រាជធានីភ្នំពេញ ៖ ស្ត្រីម្នាក់ត្រូវបានបុរសជាប្តីចោទថា ហេតុតែចង់បានប្ដីជាមន្ត្រីកងរាជអាវុធហត្ថ បានប្រើល្បិចបោកប្រាស់ខ្លួនថា ឆ្នាំនេះគាត់មានអាយុ៤០ឆ្នាំ គត់ឆ្នាំហើយនាំឲ្យមានគ្រោះថ្នាក់ ដូច្នេះដើម្បីគេចឲ្យរួចផុតពីគ្រោះខាងលើ ទាល់តែយើងលែងលះគ្នាជាការឧបកិច្ចសិនផុតពីនេះ ចាំយកគ្នាវិញ…
រាជធានីភ្នំពេញ ៖ ស្ត្រីម្នាក់ត្រូវបានបុរសជាប្តីចោទថា ហេតុតែចង់បានប្ដីជាមន្ត្រីកងរាជអាវុធហត្ថ បានប្រើល្បិចបោកប្រាស់ខ្លួនថា ឆ្នាំនេះគាត់មានអាយុ៤០ឆ្នាំ គត់ឆ្នាំហើយនាំឲ្យមានគ្រោះថ្នាក់ ដូច្នេះដើម្បីគេចឲ្យរួចផុតពីគ្រោះខាងលើ ទាល់តែយើងលែងលះគ្នាជាការឧបកិច្ចសិនផុតពីនេះ ចាំយកគ្នាវិញ ។ ពេលនោះដោយសារតែភាពឆោតល្ងង់ និងជឿជាក់ទុកចិត្តលើសម្ដីប្រពន្ធ ទើបគាត់ជាប្តីបានយល់ព្រមធ្វើតាម ហើយស្ត្រីជាប្រពន្ធក៏បានឲ្យផ្ដិតមេដៃលើលិខិតលែងលះឧបកិច្ចហើយគាត់ក៏ផ្ដិតតាម ។
លុះក្រោយពេលបានស្នាមមេដៃហើយ ប្រពន្ធបានយកទៅប្ដឹងនៅតុលាការសុំលែងលះមែនទែន រហូតចេញសាលក្រម ទើបនាងប្រពន្ធបានដៃក៏ចាកចេញពីជីវិតគាត់ និងទៅរស់នៅជាមួយប្អូនធម៌ម្នាក់ដែលជាមន្ត្រីកងរាជអាវុធហត្ថ ។ បុរសជាប្តីបាននិយាយថា នៅវេលាល្ងាចថ្ងៃទី១៥ កុម្ភៈ គាត់បានតាមស្វែងរកប្រពន្ធឃើញ កំពុងរស់នៅជាមួយប្អូនធម៌ នៅក្នុងផ្ទះល្វែងមួយកន្លែងស្ថិតនៅក្នុងបុរីសន្តិភាព២ ភូមិដំណាក់ត្រយឹង សង្កាត់ចោមចៅ២ ខណ្ឌពោធិ៍សែនជ័យ ។ លុះព្រឹកឡើងថ្ងៃទី១៦ កុម្ភៈ ទើបគាត់មានប្រតិកម្មបង្កឲ្យមានការភ្ញាក់ផ្អើលឈុលឡើងដល់អាជ្ញាធរនិងនគរបាលសង្កាត់ចោមចៅ២ ធ្វើអន្តរាគមន៍ក្នុងជម្លោះនេះ។
ប្តីបាននិយាយថា គាត់ឈ្មោះ ង៉ែត ផេង អាយុ៣៩ឆ្នាំ មុខរបរអាជីវករលក់ដូរ មានទីលំនៅផ្ទះលេខ៣៨ ភូមិថ្មី សង្កាត់ដង្កោ ខណ្ឌដង្កោ ។ ចំណែកស្ត្រីជាប្រពន្ធ របស់គាត់ឈ្មោះ ឈន វ៉ាន់សុីន អាយុ៣៥ឆ្នាំ ជាអាជីវករលក់ខោអាវ នៅក្នុងផ្សារកាណាឌីយ៉ា មានទីលំនៅក្នុង បុរីសន្តិភាព២ ភូមិតំណាក់ត្រយឹង សង្កាត់ចោមចៅ២ ។ ចំណែកប្តីក្រោយ ជាមន្ត្រីអាវុធហត្ថខណ្ឌដង្កោ មានឈ្មោះ ឈឹម ចាន់ធី អាយុ៣៨ឆ្នាំ ។ ប្ដីក្រោយនេះក៏ជាប្អូនធម៌របស់គាត់និងប្រពន្ធគាត់ដែរ គឺជាមនុស្សរាប់អានគ្នាណាស់ ។
បុរសជាប្តីរូបនេះបានបន្តទៀតថា គាត់និងប្រពន្ធបានរៀបការជាមួយគ្នាច្រើនឆ្នាំកន្លងមកហើយរហូតបង្កើតបានកូនប្រុសស្រីចំនួន៤នាក់នៅក្នុងបន្ទុកគ្រួសារ ។ ក្រោយមកបានស្គាល់រាប់អានគ្នាជាមួយឈ្មោះ ឈន វ៉ាន់ធី ដែលជាមន្ត្រីប៉េអឹមខណ្ឌដង្កោ ។ ការរាប់អាននេះមានសភាពជ្រាលជ្រៅ រហូតឈានដល់យកគ្នាធ្វើជាបងប្អូនធម៌ និងបានស្រឡាញ់គ្នាជាងប្អូនបង្កើតរយៈពេលជាង២ឆ្នាំមកហើយម្យ៉ាងទៀតគាត់មិនបានគិតស្មានដល់ថា ប្អូនធម៌ហ៊ានលូកថ្លើមគាត់បែបនេះសោះឡើយ ។
