ខេត្តកំពង់ឆ្នាំង ៖ នៅក្នុងពិធីបង្ហាញ កសិដ្ឋានពិសោធន៍ ស្រាវជ្រាវកសិកម្មតាមបែបទំនើបរបស់វិទ្យាស្ថានប្រាយហូម ស្ថិតក្នុងភូមិសន្ទូច ឃុំស្រែថ្មី ស្រុករលាប្អៀរ នាព្រឹកថ្ងៃទី ១៥…
ខេត្តកំពង់ឆ្នាំង ៖ នៅក្នុងពិធីបង្ហាញ កសិដ្ឋានពិសោធន៍ ស្រាវជ្រាវកសិកម្មតាមបែបទំនើបរបស់វិទ្យាស្ថានប្រាយហូម ស្ថិតក្នុងភូមិសន្ទូច ឃុំស្រែថ្មី ស្រុករលាប្អៀរ នាព្រឹកថ្ងៃទី ១៥ ខែកុម្ភៈ កន្លងមក លោក ទូច វិសាលសុខ រដ្ឋលេខាធិការក្រសួងអប់រំ យុវជន និងកីឡា បានមានប្រសាសន៍ថា ការធ្វើកសិកម្មបែបទំនើប គឺធ្វើនៅលើដីតូច តែវានឹងទទួលទន្និផលខ្ពស់ ចំណាយពលកម្មតិច ខុសពីកសិកម្មតាមបែបបុរាណដែលជាទម្លាប់របស់កសិករខ្មែរ ។
លោករដ្ឋលេខាធិការបន្ដថា ៖« តាមបទពិសោធន៍ អ្វីដែលថ្មីគឺប្រជាពលរដ្ឋខ្មែរនឹងចាប់យកមកអនុវត្ត ដូច្នេះយើងរំពឹងថា ប្រជាកសិករនឹងចាប់អារម្មណ៍ទៅលើសិដ្ឋានកសិកម្មទំនើបនេះ ដែលនឹងបញ្ជូនកូនមកសិក្សារៀនសូតអំពីបទពិសោធន៍បច្ចេកទេសដើម្បីកែទម្លាប់ពីការធ្វើកសិកម្មបែបបុរាណ មកទទួលយកការធ្វើកសិកម្មបែបទំនើប ព្រោះថាកសិកម្មបែបទំនើប អាចជួយលើកស្ទួយជីវភាពកសិករឲ្យប្រសើរឡើង »។
លោក សេង ស៊ិន្ថារ នាយកវិទ្យាស្ថានប្រាយហូប បានឲ្យដឹងដែរថា កសិដ្ឋានកសិកម្មបែបទំនើប គឺមានសារសំខាន់ណាស់ កសិករមិនចាំបាច់មានដីធំក៏អាចដាំដុះបន្លែច្រើនមុខ ច្រើនប្រភេទដែរ ។ លោកបន្ដថា ការដាំដំណាំតាមបច្ចេកទេស គឺទទួលបានទិន្នផលខ្ពស់ជាងការដាំតាមវាលស្រែបែបបុរាណ ។ ជាក់ស្ដែង យើងបានចាប់ផ្ដើមដាំបន្លែនៅដើមខែវិច្ឆិកាឆ្នាំ២០១៨ មកដល់ពាក់កណ្តាលខែកុម្ភៈនេះ បន្លែគ្រប់មុខបានទទួលផលខ្ពស់ ហើយក៏ជាពេលវេលាដ៏សមស្របមួយក្នុងការបង្ហាញដល់កសិករ ដែលមានចំណាប់អារម្មណ៍ផងដែរ ដើម្បីសង្កេត និងពិនិត្យមើលការបណ្ដុះកូន ការដាំបន្លែ ដែលកំពុងលូតលាស់ ដើម្បីរៀនសូត្រស្រង់បទពិសោធន៍បច្ចេកទេស និងពិនិត្យមើលប្រព័ន្ធស្រោចស្រពដំណក់ទឹក និងឧបករណ៍កសិកម្មសំខាន់ៗ » ។
លោកបញ្ជាក់ថា ៖« ចំពោះគោលបំណងសំខាន់របស់វិទ្យាស្ថាន គឺដើម្បីបង្ហាញដល់កសិករ និងសហគមន៍ពីជំនាញកសិកម្មទំនើប ពីបច្ចេកទេសដាំដុះ បច្ចេកទេសស្រោចទឹកដោយស្វ័យប្រវត្តិ និងអំពីការលូតលាស់របស់បន្លែ ក្នុងរោងប្លាស្ទិកជាដើម ដើម្បីឲ្យកសិករខ្មែរយើងកែប្រែទម្លាប់ពីការធ្វើកសិកម្មបែបប្រពៃណី មកប្រើបច្ចេកទេសវិញ »៕
ចែករំលែកព័តមាននេះ