ខេត្តកណ្តាល ៖ វត្តអង្គរជ័យ ក្នុងភូមិអង្គរជ័យ ឃុំបន្ទាយដែក ស្រុកកៀនស្វាយ ខេត្តកណ្តាល មានខ្លោងទ្វារជាប់ផ្លូវជាតិលេខ១ ចម្ងាយពីរាជធានីភ្នំពេញដីប្រហែល៣០គីឡូម៉ែត្រ គឺជាវត្តបុរាណមួយកកើតឡើងតាំងពីយូរលង់ណាស់មកហើយ…
ខេត្តកណ្តាល ៖ វត្តអង្គរជ័យ ក្នុងភូមិអង្គរជ័យ ឃុំបន្ទាយដែក ស្រុកកៀនស្វាយ ខេត្តកណ្តាល មានខ្លោងទ្វារជាប់ផ្លូវជាតិលេខ១ ចម្ងាយពីរាជធានីភ្នំពេញដីប្រហែល៣០គីឡូម៉ែត្រ គឺជាវត្តបុរាណមួយកកើតឡើងតាំងពីយូរលង់ណាស់មកហើយ ។ វត្តនេះល្បី តៗគ្នាថាមានបារមីសក្តិសិទ្ធិបួងសួងតែងតែបានសម្រេចដូចសេចក្តីប៉ងប្រាថ្នា ។
កាលពីពេល ថ្មីៗកន្លងមកលោកតាម៉ៅ កុច អាយុ៦៨ឆ្នាំជាប្រធានគណៈកម្មការអាចារ្យវត្តអង្គរជ័យ និងលោកយាយចាន់អាយុ៧៤ឆ្នាំ ដែលជាអ្នកតាំងសមាទានសីលបានរៀបរាប់ឲ្យដឹងប្រហាក់ប្រហែលគ្នាថា វត្តនេះកើតមានតាំងពីយូរយារណាស់មកហើយ តែត្រូវបំផ្លាញអស់ទាំងស្រុងនៅក្នុងរបបប៉ុល ពត ។
លុះក្រោយថ្ងៃរំដោះ៧ មករា ពុទ្ធបរិស័ទចំណុះជើងវត្តបានមូលមតិគ្នាជាមួយគណៈកម្មការអាចារ្យវត្តចាប់ផ្តើមកសាងវត្តឡើងវិញនៅក្នុងអំឡុងឆ្នាំ១៩៨០-១៩៨២ ដោយដាក់ឈ្មោះថាវត្តគងជ័យ ប៉ុន្តែមកដល់បច្ចុប្បន្ននេះគេហៅតែវត្តអង្គរជ័យ វិញ ។ មូលហេតុដែលដាក់ឈ្មោះវត្តគងជ័យព្រោះកាលណោះមានបារមីគងជ័យពូកែសក្តិសិទ្ធិណាស់ ឱ្យតែកើតរឿងអាសន្នអ្វីនៅក្នុងវត្តគឺបន្លឺឡើងហើយ ! មិនតែប៉ុណ្ណោះពុទ្ធបរិស័ទស្រែកសុំខ្ចីចាន ឆ្នាំងបានដូចបំណង តែមកដល់បច្ចុប្បន្នមិនដឹងជាយ៉ាងម៉េចសុំលែងបានហើយ។
បច្ចុប្បន្នវត្តនេះមានកន្លែងបារមីសក្តិសិទិ្ធជាច្រើន ដូចជា លោកយាយទេព លោកយាយហោត្រៃ លោកតាខ្លឹមចាន់ លោកតាស្ទឹងប្រសព្វមុខ លោកតាពិជ័យសង្គ្រាម លោកតាក្រហមក បារមីទួលដំបៅជ្រុំ បារមីទួលដំបូកខ្មៅមានលោកយាយសច្ចៈគ្រប់លក្ខណៈ លោកតាដំបងដែក សម្តេចយមរាជ និងលោកតាមុនីឥសី។ ឯកឧត្តម លោកជំទាវ អ្នកឧកញ៉ា និងប្រជាពុទ្ធបរិស័ទជិតឆ្ងាយតែងតែបែបន់សូមឱ្យមានសេចក្តីសប្បាយ និងរកទទួលទានមានបាន។
ខ្លះបន់សូមឲ្យសម្រេចកិច្ចការងារ ផ្សេងៗ ខ្លះរៀបការរួចប្តីប្រពន្ធអត់មានកូនបែបន់កន្លែងលោកយាយសច្ចៈគ្រប់លក្ខណៈសូមឱ្យមានកូនបានដូចបំណង។ ខ្លះទៀតធ្លាក់ខ្លួនឈឺបន់ស្រន់ឲ្យជាស្បើយ ។ ខ្លះកូនចៅប្តីប្រពន្ធលែងលះគ្នាបន់ឱ្យជួបជុំគ្នាវិញ…។
សម្តេចពិជ័យសេនាទៀ បាញ់ លោកជំទាវស៊ុយ សុផាន និងលោកខៀវ កាញារីទ្ធ និងក្រុមគ្រួសារឧស្សាហ៍ទៅធ្វើបុណ្យបន់ស្រន់ញឹកញាប់ណាស់ ។
លោកតា និងលោកយាយទាំងពីរនាក់ ឲ្យដឹងទៀតថាភាពរីកចម្រើននៅក្នុងវត្តអង្គរជ័យកើតចេញពីទឹកចិត្តសទ្ធាជ្រះថ្លារបស់ទ្រង់ សម្តេចឯកឧត្តម លោកជំទាវ អ្នកឧកញ៉ានិងពុទ្ធបរិស័ទជិតឆ្ងាយដែលមានជំនឿជឿជាក់ទៅលើឫទ្ធិបារមីវត្តអង្គរជ័យ និងតាមរយៈការស្រោចទឹករំដោះគ្រោះចង្រៃជូនពុទ្ធបរិស័ទរបស់លោកគ្រូព្រះចៅអធិការវត្ត ។
លោកសូ វង់ អាយុ៦៨ឆ្នាំ មេភូមិអង្គរជ័យថ្លែងថាវត្តអង្គរជ័យមានបារមីខ្លាំងពូកែសក្តិសិទ្ធិតាំងដើមមក នេះបើតាមជំនឿរបស់ពុទ្ធបរិស័ទ ៕
ចែករំលែកព័តមាននេះ