ខេត្តបន្ទាយមានជ័យ ៖ មន្ត្រីជាន់ខ្ពស់ម៉ាឡេស៊ីថា ជនជាតិម៉ាឡេស៊ីចំនួន៤៧នាក់ដែលត្រូវចាប់ខ្លួនជាជនរងគ្រោះ ត្រូវបានដោះលែង និងបញ្ជូនតាមជើងយន្តហោះសៀមរាបទៅម៉ាឡេស៊ីវិញកាលពីថ្ងៃទី១៧ ខែកុម្ភៈ ឆ្នាំ២០១៩។ លោក ឧស្មាន…
ខេត្តបន្ទាយមានជ័យ ៖ មន្ត្រីជាន់ខ្ពស់ម៉ាឡេស៊ីថា ជនជាតិម៉ាឡេស៊ីចំនួន៤៧នាក់ដែលត្រូវចាប់ខ្លួនជាជនរងគ្រោះ ត្រូវបានដោះលែង និងបញ្ជូនតាមជើងយន្តហោះសៀមរាបទៅម៉ាឡេស៊ីវិញកាលពីថ្ងៃទី១៧ ខែកុម្ភៈ ឆ្នាំ២០១៩។
លោក ឧស្មាន ហាស្សាន់ ទេសរដ្ឋមន្ត្រីទទួលបន្ទុកបេសកកម្មពិសេសប្រាប់កាលពីថ្ងៃទី១៦ ខែកុម្ភៈ ឆ្នាំ២០១៩ ថា ជនជាតិម៉ាឡេស៊ីចំនួន៤៧នាក់ ក្នុងនោះមានស្រី១០នាក់នេះ ត្រូវបានកម្លាំងសមត្ថកិច្ចឃាត់ខ្លួនកាលពីថ្ងៃទី១១ ខែធ្នូ ឆ្នាំ២០១៨ ចំនួន២កន្លែងដាច់ដោយឡែកពីគ្នា ក្នុងនោះមួយកន្លែងឃាត់ខ្លួនចំនួន២០នាក់ (ស្រី៣នាក់) ក្នុងករណីបើកល្បែងអនឡាញខុសច្បាប់ ស្ថិតភូមិសាមគ្គីមានជ័យ សង្កាត់ប៉ោយប៉ែត ក្រុងប៉ោយប៉ែត និងមួយកន្លែងទៀតឃាត់ខ្លួនចំនួន២៧នាក់ (ស្រី៧នាក់) ស្ថិតភូមិព្រៃព្រិច សង្កាត់ប៉ោយប៉ែត ក្រុងប៉ោយប៉ែត។
លោកបានបញ្ជាក់ថា ក្រោយពីមានការសម្របសម្រួលការងារពីលោកស្រី ស្រ៊ីហ្វាទីណាស់ អាប់ឌូឡាស់ រដ្ឋមន្ត្រីសុខុមាលភាពសង្គមជីវភាពសហគមន៍គ្រួសារស្ត្រីនិងកុមារម៉ាឡេស៊ី និងលោក រ៉ូហ្សានី ណូកាម៉ាត់ ភារីធារីស្ថានទូតម៉ាឡេស៊ីប្រចាំកម្ពុជារួមជាមួយក្រុមការងារម៉ាឡេស៊ី ហើយសាលាដំបូងខេត្តបន្ទាយមានជ័យ និងពន្ធនាគារខេត្តបានដោះលែងជនជាតិម៉ាឡេស៊ីចំនួន៤៧នាក់ (ស្រី១០នាក់) អោយនៅក្រៅឃុំបណ្តោះអាសន្ន ហើយត្រៀមបញ្ជូនតាមជើងយន្តហោះនៅខេត្តសៀមរាបនាថ្ងៃទី១៧ ខែកុម្ភៈ ឆ្នាំ២០១៩ ធ្វើមាតុភូមិនិវត្តន៍ទៅប្រទេសម៉ាឡេស៊ីវិញ។
លោកស្រី ស្រ៊ីហ្វាទីណាស់ អាប់ឌូឡាស់ រដ្ឋមន្ត្រីសុខុមាលភាពសង្គមជីវភាពសហគមន៍គ្រួសារស្ត្រីនិងកុមារម៉ាឡេស៊ីបានបញ្ជាក់ថា ជនជាតិម៉ាឡេស៊ីចំនួន៤៧នាក់ (ស្រី១០នាក់)ដែលត្រូវកម្លាំងសមត្ថកិច្ចកម្ពុជាឃាត់ខ្លួននៅក្រុងប៉ោយប៉ែតគឺជាជនរងគ្រោះដោយចាញ់បោកធ្វើការជាបុគ្គលិកបើកល្បែងអនឡាញល្មើសច្បាប់ ដោយមានការសម្របសម្រួលពីអយ្យការអមសាលាដំបូងខេត្តបន្ទាយមានជ័យ បានសម្រេចដោះលែងអោយនៅក្រៅឃុំបណ្តោះអាសន្ន(តាមដីកាបង្គាប់អោយដោះលែងលេខ៥០ ដ.ល.ឆ ចុះថ្ងៃទី១៥ ខែកុម្ភៈ ឆ្នាំ២០១៩ដោយចៅក្រម ញឹម ពិសាល ដោយដីកានេះបញ្ជាក់ថា ជនជាតិម៉ាឡេស៊ីចំនួន៤៧នាក់ស្រី១០នាក់នេះចោទប្រកាន់ពីបទឆបោកបើកបោនល្បែងស៊ីសង កាន់កាប់ល្បែងស៊ីសង ចាត់ចែងល្បែងស៊ីសងដែលប្រព្រឹត្តនៅសង្កាត់ប៉ោយប៉ែត ក្រុងប៉ោយប៉ែត ៕
ចែករំលែកព័តមាននេះ