អ្នកនិពន្ធ ប្រេ វីន
ផលប្រយោជន៍រួចពន្ធដែលកម្ពុជាទទួលបានពីគម្រោងអ្វីៗទាំងអស់ លើកលែងអាវុធដែលហៅកាត់ថាEBA កំពុងស្ថិតនៅក្នុងលទ្ធភាពនៃការបាត់បង់ បើសិនជាកម្ពុជាខកខាន មិនធ្វើតាមការចង់បានរបស់សហភាពអឺរ៉ុប។
វាឈានមកដល់ដំណាក់កាលនេះ ក៏ព្រោះតែសហភាពអឺរ៉ុបនិងកម្ពុជា មានការចង់បានផ្ទុយគ្នា។ សហភាពអឺរ៉ុបយល់ថា កម្ពុជាបានដើរចេញពីគន្លងប្រជាធិបតេយ្យ ប៉ុន្តែការលូកដៃរបស់សហភាពអឺរ៉ុបត្រូវបានកម្ពុជាយល់ថា នឹងធ្វើអោយប៉ះពាល់ដល់អធិបតេយ្យភាពរបស់កម្ពុជាទៅវិញ ។
ដូច្នេះ ដើម្បីដោះស្រាយបញ្ហានេះ គេត្រូវរកច្រកចេញមួយ ដែលអាចធ្វើអោយកម្ពុជាស្ថិតនៅលើផ្លូវប្រជាធិបតេយ្យដ៏ត្រឹមត្រូវហើយទន្ទឹមនោះ អធិបតេយ្យភាពរបស់កម្ពុជាមិនត្រូវបានរំលោភ ។
សហភាពអឹរ៉ុបគំរាមដកកម្ពុជាចេញពីគម្រោងនេះ ជាបណ្តោះអាសន្នពីព្រោះតែអ្វីដែលពួកគេយល់ថាដំណើរថយក្រោយនៃលទ្ធិប្រជាធិបតេយ្យនៅកម្ពុជា ។ ចំណាត់ការមួយចំនួនរបស់រដ្ឋាភិបាលកម្ពុជា ដែលឈានទៅរកការបាត់សារព័ត៌មានមួយចំនួន ការចាប់និងឃុំខ្លួន លោកកឹម សុខា និងការរំលាយចោលគណបក្សសង្គ្រោះជាតិ គឺជាសកម្មភាព ដែលបានធ្វើអោយសេរីភាពនៃការបញ្ចេញមតិ និងលទ្ធិប្រជាធិបតេយ្យនៅកម្ពុជា មានការធ្លាក់ចុះដល់កម្រិតមួយ ដែលពួកគេមិនអាចទទួលយកបាន ។
ប៉ុន្តែសម្រាប់រដ្ឋាភិបាលវិញ បានចាត់ទុកថា ចំណាត់ការទាំងនោះ គឺដោយសារតែមានការប្រព្រឹត្តខុសច្បាប់ និងមានការប៉ុនប៉ងចង់ផ្តួលរំលំរដ្ឋាភិបាលដែលស្របច្បាប់ ។ ភាគីទាំងពីរមានហេតុផលខុសគ្នាទៅលើការសម្រេចចិត្តរបស់ខ្លួនរៀងៗខ្លួន ។
សហភាពអឺរ៉ុប ក៏បានទាមទារអោយរដ្ឋាភិបាលកម្ពុជា មានវិធានការមួយចំនួន ដើម្បីធ្វើយ៉ាងណាអោយដំណើរការប្រជាធិបតេយ្យនៅកម្ពុជា រស់រវើកឡើងវិញ ។ សហភាពអឺរ៉ុបបានទាមទារ ជាពិេសសអោយមានការដោះលែងលោកកឹម សុខា ដែលកំពុងស្ថិតក្រោមការឃុំខ្លួន ។
រហូតមកទល់ពេលនេះ ការទាមទារទាំងនោះ មិនទាន់អាចសម្រេចបានឡើយ ។ ការទាមទាររបស់សហភាពអឺរ៉ុបត្រូវបានគេយល់ថា មានចរិតនយោបាយនៅក្នុងនោះហើយវាមិនអាចដោះស្រាយបានឡើយក្រៅពីការចរចាផ្នែកនយោបាយ ។
តាមពិតទៅសហភាពអឺរ៉ុប្រហែលនឹងអាចស្ងប់ចិត្តបាន បើសិនជាអ្នកនយោបាយកម្ពុជា អាចរកវិធីចរចាគ្នា ដើម្បីធ្វើយ៉ាងណាអោយអ្នកនយោបាយទាំងខាងគណបក្សកាន់អំណាច និងខាងប្រឆាំង អាចធ្វើសកម្មភាពនយោបាយបានយ៉ាងសេរីតាមលទ្ធិប្រជាធិបតេយ្យ ។
