រាជធានីភ្នំពេញ ៖ បន្ទាប់ពីផឹកស្រាស្រវឹង បុរសម្នាក់បានជេរប្រមាថគំរាមសម្លាប់ម្ដាយបង្កើត ព្រមទាំងយកដំបងជាប់ដែកគោលវាយទៅលើបងប្រុសបង្កើតរបស់ខ្លួន បណ្ដាលឲ្យរងរបួសបាក់ដៃ ។ មិនតែប៉ុណ្ណោះថែមទាំងបានចាក់សោបង្ខាំងម្ដាយ និងបងប្រុសនៅក្នុងផ្ទះ មិនឲ្យបងប្អូន…
រាជធានីភ្នំពេញ ៖ បន្ទាប់ពីផឹកស្រាស្រវឹង បុរសម្នាក់បានជេរប្រមាថគំរាមសម្លាប់ម្ដាយបង្កើត ព្រមទាំងយកដំបងជាប់ដែកគោលវាយទៅលើបងប្រុសបង្កើតរបស់ខ្លួន បណ្ដាលឲ្យរងរបួសបាក់ដៃ ។ មិនតែប៉ុណ្ណោះថែមទាំងបានចាក់សោបង្ខាំងម្ដាយ និងបងប្រុសនៅក្នុងផ្ទះ មិនឲ្យបងប្អូន ព្រមទាំងអ្នកភូមិ និងនគរបាលប៉ុស្តិ៍ចូលជួយជនរងគ្រោះយកទៅកាន់មន្ទីរពេទ្យឡើយ។
ហេតុការណ៍ខាងលើបានបង្កឲ្យមានការភ្ញាក់ផ្អើលកាលពីវេលាម៉ោង៩និង៣០នាទីព្រឹកថ្ងៃទី១៩ ខែកុម្ភៈ ឆ្នាំ២០១៩ នៅក្នុងភូមិត្រពាំងអញ្ចាញ៣ សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ។
បុរសជាជនដៃដល់ត្រូវជាប្អូនបង្កើតឈ្មោះឈិត ជិនសីហា ហៅយ៉ា ភេទប្រុស អាយុ៣១ឆ្នាំ មានប្រពន្ធ និងកូន២នាក់នៅក្នុងបន្ទុកគ្រួសារ ចំណែកជនរងគ្រោះត្រូវជាបងប្រុសបង្កើតឈ្មោះឈិត ជិនវិច្ឆិកា ហៅជីត ភេទប្រុស អាយុ៣៣ឆ្នាំ មុខរបរជាអ្នកបើកបររថយន្តឲ្យលោកមេធាវីម្នាក់ មានប្រពន្ធនិងកូន២នាក់ ក្នុងបន្ទុកគ្រួសារ ។ អ្នកទាំង២នាក់រស់នៅផ្ទះក្បែរគ្នានៅក្នុងភូមិឃុំកើតហេតុខាងលើ ប៉ុន្តែជនរងគ្រោះជាបងរស់នៅជាមួយម្ដាយ ។ រីឯស្ត្រីជាម្តាយមិនស្គាល់ឈ្មោះ ជាអតីតគ្រូបង្រៀនចូលនិវត្តន៍ម្នាក់ និងកំពុងមានជំងឺផង ។
តាមប្រភពពីស្ត្រីជាម្ដាយបាននិយាយថា គាត់មានការហួសចិត្តជាមួយកូនប្រុសម្នាក់នេះ(ជនដៃដល់) ខ្លាំងណាស់ ដែលមានចរិកកោងកាចបែបនេះ ។ កន្លងមកឲ្យតែត្រឡប់មកពីផឹកស៊ីនៅខាងក្រៅស្រវឹងធ្លាក់ភ្នែកចូលមកដល់ផ្ទះពេលណាតែងតែរករឿងជេរគំរាមសម្លាប់ប្រពន្ធកូន និងបងប្អូនជាបន្តបន្ទាប់។ ជាពិសេសបានជេរប្រមាថ និងគំរាមសម្លាប់គាត់ជាម្ដាយថែមទៀតផង ដែលគាត់មិនបានដឹងថា កូនប្រុសម្នាក់នេះខឹងរឿងអ្វីឡើយ ទើបចេះតែរករឿងមិនឈប់បែបនេះ និងប៉ុនប៉ងវាយកម្ទេចរថយន្តសាំយ៉ុង១គ្រឿងចោលទៀត។
ស្ត្រីជាម្តាយបានបន្តថា ដោយឡែកនាពេលចុងក្រោយនេះ មុននឹងឈានដល់ការប្រើអំពើហិង្សាវាយទៅលើបងប្រុសបង្កើតរហូតមានរបួសស្នាមបែបនេះនេះ គឺនៅវេលាម៉ោង៦ល្ងាចថ្ងៃទី១៨ ខែកុម្ភៈ កូនប្រុសម្នាក់នេះបានស្រវឹងស្រាហើយបានរករឿងជេរប្រមាថគំរាមសម្លាប់គាត់ និងជនរងគ្រោះជាបងប្រុស ហើយបានជេរបញ្ចោរស្រែកឡូឡាអត់ដេកអត់ពួនស្ទើរពេញ១យប់ រហូតដល់វេលាម៉ោង៣ទៀបភ្លឺចូលថ្ងៃទី១៩ ខែកុម្ភៈ ទើបឈប់ ហើយចូលដេក ប៉ុន្តែមិនទាន់ភ្លឺផងក៏បានក្រោរករឿងបន្តទៀត។
