រាជធានីភ្នំពេញ ៖ មន្ត្រីយោធាម្នាក់បានលែងលះគ្នាជាមួយប្រពន្ធមុនមិនទាន់បានដាច់ស្រេចផង ក៏ទៅលួចរៀបការជាមួយប្រពន្ធថ្មីរហូតដល់មានផ្ទៃពោះ ហើយត្រូវស្ត្រីជាប្រពន្ធមុននាំកូនប្រុស-ស្រី២នាក់តាមរកដល់ផ្ទះ ហើយក៏មានទំនាស់គ្នាបែកផ្សែងតែម្តង ។ ហេតុការណ៍នេះ បង្កឱ្យមានការភ្ញាក់ផ្អើលកាលពីព្រឹកថ្ងៃ១៦ កុម្ភៈ នៅក្នុងភូមិខ្ពបវែង សង្កាត់កំពង់សំណាញ់ ក្រុងតាខ្មៅ ខេត្តកណ្តាល ។
បុរសដែលទៅលួចរៀបការប្រពន្ធថ្មីនោះ ត្រូវបានស្គាល់ឈ្មោះស៊ីវ ឥន្ទរ៉ា អាយុ៣៦ឆ្នាំ ជាមន្ត្រីយោធា នៅអង្គភាពកងដឹកជញ្ជូន៩៩ មានលំនៅនិងស្នាក់នៅកន្លែងកើតហេតុ និងមានស្រុកកំណើតភូមិក្រគរ សង្កាត់ក្រគរ ក្រុងក្រចេះ ខេត្តក្រចេះ ។ ចំណែកប្រពន្ធក្រោយនោះ ឈ្មោះឃ្លោក វាសនា អាយុប្រមាណ៣៧ឆ្នាំ ។រីឯស្ត្រីប្រពន្ធមុនដែលនាំកូនដើររកប្តីដែលលែងលះមិនទាន់ដាច់ឈ្មោះ សុង បញ្ញា អាយុ៣៤ឆ្នាំ ជាពលការិនីនៅប្រទេសជប៉ុន មានលំនៅក្បែរផ្សារក្រោម ក្រុងសៀមរាប។
បើតាមតាមស្ត្រីឈ្មោះសុង បញ្ហា បានឱ្យដឹងថា នាងត្រូវប្តីនេះទៅលួចរៀបការជាមួយប្រពន្ធថ្មី ចោលកូន២នាក់ ខណៈដែលនាងទៅធ្វើការនៅប្រទេសជប៉ុន ។ នាងថា នាងនិងឈ្មោះស៊ីវ ឥន្ទរ៉ា បានរៀបការ ជាមួយគ្នាជាប្តីប្រពន្ធ នៅថ្ងៃទី១៩ ធ្នូ ឆ្នាំ២០១០ និងបាននាំគ្នាទៅចុះសំបុត្រអាពាហ៍ពិពាហ៍ត្រឹមត្រូវ និងមានកូន២នាក់ កូនស្រីបងអាយុ៨ឆ្នាំ និងកូនប្រុសអាយុ៦ឆ្នាំ ។
នាងបន្ត នៅចុងឆ្នាំ២០១៥ នាងទៅធ្វើការនៅប្រទេសជប៉ុនបានប្រមាណ១ឆ្នាំ ស្រាប់តែប្តីដែលនៅស្រុកខ្មែរទូរស័ព្ទទៅរករឿងសុំលែងលះគ្នា ហើយសុំទៅរៀបការប្រពន្ធថ្មី តែនាងមិនព្រមដោយប្រាប់ថា ចាំផ្តិតមេដៃលែងគ្នាសិន ទើបអាចរៀបការបាន ហើយត្រូវបានលោកប្តីគំរាមនិងបោះពាក្យថា «វាការធ្វើអីវា»ព្រមទាំងធ្វើលិខិតបញ្ជាក់មួយទៅឱ្យម្តាយរបស់នាងផ្តិតមេដៃឯកភាពព្រមព្រៀងផ្តាច់ចំណងអាពាហ៍ពិពាហ៍ប្តីប្រពន្ធ ដោយស្ម័គ្រចិត្តរៀងៗខ្លួន មូលហេតុដោយមិនអាចរស់នៅជាមួយគ្នា និងមិនចុះសំរុង ស្គាល់តែភាពរកាំរកូស មានបញ្ហាលំបាក ស្មុគស្មាញគ្រប់យ៉ាង ដោយនាងពុំបានដឹងអ្វីទាំងអស់ ព្រោះកំពុងធ្វើការនៅជប៉ុន ។
