ខេត្តប៉ៃលិន ៖ ប្រជាពលរដ្ឋខ្មែរជាប់ខ្សែស្រឡាយចិនទូទាំងខេត្តប៉ៃលិនបាននាំគ្នាយ៉ាងគគ្រឹកគគ្រេងរៀបចំពិធីឡើងអ្នកតាចិនដែលកម្មវិធីនេះបានធ្វើឡើង កាលពីវេលាព្រឹកថ្ងៃទី១៩ ខែកុម្ភៈ ឆ្នាំ២០១៩ ស្ថិតនៅក្នុងភូមិវត្ត សង្កាត់ប៉ៃលិន ក្រុងប៉ៃលិន ។
ប្រភពព័ត៌មានពីបុរសវ័យចំណាស់ម្នាក់ឈ្មោះ គី ជឺ អាយុ៦៧ឆ្នាំ តំណាងឱ្យសមាគមខ្មែរ-ចិន បានឱ្យដឹងថា ខាងគណៈកម្មាការសមាគមរៀបចំកម្មវិធីឡើងអ្នកតាចិនឈ្មោះ លីម ប៉ិស៊ាង ដែលកើតមានជាយូរមកហើយ នៅលើទឹកដីខេត្តប៉ៃលិន ។ នៅពេលនេះក៏ដូចជា រៀងរាល់ឆ្នាំដែរខាងលោកតែងតែនាំសមាជិកសមាជិកាធ្វើពិធីនេះក្នុងគោលបំណងសុំសេចក្តីសុខ រកស៊ីមានបានត្រជាក់ត្រជុំ ចម្រុងចម្រើនរស់នៅសុខសាន្តជួបជុំក្រុមគ្រួសារ ។
ប្រភពបន្តទៀតថា សមាជិកទាំងអស់បាននាំគ្នាយកគ្រឿងសំណែនដូចជា ជ្រូកខ្វៃ មាន់ខ្វៃ ទាខ្វៃ សាច់ជ្រូកស្រស់ ព្រមទាំងគ្រឿងឧបភោគបរិភោគផ្សេងៗទៅសែននៅក្នុងកន្លែងរោងអ្នកតាចិនជាប់ជើងភ្នំយ៉ាត ហើយអ្នកខ្លះបានដាក់សាច់ជ្រូកសែន ក្នុងមាត់រូបសំណាកសត្វខ្លា គឺដើម្បីឱ្យសត្វនេះកំចាត់គ្រោះកាច និងឧបទ្រុបចង្រៃដែលបម្រុងនឹងកើតមានដល់ក្រុមគ្រួសាររបស់សមាជិកម្នាក់ៗផងដែរ ។ បន្ទាប់ពីធ្វើការសែនព្រេនចប់ក៏មានការដេញថ្លៃសាច់ជ្រូក ដើម្បីយកថវិកាទាំងនោះទៅទ្រទ្រង់សមាគម ដោយធ្វើការកសាងកន្លែងបញ្ចុះសពខ្មោច និងយកទៅកសាងសាលារៀនជាដើមដោយអ្នកខ្លះហ៊ានដេញថ្លៃក្បាលជ្រូក សាច់ជ្រូក រហូតដល់៤ទៅ៥លានរៀលឯណោះ ព្រោះគេយល់ឃើញថា ការដេញថ្លៃយកទៅធ្វើម្ហូបទទួលទានក្នុងក្រុមគ្រួសារអ្នកតាចិននឹងជួយឱ្យរកស៊ីកាន់តែកាក់កប មានការចម្រុងចម្រើនដល់គ្រួសារថែមទៀត ។
លើសពីនេះគេសង្កេតឃើញគណកម្មាការ និងសមាជិកម្នាក់ៗមានការសស្រាក់សស្រាំក្នុងការដុតធូបដុតក្រដាសប្រាក់សែនព្រេន ព្រមទាំងបួងសួងសុំអ្វីៗ ដែលគេចង់បានពីអ្នកតា រួចនាំគ្នាដុតផាវ ដើម្បីបណ្តេញគ្រោះកាចចង្រៃឆ្នាំចាស់ចេញ ហើយបួងសួងឱ្យមានលាភ និងហេងចូលមកក្នុងគ្រួសាររបស់ពួកគេ ។ ម្យ៉ាងវិញទៀតថវិកាដែលប្រមូលបានពីសមាជិកទាំងអស់ខាងសមាគមក៏បានយកទៅចែកជូនដល់ប្រជាពលរដ្ឋក្រីក្រ ហើយនៅឆ្នាំនេះខាងលោកក៏អំពាវនាវដល់សប្បុរសជនក្នុងខេត្តក៏ដូចជាទូទាំងប្រទេសឱ្យនៅតែបន្តគាំទ្រង និងផ្តល់ជាមូលនិធិ ដើម្បីឱ្យសមាគមខ្មែរចិនរីកចម្រើនទៅមុខជារៀងរហូតផងដែរ ៕
ចែករំលែកព័តមាននេះ