ប្រភពដដែលបានបន្តថា គាត់មិនបានដឹងថា ប្រពន្ធមានចិត្តផិតក្បត់លួចមានទំនាក់ទំនងស្នេហាជាមួយប្អូនធម៌ទេ ទើបអ្វីៗធ្វើតែតាមប្រពន្ធបង្គាប់ទាំងអស់ ។ ដោយហេតុតែចង់បានប្ដីជាមន្ត្រីកងរាជអាវុធហត្ថ ប្រពន្ធគាត់បានប្រើល្បិចបោកប្រាស់គាត់ដោយប្រាប់ថា«គាត់មានអាយុ៤០ឆ្នាំ ដែលគត់ឆ្នាំហើយនាំឲ្យមានគ្រោះថ្នាក់ ដូច្នេះដើម្បីគេចឲ្យរួចផុតពីគ្រោះខាងលើទាល់តែលែងលះគ្នាជាការឧបកិច្ចសិន ផុតពីឆ្នាំគ្រោះនេះចាំយកគ្នាវិញ» ។
បន្ទាប់មកបានទាមទារឲ្យគាត់ផ្តិតមេដៃ ជាបណ្តោះអាសន្នធ្វើដូចមែនទែន ដោយសារតែជឿទុកចិត្តលើសម្តីប្រពន្ធខ្លាំងពេក ទើបគាត់ព្រមផ្ដិតមេដៃលែងលះបណ្ដោះអាសន្ន ស្រាប់តែប្រពន្ធយកស្នាមមេដៃនោះទៅដាក់ពាក្យប្ដឹងលែងលះដល់តុលាការរហូតដល់តុលាការចេញសាលក្រមលែងលះស្របច្បាប់តែម្ដង គឺលឿនលយហោះដូចព្រួញដោយតុលាការយល់ថា មានការផ្តិតមេដៃព្រមព្រៀងគ្នាហើយមិនចាំបាច់ស៊ើបសួរទេ ។
បុរសនេះបានបន្តថា ពេលនោះហើយដែលគាត់ភ្ញាក់ខ្លួនព្រឺតដឹងថា ចាញ់បោកប្រពន្ធចង់យំក៏យំមិនចេញឡើយ ហើយប្រពន្ធបានដៃបានចុះចោលរូបគាត់ ទៅរស់នៅជាមួយប្អូនធម៌ប៉េអឹមយកគ្នាជាប្ដីប្រពន្ធយ៉ាងរំភើយរហើយប្រាណទៅ ។ ចំណែករូបគាត់ព្រោះតែពិបាកចិត្តពេក បានសម្រេចចិត្តធ្វើអត្តឃាតសម្លាប់ខ្លួនចំនួន៤លើកមកហើយ ប៉ុន្តែមិនបានសម្រេច ។
ក្រោយមកទៀតអតីតប្រពន្ធ បានលួចដកលុយពីកុងធនាគារអស់មួយចំនួនធំ ទើបគាត់តាមរកដើម្បីយកលុយវិញ រហូតដល់វេលាល្ងាចថ្ងៃទី១៥ កុម្ភៈ បានរកឃើញអតីតប្រពន្ធកំពុងនៅជាមួយប្ដីក្រោយ គឺជាប្អូនធម៌គាត់នៅក្នុងផ្ទះល្វែងថ្មីដែលទើបនិងទិញនៅក្នុងបុរីសន្តិភាព២ ។ លុះដល់វេលាព្រឹកថ្ងៃទី១៦ កុម្ភៈ នេះបាននាំគ្នាមកដោះស្រាយ នៅសាលាសង្កាត់ចោមចៅ២ ក៏បណ្ដាលឲ្យមានការឈ្លោះប្រកែកគ្នា ហើយអាជ្ញាធរនិងសមត្ថកិច្ច មិនបានដោះស្រាយឡើយព្រោះរឿងនេះជាដែនសមត្ថកិច្ចតុលាការ ។
ទាក់ទងទៅនិងការចោទប្រកាន់ខាងលើ ត្រូវបានស្ត្រីជាអតីតប្រពន្ធឆ្លើយតបសម្តីចោទប្រកាន់របស់អតីតប្ដីខាងលើនោះថា មិនពិតទេ តាមពិតការលែងលះគ្នា ដោយមានការយល់់ព្រមទាំងសងខាង ហើយតុលាកាបានចេញសាលក្រមលែងលះរួចទៅហើយដែរ ។ ចំណែកលុយនៅធនាគារ នាងមិនដឹងនិងមិនបានលួចឡើយ ។ ចំណែកលោកប្អូនធម៌ ដែលជាមន្ត្រីអាវុធហត្ថ ហើយត្រូវជាប្តីក្រោយរបស់ស្ត្រីខាងលើវិញ បាននិយាយថា ខ្លួនមិនបានលួច ឆក់ ប្លន់ យកប្រពន្ធបងធម៌ទេ ប៉ុន្តែដោយសារតែឃើញបងធម៌ មានសាលក្រមលែងលះគ្នាស្របច្បាប់ពីតុលាការហើយនោះ ទើបខ្លួនហ៊ានទទួល យកបងស្រីធម៌ ធ្វើជាភរិយាបែបនេះតែម្តងទៅ ។
រឿងក្តីនេះ ពិតជាធ្វើឱ្យសាធារណជនមានការភ្ញាក់ផ្អើល និងស្មានមិនដល់ ហើយចោទសួរថា តើការចោទប្រកាន់ពីបុរសជាអតីតប្តីជាការពិត ឬបែបណា ? យ៉ាងណាក៏ដោយ អង្ករបានក្លាយជាបាយរួចទៅហើយដែរ ៕
ចែករំលែកព័តមាននេះ