បាយទាមទារឲ្យមានការសងសឹក។
កាលពីថ្ងៃទី១៧កុម្ភៈពួកបាតុករនៅក្រុងញូវដែល្លី បានដុតរូបនានារបស់បណ្ដាអ្នកទទួលខុសត្រូវប៉ាគីស្ថាន និងរបស់ក្រុម JAISH-E-MOHAMMED។ រួចនៅកាស្មៀរមានបាតុកម្មហិង្សានានា នៅតាមទីក្រុងជាច្រើននៃតំបន់នោះ ដែលមានប្រជាជន១,២៥លាននាក់។ ហាងទំនិញជាច្រើននៅតែបិទទ្ធារកាលពីថ្ងៃទី១៨កុម្ភៈនៅឥណ្ឌា ជាសញ្ញានៃការតវ៉ាប្រឆាំងការវាយប្រហារភេរវកម្ម៕
ចែករំលែកព័តមាននេះ