នាងសុង បញ្ហា បានឱ្យដឹងទៀតថា បន្ទាប់ពីបានលិខិតនោះ ដែលម្តាយផ្តិតមេដៃមិនទាន់មានការឯកភាពពីនាង និងមានសាលក្រមពីតុលាការផង ឈ្មោះស៊ីវ ឥន្ទរ៉ា បានទៅធ្វើលិខិតពីចៅសង្កាត់ក្រគរ ដោយមានការឃុបឃិតគ្នាចេញលិខិតបញ្ជាក់ថា ឈ្មោះស៊ីវ ឥន្ទរ៉ា ជាបុរសពោះម៉ាយ ទៅវិញ តើលោកចៅសង្កាត់មានយល់ពីច្បាប់អត់? ហើយមានអ្វីជាសំអាង ដែលហ៊ានចេញពីលិខិតបញ្ជាក់ថា ពោះម៉ាយ ។ ដោយសារតែបានលិខិតនោះ ទើបប្តីនាងបានទៅសុំរៀបអាពាហ៍ពិពាហ៍ជាមួយឈ្មោះឃ្លោក វាសនា ដែលកូនលោកគ្រូអនុវិទ្យាល័យ«សេរីភាព» ក្រុងតាខ្មៅ កាលពីថ្ងៃទី៤ កុម្ភៈ ឆ្នាំ២០១៨ ខណៈពេលដែលនាងនៅប្រទេសជប៉ុន ព្រមទាំងទៅចុះសំបុត្រអាពាហ៍ពិពាហ៍បានទៀត ។
តាមស្ត្រីជាប្រពន្ធមុនអោយដឹងទៀតថា នៅខែវិច្ឆិកា ឆ្នាំ២០១៨ នៅពេលដែលនាងត្រឡប់មកពីប្រទេសជប៉ុនវិញ បានដឹងរឿងដែលប្តីបានទៅលួចរៀបការប្រពន្ធថ្មី តែហួសពេលទៅហើយ នាងបានទាក់ទង់ ឱ្យប្តីចូលខ្លួនមកផ្តិតមេដៃលែងលះគ្នា តែប្តីគេចរហូត និងមិនទទួលស្គាល់ចិញ្ចឹមកូន២នាក់ ហើយនាងក៏បានស្វែងរកលោកប្តី និងតាមទៅរកផ្ទះប្រពន្ធក្រោយទៀត ។
តាមព័ត៌មានឱ្យដឹងថា នៅព្រឹកតាមរកប្តីឃើញនោះ ពួកគេឈ្លោះប្រកែកគ្នាជាខ្លាំងនៅផ្ទះប្រពន្ធក្រោយ ហើយក៏បាននាំគ្នាទៅសាលាសង្កាត់កំពង់សំណាញ់ ដើម្បីចង់ដឹងថា ហេតុអ្វីបានជាលោកចៅសង្កាត់ចេញប័ណ្ណប្រកាសឱ្យប្តីអាចរៀបការនិងផ្តិតមេដៃលែងលះគ្នាបាន ។
លោកចៅសង្កាត់កំពង់សំណាញ់បានឱ្យដឹងវិញថា មូលហេតុដែលលោកចេញប័ណ្ណប្រកាសឱ្យឈ្មោះស៊ីវ ឥន្ទរ៉ា និងឈ្មោះឃ្លោក វាសនា រៀបការនេះ គឺដោយសំអាងលើលិខិតបញ្ជាក់ពីចៅសង្កាត់ក្រគរថាឈ្មោះស៊ីវ ឥន្ទរ៉ា ជាពោះម៉ាយ ។ លោកចៅសង្កាត់បញ្ជាក់ថា នេះជាកំហុសលោកចៅសង្កាត់ក្រគរ ដែលខាងប្រុស មិនមានសាលក្រមក៏ហ៊ានបញ្ជាក់ថា ឈ្មោះស៊ីវ ឥន្ទរ៉ា ជាបុរសពោះម៉ាយ ។
បន្ទាប់ពីមានការសម្របសម្រួលគ្នា និងមានការណែនាំពីចៅសង្កាត់ ពួកគេទាំង២នាក់ ក៏បានឯកភាពលែងលះ និងបាននាំគ្នាទៅសាលាឃុំកោះមិត្ត ស្រុកកំពង់សៀម ដើម្បីផ្តិតមេដៃលែងលះ តែពុំត្រូវលោកមេឃុំធ្វើឱ្យដោយណែនាំឱ្យពួកគេប្តឹងប្តល់នៅតុលាការ ដើម្បីផ្តាច់សង្វាស ។
ចែករំលែកព័តមាននេះ