ខេត្តត្បូងឃ្មុំ ៖ កសិករជាង៥០គ្រួសារ ដែលដាំពោតនៅភូមិជីរោទ៍ក្រោមទី១ ឃុំជីរោទ៍ទី១ ស្រុកត្បូងឃ្មុំ បានលើកថា ឆ្នាំនេះពោតមានតម្លៃល្អគួរសម ដោយក្នុង១គីឡូក្រាម តម្លៃ៨២០រៀល ចំពោះទិន្នផលដែលប្រមូលផល និងសម្ងួតដោយខ្លួនឯង និងតម្លៃ៧២០រៀលក្នុង១គីឡូក្រាម សម្រាប់ឈ្មួញចុះមកប្រមូលផលដល់ចម្ការ ។
បើតាមរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានអះអាងថា តម្លៃពោតនឹងប្រសើរឡើងថែមទៀតនៅពេលខាងមុខ ។ ក្នុងពិធីសំណេះសំណាលជាមួយកសិករដាំពោត កាលពីថ្ងៃទី១៦ ខែកុម្ភៈ កន្លងមក លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានលើកឡើងថា ថ្មីៗនេះ រាជរដ្ឋាភិបាលបានយកពន្ធលើការនាំចូលពោតក្នុងគោលបំណងកាត់បន្ថយការនាំចូល រួចបង្វែរទិសដៅរបស់ក្រុមហ៊ុនផលិតចំណីសត្វឲ្យងាកមកប្រមូលទិញផលិតផលពោតក្នុងស្រុកវិញ ដើម្បីលើកកម្ពស់ផលិតកម្មក្នុងស្រុកដែលនេះជាគោនយោបាយអាទិភាពមួយរបស់រាជរដ្ឋាភិបាល ។ ក្នុងឱកាសនោះ លោករដ្ឋមន្ត្រីបញ្ជាក់ថា ៖« តម្លៃពោតនឹងមានលក្ខណៈល្អប្រសើរថែមទៀត »។
ជាមួយគ្នានេះ លោករដ្ឋមន្ត្រីក៏បានកោតសរសើរចំពោះការរីកចម្រើនលើវិស័យផលិតកម្មពោត ដោយសារបច្ចេកទេសក្នុងការភ្ជួរដី ដាំ ដាក់ជី បាញ់ថ្នាំ ការប្រមូលផល និងប្រលេះគ្រាប់ មានលក្ខណៈកាន់តែទំនើប ដែលកត្តាអស់ទាំងនេះបានចូលរួមចំណែកកាត់បន្ថយថ្លៃដើម ពេលវេលា និងពលកម្មយ៉ាងច្រើនដល់អ្នកផលិត ។លោករដ្ឋមន្ត្រីបានផ្ដល់អនុសាសន៍ដល់អគ្គនាយកដ្ឋានកសិកម្ម និងនាយកដ្ឋានកសិ-ឧស្សាហកម្ម សហការជាមួយមន្ទីរចុះទៅបណ្តុះបណ្តាលបច្ចេកទេស និងអត្ថប្រយោជន៍នៃការធ្វើផលិតកម្មកសិកម្មតាមកិច្ចសន្យា ដើម្បីជាប្រយោជន៍ដល់កសិករក្នុងការចរចាថ្លៃ ហើយគួរធ្វើកិច្ចសន្យាផ្ទាល់ជាមួយម្ចាស់ឡសម្ងួត ឬក្រុមហ៊ុនកែច្នៃផ្ទាល់តែម្តង ។
លោករដ្ឋមន្ត្រីអំពាវនាវដល់ក្រុមហ៊ុនឯកជន និងដៃគូអភិវឌ្ឍន៍ ចូលរួមក្នុងវេទិកាកសិកម្ម ដែលនឹងរៀបចំធ្វើនៅថ្ងៃទី២៦ ខែកុម្ភៈ នៅទីស្តីការក្រសួង ដើម្បីផ្លាស់ប្តូរបទពិសោធន៍ និងរួមគ្នាស្វែងរកដំណោះស្រាយរាល់បញ្ហាប្រឈមនានាក្នុងវិស័យកសិកម្មផងដែរ ។
អ្នកស្រី សែន ស្រីណា ម្ចាស់ឡសម្ងួតពោតនៅឃុំទន្លេបិត ស្រុកត្បូងឃ្មុំ បានឲ្យដឹងដែរថា អ្នកស្រីបានប្រមូលទិញពោតពីប្រជាកសិករក្នុងស្រុកកំពង់សៀម ស្រុកចំការលើ និងស្រុកត្បូងឃ្មុំ តម្លៃ៧២០រៀលក្នុង១គីឡូក្រាម យកមកសម្ងួត រួចលក់ឲ្យក្រុុមហ៊ុនស៊ីភី កម្ពុជា ក្រុមហ៊ុនគ្រីនហ្វីត និងបេតាក្រូ ក្នុងតម្លៃ១.០៦០រៀលក្នុង១គីឡូក្រាម បូកទាំងថ្លៃដឹកជញ្ជូន ។ អ្នកស្រីបញ្ជាក់ថា ៖« បច្ចុប្បន្ននេះ មានបញ្ហាមួយចំនួនដែលយើងស្នើសុំលោករដ្ឋមន្ត្រីមេត្តាដោះស្រាយដូចជា ពិនិត្យលើតម្លៃភ្លើង, ជួយកាត់បន្ថយបរិមាណពោតនាំចូល ពិសេសនៅពេលរដូវប្រមូលផល និងជួយរកពូជពោតណាដែលឆាប់បានផលដល់កសិករ »។
ពោតជាដំណាំយុទ្ធសាស្ត្ររយៈខ្លី ដែលត្រូវបានប្រជាកសិករដាំដុះ២ដងក្នុង១ឆ្នាំ និងទទួលបានទិន្នផលពី៨,៥ទៅ៩តោនក្នុង១ហិកតា ។ ចំណែកគ្រាប់ពូជវិញ បច្ចុប្បន្នកសិករលែងចងព្យូរគ្រាប់ពូជទុកក្រោមផ្ទះ ឬក្នុងចង្ក្រានបាយដូចមុនទៀតហើយ គឺដល់រដូវដាំដុះ ទើបទិញពូជមកដាំតែម្តង ដោយក្នុង១គីឡូក្រាម តម្លៃ២៤.០០០រៀល ៕
ចែករំលែកព័តមាននេះ