រាជធានីភ្នំពេញ៖ កញ្ញាស៊ូ ស៊ីរីកា ចៅរបស់អ្នកស្រីកែវ មន្ថា អតីតតារាសម្តែង និងចម្រៀងបានកសាងជីវិតជាអ្នកចម្រៀងដែរ ហើយលូតលាស់ក្នុងអាជីពនេះជាបន្តបន្ទាប់ ។ ព្រោះតែមានទឹកដមសំឡេងពីរោះស៊ូ ស៊ីរីកា ត្រូវជនរួមជាតិនៅអាមេរិកទាក់ទងឲ្យទៅច្រៀងធ្វើឲ្យនាងរីករាយចំពោះឱកាសនេះ ។
ស៊ូ ស៊ីរីកា ធ្លាប់ប្រកាសជំហរចង់រសាត់ចេញពីវិថីសិល្បៈកាលពីប៉ុន្មានខែមុន ព្រោះតែមិនអាចបន្តឲ្យអ្នកសិល្បៈមួយចំនួនតូចប៉ែងជើងនាង ។ ក្រោយពេលមានការលើកទឹកចិត្តស៊ូ ស៊ីរីកា ដែលស្នងអាជីពសិល្បៈពីវង្សត្រកូលនៅតែបន្តចូលសម្តែងដោយប្រមូលអារម្មណ៍ឲ្យបានល្អឡើងវិញ ជាមួយបណ្តាបទចម្រៀងមួយចំនួនដែលមាននៅក្នុងផលិតកម្មថោន ។
ក្នុងជំនួបជាមួយអ្នកសារព័ត៌មានកោះសន្តិភាពនាឱកាសថតបទចម្រៀងចូលឆ្នាំប្រចាំផលិតកម្មថោនកាលពីពេល ថ្មីៗកន្លងមកនៅវត្តកៀនស្វាយក្នុងខេត្តកណ្តាលកញ្ញាស៊ូ ស៊ីរីកា ឲ្យដឹងថានាងកំពុងតែមមាញឹកខ្លាំងជាមួយសិល្បៈក្រោយពេលដែលអ្នកគាំទ្រលើកទឹកចិត្តឲ្យចូលប្រឡូកសិល្បៈកុំគិតពីមនុស្សមើលងាយខ្លួន ។ ជាក់ស្តែងឆ្នាំនេះអាជីពនាងមានភាពប្រសើរឡើង ដោយសារបទចម្រៀងបានចេញលើទីផ្សារច្រើន ហើយបទចម្រៀងចង្វាក់រាំកម្សាន្តចូលឆ្នាំថ្មីមាន៥បទ រួមជាមួយតារាចម្រៀងលំដាប់ជួរមុខនៅផលិតកម្មថោន គឺនាងច្រៀងជាមួយលោកខេម និងលោកម៉ៅ ហាជី ។
កញ្ញាស៊ូ ស៊ីរីកា និយាយថា«នាងខ្ញុំសប្បាយចិត្តពេលប៉ះការច្រៀងជាមួយតារាចម្រៀងខេមព្រោះមិនដែលក្លាយជាដៃគូនោះឡើយ ទើបគិតថានោះជាពិន្ទុល្អមួយសម្រាប់នាងខ្ញុំ ។ បើជាមួយលោកម៉ៅ ហាជី គឺធ្លាប់សម្តែងជាមួយគ្នា និងច្រៀងបទបញ្ចូលជាមួយគ្នានៅផលិតកម្មថោនផងដែរ ។
នាចុងខែកុម្ភៈនេះក៏ជាដំណើរមួយល្អប្រសើរទៀតដោយសារតែនាងខ្ញុំបានវីសា ចេញទៅសម្តែងនៅសហរដ្ឋអាមេរិកជាមួយរៀមច្បងតារាចម្រៀងម្នាក់ក្រោមការរៀបចំពីអង្គការអាយឃែលើកទី១»។
ដំណើរទៅអាមេរិករយៈពេលច្រើនសប្តាហ៍នេះ ស៊ូ ស៊ីរីកា នឹងត្រឡប់មកមាតុភូមិវិញនាចុងខែមេសា ឬដើមខែឧសភា ។ ទៅអាមេរិកនាងត្រៀមបទចម្រៀងមរតកដើមចង្វាក់ប្រពៃណីខែ្មរសម្រាប់បម្រើអារម្មណ៍ជនរួមជាតិខ្មែរនៅទីនេោះកម្សាន្តសប្បាយ ។
តារាចម្រៀងស៊ូ ស៊ីរីកា និយាយថា«នាងខ្ញុំទៅអាមេរិកគឺដើម្បីសម្តែង ដោយមិនគិតលើរឿងស្នេហាជាមួយបុរសនៅទីនោះទេ ជាសំខាន់បើមានគេតាមស្រឡាញ់អាចចូលតាមច្បាប់ ចេញអត្តចរិតមកប្រកបដោយសុជីវធម៌ត្រឹមត្រូវនោះទើបគិត ។ យ៉ាងណាក្តីនាងខ្ញុំប្រហែលជាមិនទាន់ផ្តោតឡើយព្រោះទើបតែមានវ័យ២០ស្តើងខ្លាចលំបាក ទាន់ការងារសិល្បៈដើរ យើងស្រូតរកលុយឲ្យច្រើនសិនចាំគូស្រករមើលតាមក្រោយ»៕
ចែករំលែកព័តមាននេះ