ខេត្តកំពង់ឆ្នាំង ៖ ច្បាស់ណាស់ដីអធិការដ្ឋានស្រុកជលគិរី គឺពិតជាត្រូវបានពុះឡូតិ៍លក់ពិតមែន ក្នុងចំនួនទឹកប្រាក់ប្រមាណជាង២២ម៉ឺនដុល្លារ និងដីជាប់របងខាងក្រោយរបស់អធិការដ្ឋាននគរបាលបានជាង១ម៉ឺនដុល្លារ នេះជាប្រភពព័ត៌មានថ្មីទៀត បន្ទាប់ពីរដ្ឋបាលសាលាស្រុកជលគីរី បានសេចក្តីបំភ្លឺថា គ្មានការលក់ដូរដីអធិការដ្ឋាននគរបាលស្រុកជលគីរីនោះទេ ហើយការផ្សាយរបស់សារព័ត៌មាន ជាព័ត៌មានបំភ្លើសគ្មានការពិត ។
ប្រភពព័ត៌មានដែលទទួលបានពីប្រជាពលរដ្ឋនៅស្រុកជលគីរីបានឱ្យដឹងថា ដីនៅខាងក្រោយអធិការដ្ឋានបានកាត់លក់ឱ្យប្រជាពលរដ្ឋ ដែលមានកន្ទុយផ្ទះជាប់របស់អធិការដ្ឋាន មានចំនួន ១០គ្រួសារ ក្នុងចំនួនទឹកប្រាក់សារុប ១៦៤០០ដុល្លារ ដោយក្នុងនោះផ្ទះខ្លះត្រឹម៣៥០ដុល្លារ ខ្លះ៥០០ដុល្លារ ចំណែកផ្ទះដែលច្រើនជាងគេ ៣៥០០ដុល្លារ ។
ចំណែកដីនៅខាងក្នុងអធិការដ្ឋានវិញ មួយប្លង់មានក្បាល៥ម៉ែត្រ បណ្តោយ២០ម៉ែត្រ មានតម្លៃ៨៥០០ដុល្លារ មានប្រជាពលរដ្ឋចំនួន១៣គ្រួសារបានទិញ និងបង់អស់ហើយ តាមរយៈលេខកុងធនាគារ អេស៊ីលីដា ដោយក្នុងនោះមានអ្នកទិញត្រឹមមួយប្លង់ចំនួន៤គ្រួសារ អ្នកទិញ២ប្លង់ ថ្លៃ១៧០០០ដុល្លារ ចំនួន៧គ្រួសារ និងអ្នកទិញ៤ប្លង់ ថ្លៃ៣៤០០០ដុល្លារ ចំនួន២គ្រួសារ (សុំមិនបញ្ចេញឈ្មោះ អ្នកទិញទាំងនោះទេ) ។
ប្រជាពលរដ្ឋម្នាក់ដែលសុំមិនបញ្ចេញឈ្មោះបានប្រាប់ថា ដីអធិការដ្ឋាននគរបាលស្រុកជលគីរី ពិតជាមានការលក់ដូរមែន គាត់ទិញ២ប្លង់ ថ្លៃ១៧០០០ដុល្លារ គឺលុយបង់នៅធនាគារ អេស៊ីលីដា តាមលេខកូដដែលគេឱ្យ ។
ព័ត៌មានពិស្តារដែលជឿជាក់នឹងមានផ្សាយនៅកាសែតកោះសន្តិភាព
ចែករំលែកព័តមាននេះ