កុំថាឡើយត្រឹមតែសម្បត្តិមនុស្ស សូម្បីទេវតា ព្រះឥន្ទ្រ ព្រះព្រហ្ម ក៏ព្រះសង្ឃមិនអាចលើដៃទៅថ្វាយបង្គំ ឬសំពះបានឡើយ បើភិក្ខុអង្គណាបំពានទៅនឹងវិន័យ ភិក្ខុអង្គនោះនឹងត្រូវអាបត្តិទៅតាមផ្លូវវិន័យជាក់ជាមិនខាន ។
បើតាមវិនយប្បញ្ញត្តិ ព្រះសង្ឃសំពះគ្រហស្ថមិនបានដាច់ខាត មានទោស ឬត្រូវអាបត្តិ តែទោសនោះមិនធ្ងន់ធ្ងររហូតទាញសាមីសង្ឃអ្នកសំពះឱ្យដាច់ចាកភេទជាអ្នកបួសនោះទេ កាលបើត្រូវហើយលោកអាចសម្តែងអាបត្តិនៅចំពោះមុខសង្ឃឱ្យដាច់ស្រឡះបាន ។
មានពាក្យចោទសួរថា ហេតុអ្វីបានជាព្រះសង្ឃមិនអាចលើកហត្ថាសំពះគ្រហស្ថបាន?
ព្រះសង្ឃជាឧត្តមភេទ ភេទខ្ពង់ខ្ពស់ ភេទឧត្តុង្គឧត្តម ភេទប្រសើរថ្លៃថ្លា ជាទីគោរពបូជានៃមនុស្ស និងទេវតាទាំងឡាយ ដូច្នេះព្រះសង្ឃមិនអាចលើកដៃទៅសំពះគ្រហស្ថជាហីនភេទ(ភេទតូចទាប)បានទេ ។ បើភិក្ខុអង្គណាប្រព្រឹត្តបំពាននឹងពុទ្ធវិន័យ ប្រាកដជាមានទោស ហើយត្រូវសម្តែងចេញនៅចំពោះមុខសង្ឃទើបរួចពីទោសកំហុសនោះ តែបើមិនបានសម្តែងអាបត្តិចេញទេ ទោសនេះនឹងតាមជាប់កាយរហូត ដូចស្រមោលអន្ទោលតាមប្រាណ បូកនឹងទោសតូចៗប្រចាំថ្ងៃបន្តែមជាប់ជានិច្ចទៀត អាចវិវឌ្ឍទៅជាទោសធំបាន ។
ជារួមមកក្រៅអំពីព្រះបរមសាស្តា ឬព្រះសង្ឃដូចគ្នាតែចាស់វស្សាជាង ដែលហៅថា វន្ទិយបុគ្គល បុគ្គលគួរថ្វាយបង្គំ ក្រៅពីនេះព្រះសង្ឃមិនអាចថ្វាយបង្គំបានឡើយ ភិក្ខុអង្គណាប្រព្រឹត្តបំពានទៅនឹងពុទ្ធប្បញ្ញត្តិ ភិក្ខុអង្គនោះនឹងត្រូវអាបត្តិ ។
ចែករំលែកព័តមាននេះ