រាជធានីភ្នំពេញ ៖ ចាប់ពីខែមេសា ឆ្នាំ២០២៩ខាងមុខនោះតទៅប្រទេសជប៉ុននឹងបើកទីផ្សារទទួលពលករពីប្រទេសកម្ពុជា និងបណ្តាប្រទេសនានាជាដៃគូរ ដើម្បីបម្រើការងារនៅក្នុង ប្រទេសខ្លួន ។
នេះបើតាមការឲ្យដឹងពីរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ។ លោកអ៊ិតសំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈបានដឹងក្រោយជំនួបជាមួយលោកលោក HORINOUCHI HIDEHISA ឯកអគ្គរាជទូតជប៉ុន នាព្រឹកថ្ងៃទី១៨ ខែកុម្ភៈ នាទីស្តីការក្រសួងខាងលោកទូតជប៉ុនមកលើ ដើម្បីជូនដំណឹងផ្លូវការអំពីប្រព័ន្ធថ្មីរបស់ជប៉ុនក្នុងការទទួលពលករកម្ពុជាឲ្យទៅធ្វើការនៅជប៉ុនជាលក្ខណៈពលករពេញសិទ្ធិមិនមែនជាកម្មសិក្សាការីដូចមុនទៀតទេ ។
ភាគីជប៉ុនស្វាគមន៍លោករដ្ឋមន្ត្រីទៅជប៉ុននាសប្ដាហ៍ ទី៣ ខែមិនា ដើម្បីចុះកិច្ចព្រមព្រៀងអនុវត្តន៍ប្រព័ន្ធថ្មីនេះ ។ ប្រព័ន្ធថ្មីនេះត្រូវអនុវត្តន៍ចាប់ពីខែមេសា ឆ្នាំ២០១៩តទៅ ។ លោករដ្ឋមន្ត្រីអ៊ិត សំហេង ក៏បានលើកឡើងថា ក្នុងជំនួបក៏បានលើកឡើងពីការបញ្ជូនពលករដែលមានជំនាញខ្ពស់ទៅធ្វើការនៅក្នុងប្រទេសជប៉ុនតាមកំណែទម្រង់ច្បាប់ថ្មីរបស់ជប៉ុន ។ លោកបញ្ជាក់ថា «នេះជាឱកាសថ្មីមួយដែលជប៉ុនបើកទូលាយក្នុងការទទួលយកពលករពេញសិទ្ធិពីកម្ពុជាក៏ដូចជា ពីបណ្តាប្រទេសជាដៃគូនានា ដើម្បីទៅធ្វើការនៅប្រទេសជប៉ុន» ។
លោករដ្ឋមន្ត្រីក៏បានបន្ថែមថា ការធ្វើច្បាប់ថ្មីរបស់ជប៉ុននេះក៏ដើម្បីបំពេញតម្រូវការដែលកំពុងខ្វះខាត់កម្លាំងពលកម្មនៅក្នុងប្រទេសដែរ ។ ជាងនេះការចុះកិច្ចព្រមព្រៀងនេះក៏ជាឱកាសសម្រាប់ប្រទេសកម្ពុជា និងបណ្តាប្រទេសនានាក្នុងការបញ្ចូនពលករក្នុងការទទួលបានការ ងារក៏ដូចជា ហ្វឹកហ្វឺនជំនាញវិជ្ជាជីវៈដែលមានកម្រិតខ្ពស់នៅក្នុងប្រព័ន្ធការងារនៅក្នុងឧស្សាហកម្មនៅប្រទេសជប៉ុនផងដែរ ។ លោករដ្ឋមន្ត្រីបានបញ្ជាក់ថា «ខ្ញុំគិតថានេះជាឱកាសថ្មីមួយហើយក៏ជាកិច្ចសហប្រតិបត្តិការឡើងមួយកម្រិតទៀតរវាងរដ្ឋាភិបាលកម្ពុជា-ជប៉ុន» ។
លោកបន្ថែមទៀតថា ដើម្បីអនុវត្តន៍កិច្ចការនេះភាគីជប៉ុនបានលើកឡើងពីប្រព័ន្ធថ្មីនេះនឹងចាប់អនុវត្តន៍ចាប់ពីខែមេសា ឆ្នាំ២០១៩តទៅ ខណៈដែលកន្លងមកប្រទេសទាំងពីរបានធ្វើការជាមួយគ្នា ដើម្បីរៀបចំអនុស្សារណៈនៃកិច្ចសហប្រតិបត្តិការជាមួយគ្នាទាក់ទងនឹងការជ្រើសរើសបណ្តុះបណ្តាល និងបញ្ជូនពលករទៅប្រទេសជប៉ុន ។ លោករដ្ឋមន្ត្រីបានលើកឡើងចំពោះពលករទៅធ្វើការនៅក្នុងប្រទេសជប៉ុន បន្ទាប់ពីចុះកិច្ចព្រមព្រៀងទៅ គឺស្ថិតក្នុងកម្រិតជាពលករជំនាញមិនដូចមុនទេ គឺជាកម្មសិក្សាការី ។
កម្មសិក្សាការីខុសពីពលករ គឺកម្មសិក្សាការីទទួលបានប្រាក់ខែតាមកម្មសិក្សាការី ចំណែកពលករវិញទទួលបានប្រាក់ខែខ្ពស់ជាងកម្មសិក្សាការី ។ ជាងពលករត្រូវចេះភាសាជប៉ុន និងជំនាញផងដែរ ។ គិតត្រឹមខែធ្នូ ឆ្នាំ២០១៨កម្ពុជាបានបញ្ជូនកម្មសិក្សាការីសរុបជាង០៩ពាន់នាក់ទៅធ្វើកម្មសិក្សា និងធ្វើការនៅប្រទេសជប៉ុន ដោយពលករម្នាក់ៗទទួលបានប្រាក់ឈ្នួលជាមធ្យមប្រមាណ១,៥០០ដុល្លារសហរដ្ឋអាមេរិកក្នុងមួយខែ ៕
ចែករំលែកព័តមាននេះ