ខេត្តព្រះវិហារ ៖ ប្រជាសហគមន៍កសិកម្មចំនួន៨ដែលបានចុះកិច្ចសន្យាដាំដំណាំដំឡូងមីសរីរាង្គលក់ឲ្យក្រុមហ៊ុន អេមរុ រាសយ៍ សប្បាយរីករាយយ៉ាងខ្លាំង បន្ទាប់ពីពួកគាត់បានដាំដំណាំប្រភេទនេះដែលមិនប្រើប្រាស់សារធាតុគីមី ឬជីគីមី ដើម្បីលក់ជូនក្រុមហ៊ុនតាមកិច្ចសន្យាទទួលបានតម្លៃថ្លៃ ។ ជាមួយគ្នានេះមន្ទីរជំនាញបានអះអាងថា នៅក្នុងរដូវវស្សាឆ្នាំ២០១៩ខាងមុខនេះ មន្ទីរ នឹងបន្តជម្រុញឲ្យសហគមន៍កសិកម្មដទៃទៀតនៅខេត្តព្រះវិហារ ចាប់យកការដាំដំឡូងមីសរីរាង្គមួយប្រភេទទៀត ក្រៅពីការផ្គត់ផ្គង់លក់ស្រូវសរីរាង្គ តាមរយៈអនុវត្តកសិកម្មតាមកិច្ចសន្យាលក់ជូនក្រុមហ៊ុនឲ្យបានច្រើន ។
លោក ដៀប ចន ប្រធានក្រុមប្រឹក្សាភិបាល សហគមន៍កសិកម្មលើកកម្ពស់កសិករ បានសម្តែងនូវការរីករាយ បន្ទាប់ពីប្រជាសហគមន៍ទាំងអស់ដែលបានចុះកិច្ចសន្យាដាំដំឡូងមីសរីរាង្គលក់ជូនក្រុមហ៊ុនទទួលបានទិន្នផល និងតម្លៃថ្លៃ ធ្វើឲ្យកសិករមានទឹកចិត្ត ក្នុងការផលិតដំណាំនេះបន្តទៀត ។
លោកថា កន្លងទៅ កសិករដាំដំឡូងមីសរីរាង្គនេះក៏ពិតមែន តែពុំធ្លាប់បានអនុវត្តការទិញលក់តាមកិច្ចសន្យានោះទេ ទើបតែពេលនេះ ក្រុមហ៊ុនបានចូលមកប្រមូលទិញដោយអនុវត្តកសិកម្មតាមកិច្ចសន្យា ធ្វើឲ្យតម្លៃកសិផលទទួលបាន ថ្លៃ និងមានតម្លៃស្ថិតស្ថេរ ដោយក្នុងមួយគីឡូក្រាមទទួលបានតម្លៃ៣៦៨រៀល សម្រាប់ដំឡូងមីសរីរាង្គស្រស់ និងទទួលបានគុណភាពល្អសម្រាប់ឆ្នាំនេះ ។ លោកបន្ថែមថា ក្នុងឆ្នាំ២០១៩នេះ លោកនឹងកៀងគរសមាជិកសហគមន៍ឲ្យបានច្រើនដើម្បីបង្កើនផ្ទៃដីដាំដុះដំណាំដំឡូងមីសរីរាង្គនេះឲ្យកាន់តែច្រើនលក់ជូនក្រុមហ៊ុនបន្ថែមទៀត ។
លោក ពឹង ទ្រីដា ប្រធានមន្ទីរកសិកម្ម រុក្ខាប្រមាញ់ និងនេសាទខេត្តព្រះវិហារ បានលើកឡើងថា គិតមកដល់បច្ចុប្បន្ននេះ សហគមន៍កសិកម្មចំនួន៨ នៅខេត្តព្រះវិហារ កំពុងមមាញឹកប្រមូលផលដំឡូងមីសរីរាង្គគ្មានជាតិគីមីលក់ជូនក្រុមហ៊ុន អេមរុ រាយស៍ តាមកិច្ចសន្យាកាលពីរដូវវស្សាឆ្នាំ២០១៨កន្លងទៅនេះ លើបរិមាណជាង១ម៉ឺនតោន មានប្រជាកសិករជាង៥០០គ្រួសារ ។ លោកថា ការ អនុវត្តកសិកម្ម តាមកិច្ចសន្យាបែបនេះ មានសារប្រយោជន៍ណាស់ចំពោះកសិករ ដោយធានាបាននូវតម្លៃទីផ្សារខ្ពស់ជាង ឈ្មួញកណ្តាលដើរប្រមូលទិញបច្ចុប្បន្ន ម្យ៉ាងវិញទៀត កសិករមិនព្រួយបារម្ភ នឹងការធ្លាក់ថ្លៃ កសិផលឡើយ បើទោះបីជាទីផ្សារខាងក្រៅធ្លាក់ក៏ដោយនោះ ។
លោកបន្ថែមទៀតថា កសិករដែលបានចុះកិច្ចសន្យាលក់ជូនក្រុមហ៊ុន មានភាពចំណេញច្រើន ដោយក្នុង១តោន ក្រុមហ៊ុនគិតឲ្យ១០០០គីឡូក្រាម ខុសពីឈ្មួញដើរប្រមូលទិញខាងក្រៅ ក្នុង១តោន គិតឲ្យកសិករត្រឹមតែជាង៨០០គីឡូក្រាម ទៅ៩០០គីឡូក្រាមប៉ុណ្ណោះ ។
តែទោះជាបែបនេះក្តី លោកថា នៅក្នុងរដូវវស្សាឆ្នាំ២០១៩ខាងមុខនេះ មន្ទីរជំនាញនឹងបង្កើនការកៀងគរសហគមន៍កសិកម្មដទៃទៀតដែលមានសក្តានុពលធ្វើការចុះកិច្ចសន្យាផលិតដំឡូងមីសរីរាង្គមួយប្រភេទទៀត លក់ជូនក្រុមហ៊ុន ក្រៅពីស្រូវសរីរាង្គ ដើម្បីបង្កើន ប្រាក់ចំណូលបន្ថែមទៀតសម្រាប់ប្រជាសហគមន៍កសិកម្មទាំងអស់ឲ្យមានភាពធូរធារ ។
យោងតាមរបាយការណ៍របស់ មន្ទីរកសិកម្ម រុក្ខាប្រមាញ់ និងនេសាទខេត្តព្រះវិហារ គិតមកត្រឹមពាក់កណ្តាលខែកុម្ភៈ ឆ្នាំ២០១៩នេះ សហគមន៍កសិកម្មទាំង៨ដែលបានចុះកិច្ចសន្យាលក់ដំឡូងមីសរីរាង្គជូនក្រុមហ៊ុន ប្រមូលផលលក់បានប្រមាណ១០%ហើយ ក្នុងផ្ទៃដីជិត៨០០ហិតា លក់ជូនក្រុមហ៊ុន លើបរិមាណដំឡូងមីជាង១ម៉ឺនតោន ៕
ចែករំលែកព័តមាននេះ