ស្ត្រីជាម្ដាយបានបន្តទៀតថា លុះដល់វេលាកើតហេតុ ពេលគាត់កំពុងដេកនៅក្នុងផ្ទះ ហើយកូនប្រុសជាជនរងគ្រោះកំពុងអង្គុយដាក់ចំណីឲ្យមាន់ ស្រាប់តែជនដៃដល់កាន់ដំបងឈើ ដែលមានជាប់ដែកគោលធ្វើសកម្មភាពវាយមកលើជនរងគ្រោះជាបង បណ្ដាលឲ្យរងរបួសបែបនេះតែម្ដង ។ ពេលនោះជនរងគ្រោះបានរត់ទៅឲ្យគាត់ជួយ ហើយគាត់បានបិទទ្វារផ្ទះទើបរួចខ្លួនផុតពីសេចក្ដីស្លាប់ បន្ទាប់មកជនដៃដល់បានចាក់សោពីក្រៅបង្ខាំងគាត់ និងកូនប្រុសជាជនរងគ្រោះមិនឲ្យចេញទៅណាឡើយ។
មិនតែប៉ុណ្ណោះបានបិទទ្វាររបងផ្ទះមិនឲ្យកូនៗរបស់គាត់ផ្សេងទៀតចូលទៅជួយគាត់ និងជនរងគ្រោះនោះទេ ដែលជាហេតុបង្កឲ្យមានការភ្ញាក់ផ្អើលពេញភូមិយ៉ាងខ្លាំង ។ ពេលនេះគាត់សុំឲ្យចាត់ការកូនប្រុសម្នាក់នេះតាមច្បាប់ទៅចុះ កុំលើកលែងអី ព្រោះបើលែងមកវិញគាត់ប្រាកដជាគ្រោះថ្នាក់ដល់ជីវិតជាមិនខានឡើយ។
តាមប្រភពពីនគរបាលប៉ុស្តិ៍ត្រពាំងក្រសាំងបាននិយាយថា ក្រោយពេលហេតុការណ៍បែបនេះកើតឡើង កម្លាំងសមត្ថកិច្ចបានចុះទៅកាន់ទីនោះ ហើយបានឃើញជនសង្ស័យកាន់ដំបងឈើមានជាប់ដែកគោលនៅក្នុងដៃ និងស្រែកគំរាមមិនឲ្យនរណាចូលទៅឡើយ ហើយបានចាក់សោរទ្វាររបងជាប់ ព្រមទាំងគំរាមមិនឲ្យនរណាចូលទៅជិតទីនោះឡើយ បើហ៊ានចូលខ្លួននិងវាយបំបាក់ជើងចោលតែម្ដង ។ ពេលនោះកម្លាំងនគរបាលប៉ុស្តិ៍បានធ្វើការសម្របសម្រួលសុំឲ្យបើកទ្វារ ដើម្បីយកជនរងគ្រោះទៅព្យាបាលនៅមន្ទីរពេទ្យយ៉ាងណា ក៏ជនដៃដល់មិនព្រមដែរ។
ប្រភពដដែលបានបន្តថា ដោយឃើញសភាពការណ៍បែបនេះ ទើបកម្លាំងសមត្ថកិច្ចរាយការណ៍ជូនទៅលោកអធិការដើម្បីសុំកម្លាំងបន្ថែម ហើយរហូតមានការបញ្ជូនកម្លាំងនគរបាលខណ្ឌ១រថយន្តប្រដាប់ដោយខែល និងដំបងទៅដល់ ទើបជនដៃដល់ព្រមបើកទ្វារ ហើយក៏ត្រូវបានចាប់ខ្លួនភ្លាមៗផងដែរ។
បន្ទាប់មក ជនដៃដល់ត្រូវបានកម្លាំងសមត្ថកិច្ចនាំខ្លួនទៅសាកសួរនៅផ្នែកព្រហ្មទណ្ឌនៃអធិការដ្ឋាននគរបាលខណ្ឌពោធិ៍សែនជ័យរង់ចាំចាត់ការតាមច្បាប់។
តាមប្រភពពីអ្នកភូមិបានខ្សឹបប្រាប់ថា សង្ស័យជនដៃដល់ខឹងម្ដាយរបស់ខ្លួនលក់ដីកន្លងមកអត់ចែករូបគេ ហើយបានយកលុយទៅទិញរថយន្តសាំយ៉ុង១គ្រឿង ទើបធ្វើឲ្យជនដៃដល់មួរម៉ៅក្ដៅក្រហាយ និងបានរករឿងជេរប្រមាថទាំងម្ដាយ និងបងប្អូនមិនឈប់ រហូតឈានដល់ការប្រើអំពើហិង្សា បែបនេះតែម្ដង៕
ចែករំលែកព័តមាននេះ