បច្ចុប្បន្ន អ្នកនយោបាយប្រឆាំង ពិសេស លោក សម រង្ស៊ី បានធ្វើយុទ្ធនាការមួយដែលបង្ហាញថា កម្ពុជាបានលែងជាប្រទេសប្រជាធិបតេយ្យទៀតហើយ លោកអាចទាក់ទាញការគាំទ្រមួយចំនួននៅខាងក្រៅប្រទេសឱ្យមានការជឿបែបនេះ ។
បើទោះបីជាមានការខ្វែងគំនិតគ្នាខ្លាំង រវាងរដ្ឋាភិបាលនិងគណបក្សកាន់អំណាច ដែលដឹកនាំដោយសម្តេចតេជោ ហ៊ុន សែន ជាមួយក្រុមប្រឆាំង ពិសេសលោកសម រង្ស៊ី ក្តី ស្ថានភាពប្រហែលជាទាមទារអោយភាគីទាំងសងខាងដើរថយក្រោយម្នាក់មួយជំហាន ដើម្បីបើកផ្លូវចរចាដើម្បីស្វែងរកដំណោះស្រាយដ៏ល្អមួយក្នុងគោលបំណងស្តារលទ្ធិប្រជាធិបតេយ្យនៅកម្ពុជា និងដើម្បីថែរក្សាការលើកលែងពន្ធពីសហភាពអឺរ៉ុបផងដែរ។
អាស្រ័យដូច្នេះ បើសិនជាភាគីទាំងពីរយល់ថា វាចាំបាច់ត្រូវធ្វើយ៉ាងណា កុំអោយកម្ពុជាបាត់បង់ការលើកលែងពន្ធរបស់សហភាពអឺរ៉ុបនោះ វាសំខាន់ណាស់ ដែលត្រូវបើកផ្លូវចរចាមួយ ។
ការចរចានោះ ត្រូវមានគោលដៅរួមមួយដោយផ្តោតលើផលប្រយោជន៍កម្មករ ប្រជាជន និងប្រទេសជាតិជាធំ ។
ការមិនជួបគ្នាចរចា គឺជាការបិទផ្លូវសម្រាប់ការរកដំណោះស្រាយហើយនឹងធ្វើអោយកម្ពុជា ចៀសមិនរួចពីការបាត់បង់ការរលើកលែងពន្ធពីសហភាពអឺរ៉ុប ។ ការបាត់បង់នោះ នឹងធ្វើអោយកម្ពុជាខាតបង់ច្រើន
ពិេសសកម្មករ ។
តាមអ្នកជំនាញក្នុងវិស័យកាត់ដេរម្នាក់ ដែលសុំមិនបញ្ចេញឈ្មោះបានប៉ាន់ប្រមាណថា កម្មករប្រមាណ
ជា២០ភាគរយ ក្នុងចំណោមកម្មករប្រមាណជិតមួយលាននាក់ អាចនឹងត្រូវបាត់បង់ការងារ ដោយសារតែរោងចក្រមួយចំនួន អាចនឹងបិទទ្វារដោយសារតែពួគេមិនអាចរកស៊ីចំណេញ ហើយគេនឹងងាកទៅបើករោងចក្រនៅប្រទេសផ្សេង ដែលផ្តល់ផលចំណេញដល់ពួកគេ ។
ដូចដែលយើងដឹងស្រាប់ថា សហភាពអឺរ៉ុប គឺជាទីផ្សារធំបំផុតនៃវិស័យកាត់ដេរសម្លៀកបំពាក់ និងស្បែកជើង ដែលនាំចេញពីប្រទេសកម្ពុជា ។ ដោយពិចារណា ទៅលើសារសំខាន់ខ្លាំង សម្រាប់សេដ្ឋកិច្ចកម្ពុជា និងកម្មករនោះ ការចរចារវាងអ្នកនយោបាយ និងអ្នកនយោបាយ គឺជាដំណោះស្រាយតែមួយគត់ ។
នៅពេលដែលដំណោះស្រាយនយោបាយមួយ ត្រូវបានធ្វើឡើងដោយមានការសុខកាយសុខចិត្តទាំងគណបក្សកាន់អំណាច និងអ្នកនយោបាយប្រឆាំងនោះ វាអាចនឹងអូសទាញអោយសហភាពអឺរ៉ុបជឿបានថា កម្ពុជាវិលត្រឡប់ទៅរកភាពធម្មតាវិញនៃដំណើរការប្រជាធិបតេយ្យ ។
នៅពេលនោះ ពួកគេនឹងអាចរក្សាផលប្រយោជន៍នៃការរួចពន្ឋនៅក្នុងគម្រោង EBA សម្រាប់កម្ពុជាត
ទៅទៀត ហើយប្រទេសកម្ពុជាកម្មករ និងប្រជាជនកម្ពុជា នឹងទទួលបានផលប្រយោជន៍សេដ្ឋកិច្ចតទៅទៀត ៕
ចែករំលែកព័តមាននេះ