រាជធានីភ្នំពេញ ៖ សាលាដំបូងរាជធានីភ្នំពេញ កាលពីព្រឹកថ្ងៃទី១៨ កុម្ភៈ បានប្រកាសសាលក្រមផ្តន្ទាទោស ស្ត្រី២នាក់ដែលជាប់ចោទជាមេខ្លោងឆបោករថយន្តគេចំនួន៤២គ្រឿងយកទៅបញ្ចាំតាមកុងសុី ដាក់ពន្ធនាគារ២ឆ្នាំម្នាក់ទៀត បន្ថែមលើសំណុំរឿងទី១០ សរុបទោសគឺ២០ឆ្នាំក្នុងម្នាក់ និងតម្រូវឲ្យសងប្រាក់ទៅដើមបណ្តឹងរាប់សែនដុល្លារអាមេរិក ក្រោមការចោទប្រកាន់ពីបទឆបោក និងបទរំលោភលើទំនុកចិត្តតាមមាត្រា៣៩១ និងមាត្រា៣៩២ នៃក្រមព្រហ្មទណ្ឌ ។
ជនជាប់ចោទម្នាក់ឈ្មោះ ឃាម រដ្ឋា ហៅ យ៉ា ភេទស្រី អាយុ៣៥ឆ្នាំ និងម្នាក់ឈ្មោះ ផេង លី ហៅ ដា ភេទស្រី អាយុ៣៣ឆ្នាំ ។ សំណុំរឿងនេះដំបូងសមត្ថកិច្ចចាប់ខ្លួន៣នាក់ តែក្រោយមកចៅក្រមស៊ើបសួរដោះលែងម្នាក់ទៅវិញដែលទំនងមិនពាក់ព័ន្ធពីបទល្មើស គឺឈ្មោះ ឈាន ភក្ដី ហៅ ស្រម៉ូម ។
សូមរំលឹកថា រឿងក្ដីមួយនេះចៅក្រមសើុបសួរបានបំបែកសំណុំរឿងតាមអង្គហេតុនីមួយៗដោយកាត់ទោសម្ដងមួយករណីៗ សរុបចំនួន១០ករណី ដែលរឿងនិមួយៗ ត្រូវផ្ដន្ទាទោសជនជាប់ជាប់រយៈពេល២ឆ្នាំ និងបង្គាប់ឲ្យសងរថយន្តទៅតាមតម្លៃទីផ្សារជាក់ស្ដែង រហូតដល់គ្រប់ទាំង៤២គ្រឿង ប៉ុន្តែជាក់ស្ដែងជនជាប់ចោទគ្មានប្រាក់សង ទៅដើមបណ្តឹងនោះទេ ។
គួររំលឹកថា កាលពីថ្ងៃទី១០ ខែមេសា ឆ្នាំ២០១៨ សមត្ថកិច្ចជំនាញនៃការិយាល័យបទល្មើសព្រហ្មទណ្ឌ កងរាជអាវុធហត្ថរាជធានី ភ្នំពេញ បានឃាត់ខ្លួនជនសង្ស័យឈ្មោះ ឃាម រដ្ឋា ហៅយ៉ា យកមកសួរនាំ ។ តាមវិធានជំនាញរបស់អាវុធហត្ថរាជធានីភ្នំពេញក៏ដូចជាចម្លើយសារភាពរបស់ជនជាប់ចោទបានឲ្យដឹងថា រូបនាងពិតជាបានជួលរថយន្តពីម្ចាស់ទាំង៣នាក់ អស់ចំនួន១២គ្រឿងពិតប្រាកដមែន ។
នៅថ្ងៃទី១២ ខែមេសា ឆ្នាំ២០១៨ កម្លាំងជំនាញ នៃការិយាល័យបទល្មើសព្រហ្មទណ្ឌ អាវុធហត្ថរាជធានីភ្នំពេញបានឃាត់ខ្លួនជនសង្ស័យជាប់ពាក់ព័ន្ធចំនួន២នាក់បន្ថែមទៀត គឺឈ្មោះ ឈាន ភក្តី ហៅ ស្រម៉ូម ហៅពន្លកភេទប្រុស និងឈ្មោះ ផេង លី ហៅដាភេទស្រី ។ តាមចម្លើយសារភាពរបស់ជនសង្ស័យទាំងបី សមត្ថកិច្ចអាវុធហត្ថរាជធានីភ្នំពេញបានរកឃើញជនរងគ្រោះ១៤នាក់ផ្សេងទៀត ដែលចាញ់កលល្បិច ក្រុមជើងឆើតទាំង២នាក់នេះដូចគ្នា ហើយសមត្ថកិច្ចបាន ទំនាក់ទំនងជនរងគ្រោះទាំង១៤នាក់មកដាក់ពាក្យបណ្តឹង ។ សរុបជនរងគ្រោះ ដែលសមត្ថកិច្ចបានរកឃើញចំនួន១៦នាក់ ត្រូវមនុស្ស១ក្រុមជួលរថយន្តមកបញ្ចាំ អស់ចំនួន៣៤គ្រឿង ។
ដោយយោងលើភស្តុតាងស៊ីសង្វាក់មិនអាចប្រកែកបានជនសង្ស័យទាំងបីនាក់ ព្រមសារភាពជាលើកទី២ថា ក្រុមខ្លួនពិតជាបានជួលរថយន្តពីជនរងគ្រោះយកមកបញ្ចាំនិងដាក់ជួលបន្តពិតប្រាកដមែន តែមិនមែនជួល៣៤គ្រឿងនោះទេ គឺពួកនាងបានជួលរហូតដល់ទៅ៤២គ្រឿង ពីជនរងគ្រោះទាំង១៦នាក់ និងជនរងគ្រោះផ្សេងទៀត ដែលសមត្ថកិច្ចមិនទាន់អាចទាក់ទងមកដាក់ពាក្យបណ្តឹងបាន ៕
ចែករំលែកព័តមាននេះ