រាជធានីភ្នំពេញ ៖ លី ភា មកពីក្លិបសំរោងកោងកីឡាខេត្តបាត់ដំបង និងសុខ សាវិន មកពីក្លិបឆ្មាសសែនសុខគុនខ្មែរ នៅតែបន្តបាត់បង់៣ពិន្ទុបន្ទាប់ពីប្រកួតចាញ់កីឡាករថៃជាលើកទី២ក្នុងវគ្គសន្សំពិន្ទុដណ្ដើមពានរង្វាន់អន្តរជាតិនៅលើសង្វៀនទូរទស្សន៍ស៊ីអិនស៊ី កាលពីរសៀលថ្ងៃអាទិត្យ…
រាជធានីភ្នំពេញ ៖ លី ភា មកពីក្លិបសំរោងកោងកីឡាខេត្តបាត់ដំបង និងសុខ សាវិន មកពីក្លិបឆ្មាសសែនសុខគុនខ្មែរ នៅតែបន្តបាត់បង់៣ពិន្ទុបន្ទាប់ពីប្រកួតចាញ់កីឡាករថៃជាលើកទី២ក្នុងវគ្គសន្សំពិន្ទុដណ្ដើមពានរង្វាន់អន្តរជាតិនៅលើសង្វៀនទូរទស្សន៍ស៊ីអិនស៊ី កាលពីរសៀលថ្ងៃអាទិត្យ ទី១៧ កុម្ភៈ កន្លងមកនេះ។
ការប្រកួតលើកនេះ លី ភា ចាញ់ពិន្ទុកីឡាករថៃPhit Thakyayuth ចំណែកឯសុខ សាវិន ត្រូវកីឡាករថៃToun Pe វាយឱ្យបោះបង់ ការប្រកួតនៅត្រឹមទឹកទី៣ ។ កីឡាករកម្ពុជា ទាំង២រូបនេះនៅសល់២ប្រកួតម្នាក់ទៀត ដូច្នេះបើសិនជាការប្រកួតលើកក្រោយចាញ់ទៀតនោះ ប្រហែលជាអស់ផ្លូវអ៊ុតហើយ ។
ក្នុងចំណោមកីឡាករកម្ពុជាទាំង៤រូប មានតែឃីម បូរ៉ា មកពីក្លិបរស្មីភូមិគាបខេត្តបន្ទាយមានជ័យម្នាក់ប៉ុណ្ណោះ ដែលគេមានជំនឿចិត្តច្រើនក្នុងការស្វែងរកកៅអីឡើងទៅប្រកួតនៅវគ្គបន្តទៀតបាន ទោះបីជាគេទើបតែប្រកួតបាន១លើក និងមាន៣ពិន្ទុនៅក្នុងដៃក៏ដោយ ។ រីឯសួន ចាន់នីមកពីក្លិបបក្សីស្លាបដែកក៏មិនសូវមានសង្ឃឹមប៉ុន្មានដែរ ទោះបីគេទើបតែប្រកួតបាន១លើក និងរកបាន៣ពិន្ទុដូចគ្នាក្តី ។
តាមការឱ្យដឹងពីមន្ត្រីគណៈកម្មការរៀបចំការប្រកួតថា កីឡាករថៃទាំង៤រូបដែលមកប្រកួតក្នុងកម្មវិធីកំពូលអ្នកប្រយុទ្ធកណ្ដាប់ដៃដែកវគ្គ៤នេះ សុទ្ធតែខ្លាំងៗទាំងអស់ធ្វើឱ្យមានការបារម្ភ មិនដឹងថាកីឡាករកម្ពុជាប៉ុន្មាននាក់ទេ ដែលបានឡើងទៅកាន់វគ្គបន្តនោះ។
ចំណែកគូប្រកួតមិត្តភាពនៅក្នុងសប្ដាហ៍នេះ កីឡាករ ឈុត សេរីវ៉ាន់ថង ម្ចាស់ជើងឯកកំពូលអ្នកប្រយុទ្ធកណ្ដាប់ដៃដែកវគ្គ៣ បានយកឈ្នះកីឡាករថៃKhum Phayakដោយពិន្ទុ ។ កីឡាករ កំពែង ខ្មៅ មកពីក្លិបអេភូថងកីឡាបានយកឈ្នះកីឡាករ ខាំ វណ្ណៈ មកពីក្លិបរ៉ាហាប់ស្វាយប៉ាកដោយពិន្ទុ និងកីឡាករ រឿង សារិទ្ធ មកពីក្លិបមកុដរាជសីហ៍ យកឈ្នះ កីឡាករ ផាន់ សុផាត មកពីក្លិបពុទ្ធសេរីវង្សពោធិសែនជ័យដោយពិន្ទុ៕
ចែករំលែកព័តមាននេះ