ប្រទេសថៃ ៖ យោងតាមសារព័ត៌មាន Bangkok Post បានឲ្យដឹងកាលពីថ្ងៃសៅរ៍ កម្លងមកថា ក្រុមតំណាងអតិថិជនក្នុងប្រទេសថៃបានសន្យាថា នឹងបង្កើតយុទ្ធនាការបង្ខំដល់គណៈកម្មាធិការជាតិឲ្យហាមឃាត់ការប្រើធាតុគីមីបីប្រភេទភ្លាមៗ ។
ក្រុមទាំង៦៨៦បានសហការគ្នាក្រោមបណ្តាញផ្តល់សេចក្តីព្រមានពីថ្នាំសម្លាប់សត្វល្អិតថៃ (Thai-PAN) ដែលរួមមានវេជ្ជបណ្ឌិតមកពីក្រសួងសុខភាពសាធារណៈ និងមន្ទីរពេទ្យរដ្ឋផ្សេងៗផងដែរ ដែលទាមទារឲ្យមានការហាមមិនឲ្យប្រើថ្នាំ Paraquat, Glyphosate, និង Chlorpyrifos ជាដើម ។
កាលពីថ្ងៃសុក្រ បណ្តាញខាងលើបានចេញសេចក្តីថ្លែងការណ៍មួយដែលរិះគន់មន្ត្រីផ្នែកកសិកម្មចំនួន៥រូបដែលជាសមាជិកគណៈកម្មធិការថាមើលរំលងសេចក្តីព្រមានពីអ្នកជំនាញនិងអ្នកស្រាវជ្រាវពីគ្រោះថ្នាក់នៃធាតុគីមីទាំងនេះ ជាពិសេស Paraquat ដែលបន្តប៉ះពាល់ដល់ជីវិតកសិករ អតិថិជន និងទារកជារៀងរាល់ឆ្នាំ ។
ការរិះគន់នេះគឺជាការឆ្លើយតបនឹងការសម្រេចចិត្តរបស់គណៈកម្មាធិការជាតិកាលពីថ្ងៃព្រហស្បត្តិ៍ដែលបដិសេធសំណើររបស់ក្រុមតំណាងអតិថិជន អ្នកជំនាញ និងភ្នាក់ងាររដ្ឋដទៃទៀតដូចជាក្រសួងសុខភាពសាធារណ៍ឲ្យហាមឃាត់ការប្រើធាតុគីមីខាងលើ ។
ប៉ុន្តែគណៈកម្មាធិការខាងលើអាចបានត្រឹមតែសន្យាថារឹតបន្តឹងការប្រើប្រាស់ប៉ុណ្ណោះលុះត្រាតែមានវិធីសាស្ត្រផ្សេងអាចជំនួសធាតុគីមីទាំងនេះបាន ហើយអាចនឹងហាមឃាត់ទាំងស្រុងនៅរយៈពេល២ឆ្នាំខាងមុខទៀត ។
បណ្តាញខាងលើបាននិយាយថា សមាជិកភាគច្រើនបានបដិសេធនឹងសំណើរត្រូវទទួលខុសត្រូវលើដំណោះស្រាយដែលលំអៀងទៅក្រុមហ៊ុនលក់ថ្នាំសម្លាប់សត្វល្អិតទាំងនេះ ។
គួរបញ្ជាក់ដែរថា ប្រទេសប្រមាណ ៥០មកហើយបានហាមឃាត់ការប្រើថ្នាំ Paraquat និងដាក់កម្រិតលើការប្រើ Glyphosate និង Chlorpyrifos ។ ប្រទេសចិនដែលជាប្រទេសនាំចេញថ្នាំ Paraquat ធំជាងគេក៏បានប្រកាសថានឹងហាមឃាត់ការប្រើប្រាស់និងការនាំចេញថ្នាំនេះនៅឆ្នាំ២០២០ដែរ ៕
ចែករំលែកព័តមាននេះ