តាមប្រភពពីOddity Central បានឱ្យដឹងថា ទីក្រុង២នៅរុស្ស៊ីបានបង្កការភ្ញាក់ផ្អើលដល់មហាជន ដោយសារតែព្រិលគ្របដណ្តប់លើផ្ទៃដី ក្លាយទៅជាពណ៌ខ្មៅ ដូចធ្យូងកាលពីដើមសប្តាហ៍នេះ ។
រូបភាពនិងវីឌីអូជាច្រើន បានបង្ហោះនៅលើបណ្តាញសង្គម ដែលបានបង្ហាញពីទិដ្ឋភាពនៅក្នុងទីក្រុង Kiselevsk និង Prokopyevsk ក្នុងតំបន់ Kuzbass របស់ប្រទេសរុស្ស៊ី។ វាមានទីតាំងនៅជិតកន្លែងជីកធ្យូងថ្ម។ ព្រិលទាំងមូលលើផ្ទៃដីបានគ្របដណ្តប់ដោយសារកម្ទេចធូលីធ្យូង ដែលធ្វើឱ្យវាមានពណ៌ខ្មៅ។
ប្រជាជនមានការភ័យខ្លាចនិងព្រួយបារម្ភយ៉ាងខ្លាំង ចំពោះខ្យល់ដកដង្ហើមរបស់ពួកគេនាពេលសព្វថ្ងៃ ក្រោយពីបានឃើញទិដ្ឋភាពនេះ។ មានប្រជាជនជាច្រើននាក់បានបង្ហោះរូបភាព ដើម្បីដាក់សម្ពាធលើអាជ្ញាធរ តែខាងថ្នាក់លើបានលើកឡើងថា វាគឺជាបញ្ហាស្មុគស្មាញ។
លោក Andrey Panov អភិបាលរងតំបន់ Kemerovo សម្រាប់ឧស្សាហកម្មដឹកជញ្ជូននិងបរិស្ថាន បានប្រាប់ក្រុមអ្នកសារព័ត៌មានថា នេះគឺដោយសារតែប្រព័ន្ធហ្គាសប្រើប្រាស់តាមផ្ទះ គឺត្រូវបានផលិតឡើងដោយការដុតធ្យូងថ្ម។ ចំពោះខ្យល់ចេញពីយានយន្តក៏ចូលរួមក្នុងបញ្ហានេះដែរ។
តាមពាក្យបកស្រាយរបស់ម្ចាស់កន្លែងជីកធ្យូងថ្ម Prokopievskaya លោក Anatoly Volkov បានលើកឡើងថា ក្រុមហ៊ុនរបស់លោកសុទ្ធតែប្រើប្រាស់បំពង់ផ្សែងពិសេស ដែលអាចការពារប្រជាជនតំបន់នោះពីសារធាតុពុល។
គួរបញ្ជាក់ផងដែរថា ក្រុមអ្នកស៊ើបអង្កេតមកពីភ្នាក់ងារបរិស្ថានរុស្ស៊ី បានចែកគ្នាទៅធ្វើការជាមួយនឹងក្រុមហ៊ុនជីកធ្យូងថ្មពីរកន្លែង ដើម្បីបន្តការស៊ើបតាមដាន និង ប្រជុំពិភាក្សាពីបញ្ហាបរិស្ថានដែលត្រូវដោះស្រាយ៕
ចែករំលែកព័តមាននេះ