ខេត្តបន្ទាយមានជ័យ ៖ បុរសម្នាក់យកសំណាញ់ទៅបង់ត្រី បណ្តាលឱ្យលង់ទឹកស្ទឹងស្លាប់ បង្កឱ្យមានការភ្ញាក់ផ្អើលកើតឡើងកាលពីវេលាម៉ោង១១និង៤០នាទីព្រឹកថ្ងៃទី១៧ ខែកុម្ភៈ ឆ្នាំ២០១៩ នៅស្ទឹងខាងត្បូងភូមិធ្មេញត្រី ឃុំសំរោង ស្រុកអូរជ្រៅ ខេត្តបន្ទាយមានជ័យ ។
លោកវរសេនីយ៍ទោ សែស វិបុល អធិការនគរបាលស្រុកអូរជ្រៅ បានឲ្យដឹងថា ជនរងគ្រោះដែលស្លាប់ឈ្មោះ សេង បូរិន ភេទប្រុស អាយុ២៦ឆ្នាំ រស់នៅភូមិធ្មេញត្រីសំរោង ស្រុកអូរជ្រៅ ខេត្តបន្ទាយមានជ័យ ។
លោកអធិការបានបញ្ជាក់ថា មុនពេលកើតហេតុ ជនរងគ្រោះបានយកសំណាញ់ទៅបង់ត្រីនៅចំណុចស្ទឹងខាងត្បូងភូមិ សង្ស័យពេលបង់ត្រីរួច ជនរងគ្រោះបានចុះទៅក្នុងទឹក ដើម្បីចាប់ត្រី ពេលនោះជំងឺស្កន់ជ្រូករើឡើង ហើយគ្មានអ្នកដឹង ក៏បណ្តាលឱ្យលង់ទឹកស្លាប់តែម្តង ព្រោះជនរងគ្រោះកើតជំងឺស្កន់ជ្រូកជាប្រចាំ។
ក្រោយពីស្រង់សពយកមកដល់ផ្ទះ សមត្ថកិច្ចបានបង្កើតគណៈកម្មាការត្រួតពិនិត្យសព ដែលមានលោកគ្រូពេទ្យ មណ្ឌលសុខភាពឃុំសំរោង លោកមេឃុំ លោកមេភូមិ និងកំលាំងប៉ុស្តិ៍រដ្នបាល បានបញ្ជាក់ថា ជនរងគ្រោះពិតជាស្លាប់ដោយសារលង់ទឹកប្រាកដមែន ។
ក្រោយពីពិនិត្យរួច សពជនរងគ្រោះត្រូវបានប្រគល់ជូនឪពុកម្តាយដើម្បីយកទៅធ្វើបុណ្យតាមប្រពៃណី៕
ចែករំលែកព័តមាននេះ