សហរដ្ឋអាមេរិក-ជប៉ុន ៖ សារព័ត៌មានជប៉ុនរាយការណ៍កាលពីថ្ងៃទី១៧កុម្ភៈថា នាយករដ្ឋមន្ត្រីជប៉ុនលោកស៊ីនហ្សូអាបេ ជាអ្នកជ្រើសរើសលោកដូណាល់ត្រាំ សម្រាប់ទទួលពានរង្វាន់ណូបែលសន្តិភាព កាលពីរដូវស្លឹកឈើជ្រុះកន្លងទៅ តាមសំណើរបស់រដ្ឋការអាមេរិក។ ព័ត៌មានទាំងនេះលេចចេញបន្ទាប់ពីសេចក្ដីថ្លែងការណ៍ របស់ប្រធានាធិបតីអាមេរិក…
សហរដ្ឋអាមេរិក-ជប៉ុន ៖ សារព័ត៌មានជប៉ុនរាយការណ៍កាលពីថ្ងៃទី១៧កុម្ភៈថា នាយករដ្ឋមន្ត្រីជប៉ុនលោកស៊ីនហ្សូអាបេ ជាអ្នកជ្រើសរើសលោកដូណាល់ត្រាំ សម្រាប់ទទួលពានរង្វាន់ណូបែលសន្តិភាព កាលពីរដូវស្លឹកឈើជ្រុះកន្លងទៅ តាមសំណើរបស់រដ្ឋការអាមេរិក។
ព័ត៌មានទាំងនេះលេចចេញបន្ទាប់ពីសេចក្ដីថ្លែងការណ៍ របស់ប្រធានាធិបតីអាមេរិក ដែលអះអាងកាលពីថ្ងៃទី១៥កុម្ភៈថា លោកស៊ីនហ្សូអាបេបានប្រគល់ជូនលោក នូវសារលិខិតមួយច្បាប់មាន៥ទំព័រ ពីការជ្រើសរើសរូបលោក សម្រាប់ទទួលពានរង្វាន់ណូបែលសន្តិភាព ព្រោះតែលោកបានបើកការចរចា ហើយសម្រាលភាពតានតឹងជាមួយកូរ៉េខាងជើង។
យោងតាមកាសែតអាសាហ៊ី ដែលដកស្រង់ប្រភពនានារបស់រដ្ឋាភិបាលថា រដ្ឋការអាមេរិកបានស្នើដល់លោកអាបេ កាលពីខែមិថុនាកន្លងទៅ ក្រោយការជួបគ្នាកំពូលលើកទីមួយរវាងលោកត្រាំនិងលោកគីមជុងអ៊ុននៅសិង្ហបុរី។
អ្នកនាំពាក្យម្នាក់របស់ក្រសួងការបរទេសជប៉ុន និយាយថា បានដឹងពីសេចក្ដីថ្លែងការណ៍របស់លោកត្រាំ ប៉ុន្តែមិនធ្វើអត្ថាធិប្បាយពីការទាក់ទងគ្នារវាងមេដឹកនាំទាំង២ឡើយ។
សេតវិមានមិនបានឆ្លើយនឹងសំនួរពីរឿងនោះរបស់រ៉យទ័រឡើយ។ យោងតាមវេបសាយរបស់មូលនិធិណូបែលថា បេក្ខភាពសម្រាប់ទទួលពានរង្វាន់ អាចដាក់ដោយគ្រប់មនុស្សទាំងអស់ ឲ្យតែការជ្រើសរើសបេក្ខភាពនោះ វាសមស្របទៅតាមលក្ខណៈវិនិច្ឆ័យ ក្នុងនោះក៏រួមមានបេក្ខជនជាប្រមុខរដ្ឋកំពុងកាន់អំណាចផងដែរ៕
ចែករំលែកព័តមាននេះ