ខេត្តបាត់ដំបង ៖ កម្លាំងកងរាជអាវុធហត្ថបានឃាត់ខ្លួនក្រុមជួញដូរគ្រឿងញៀនមួយសំបុក នៅវេលាម៉ោង៩យប់ថ្ងៃទី១៨ កុម្ភៈ ខណ:ពួកគេសំងំនៅក្នុងបន្ទប់ជួលមួយកន្លែង ស្ថិតនៅភូមិកម្មករ សង្កាត់ស្វាយប៉ោ ក្រុងបាត់ដំបង ថែមទាំងដកហូតបានវត្ថុតាងមួយចំនួនផងដែរ ។
បើតាមកម្លាំងអាវុធហត្ថបានឲ្យដឹងថា ជនសង្ស័យដែលត្រូវឃាត់ខ្លួនមានចំនួន៧នាក់ ក្នុងនោះមានស្រីម្នាក់ផង មាន១-ឈ្មោះអន បញ្ញា ភេទប្រុស អាយុ២៣ឆ្នាំ រស់នៅភូមិកំពង់ក្របី សង្កាត់ស្វាយប៉ោ ២-ឈ្មោះ រី ស៊ីណេត ភេទស្រី អាយុ១៩ឆ្នាំ ជាបុគ្គលិកខារ៉ាអូខេ រស់នៅភូមិអូរវែង ឃុំគារ ស្រុកមោងប្ញស្សី ៣-ឈ្មោះឃុន ប៊ុនរ៉ុង ភេទប្រុស អាយុ១៧ឆ្នាំ រស់នៅភូមិអូរចារ សង្កាត់អូរចា ៤-ឈ្មោះ យ៉ែម បូធិន ភេទប្រុសអាយុ២០ឆ្នាំ រស់នៅភូមិ១៣មករា សង្កាត់ព្រែកព្រះស្តេច ៥-ឈ្មោះ ព្រំ សុផាតតាណា ភេទប្រុស អាយុ១៦ឆ្នាំ នៅភូមិកំពង់ឆ្លង ឃុំឈើទាល ស្រុកបាណន់ ៦-ឈ្មោះ គង់ សំណាង ភេទប្រុស អាយុ១៧ឆ្នាំ រស់នៅ
ភូមិព្រែកមហាទេព សង្កាត់ស្វាយប៉ោ និង៧-ឈ្មោះ តាក់ ចន្ថា ភេទប្រុស អាយុ១៨ឆ្នាំ រស់នៅភូមិអញ្ចាញ សង្កាត់អូរចារ។
ដោយឡែក វត្ថុតាងដែលដកហូតមាន ១-សារធាតុញៀនប្រភេទគ្រាប់ (WY) ពណ៌ផ្កាឈូកចំនួន៤០គ្រាប់ ២-សារធាតុញៀនប្រភេទម្សៅក្រាម ពណ៌.សរឹងថ្លា (ទឹកកក)១កញ្ចប់ មានទម្ងន់០.៧០ក្រាម, ៣.កាបិតសាមូរ៉ៃ៣ដើម ៤-ម៉ូតូ២គ្រឿង ៥-ទូរស័ព្ទ៣គ្រឿង និង៦-សម្ភារសម្រាប់ជក់គ្រឿងញៀនមួយចំនួន ។
ក្រុមប្រព្រឹត្តបទល្មើសគ្រឿងញៀនប្រុស-ស្រីទាំង៧នាក់នេះ ត្រូវបានកម្លាំងកងរាជអាវុធហត្ថក្រុងបាត់ដំបង ចុះបង្ក្រាបពេលពួកគេកំពុងប្រមូលផ្ដុំគ្នានៅក្នុងបន្ទប់ជួល ។ បើតាមសមត្ថកិច្ចថា ក្រុមនេះជាមុខសញ្ញាប្រព្រឹត្តគ្រឿងញៀនផង ហើយក៏ជាមុខសញ្ញាប្រព្រឹត្តអំពើចោរកម្មផ្សេងៗ នាពេលកន្លងមកផងដែរ។ ពេលនេះ មន្ត្រីជំនាញកំពុងសួរនាំពួកគេដើម្បីកសាងសំណុំរឿងចាត់ការតាមនីតិវិធីហើយ៕
ចែករំលែកព័តមាននេះ