ខេត្តបន្ទាយមានជ័យ ៖ បុរស៤នាក់ក្នុងចំណោម១៤នាក់ ត្រូវបាននគរបាលស្រុកភ្នំស្រុក សហការជាមួយមន្ត្រីអភិរក្សសត្វព្រៃតំបន់កូនខ្លែង ចាប់ឃាត់ខ្លួននាំមកកាន់អធិការដ្ឋាននគរបាលស្រុកភ្នំស្រុក ពីបទនាំគ្នាដេញវាយសម្លាប់សត្វរមាំងមួយក្បាលកាលពីថ្ងៃទី១៩ ខែមីនា ឆ្នាំ២០១១ នៅតំបន់កូនខ្លែង ស្ថិតក្នុងឃុំប៉ោយចារ ស្រុកភ្នំស្រុក ។
លោកវរសេនីយ៍ត្រីរឿង បូរ អធិការនគរបាលស្រុកភ្នំស្រុកបានឱ្យដឹងថា បុរសទាំង៤នាក់នោះ១-ឈ្មោះវ៉ន សាយ អាយុ២៦ឆ្នាំ ២-ឈ្មោះយ៉ាន់ ខ្លី អាយុ១៨ឆ្នាំ ៣-ឈ្មោះសាក់ វាសនា អាយុ២៨ឆ្នាំ និង៤-ឈ្មោះប្រុញ ឈិន អាយុ២១ឆ្នាំ ពួកគេរស់នៅក្នុងភូមិស្រះស្រង់ ឃុំប៉ោយចារ ស្រុកភ្នំស្រុក ខេត្តបន្ទាយមានជ័យ ។ ចំពោះសត្វរមាំង ដែលត្រូវជនទាំង៤នាក់ រួមទាំងបក្សពួក១០នាក់ទៀតវាយសម្លាប់នេះមានទម្ងន់ប្រហែល៦០គីឡូក្រាម ។
លោកលុក រិទ្ធី ហៅអិត ប្រធានគ្រប់គ្រងអភិរក្សសត្វព្រៃធម្មជាតិ បានឱ្យដឹងថា ការគ្រប់គ្រងអភិរក្សសត្វព្រៃនៅតំបន់កូនខ្លែង (អាងត្រពាំងថ្ម)នេះ បានដំណើរការតាំងពីឆ្នាំ២០០០ ដោយមានការគាំទ្រពីរាជរដ្ឋាភិបាលកម្ពុជា និងមានការចូលរួមការពារដោយក្រសួងកសិកម្ម ព្រមទាំងអង្គការការពារធនធានធម្មជាតិ។ ម្យ៉ាងទៀតនៅតំបន់នេះមានអាងទឹកត្រពាំងថ្មដែលជារមណីយដ្ឋានធម្មជាតិមួយយ៉ាងសំខាន់ មានហ្វូងសត្វគ្រប់ប្រភេទដែលជិតដាច់ពូជ រួមទាំងសត្វរមាំងដែលជាសត្វកម្របានមករស់នៅតំបន់នេះដែរ។ បច្ចុប្បន្ន សត្វរមាំងមានការកើនឡើងដល់ទៅ៧០ក្បាលហើយ ហើយក៏មានភ្ញៀវជាតិ-អន្តរជាតិ ចូលមកទស្សនាធ្វើឱ្យប្រជាពលរដ្ឋក្នុងសហគមន៍តំបន់នេះមានការអភិវឌ្ឍន៍ និងទទួលបានផលប្រយោជន៍ពីសត្វព្រៃនេះផងដែរ ។ ជាមួយគ្នានេះ លោកលុក រិទ្ធី ក៏បានសំណូមពរនិងអំពាវនាវដល់ប្រជាពលរដ្ឋទាំងអស់ដែលរស់នៅជុំវិញតំបន់អភិរក្សសត្វព្រៃនេះ សូមចូលរួមការពារធនធានធម្មជាតិដែលយើងមានស្រាប់ ទប់ស្កាត់ការបាញ់សម្លាប់ឬដាក់អន្ទាក់ ឬក៏វាយសម្លាប់សត្វព្រៃទាំងនេះ ។ បើចាំតែសមត្ថកិច្ចឬក៏មន្ត្រីអភិរក្សការពារនោះវាមិនគ្រប់គ្រាន់ទេ លុះត្រាតែមានប្រជាពលរដ្ឋក្នុងសហគមន៍ចូលរួមការពារទាំងអស់គ្នាទើបវានៅគង់វង្ស ។
លោកវរសេនីយ៍ត្រីរឿង បូរ បញ្ជាក់ថា ជនទាំង៤នាក់ សមត្ថកិច្ចគ្រាន់តែធ្វើការអប់រំឱ្យពួកគេយល់ពីអត្ថប្រយោជន៍នៃសត្វព្រៃ រួចឱ្យធ្វើកិច្ចសន្យាបញ្ឈប់មិនឱ្យគេប្រព្រឹត្តជាលើកទី២ ឡើយ បើមិនរាងចាលទេសមត្ថកិច្ចនឹងអនុវត្តតាមច្បាប់ ហើយក៏សុំឱ្យពួកគេជួយផ្សព្វផ្សាយដល់ប្រជាពលរដ្ឋក្នុងសហគមន៍របស់ពួកគេឱ្យបានយល់ជ្រួតជ្រាបផង ៕
ចែករំលែកព័តមាននេះ