ខេត្តសៀមរាប ៖ ដើម្បីលើកកម្ពស់តំបន់រមណីយដ្ឋានអង្គរ និងស្របតាមអនុសាសន៍ណែនាំរបស់គណៈកម្មាធិការ ICC-Angkor អាជ្ញាធរជាតិអប្សរា កំពុងឆ្លាក់ផ្ទាំងឈ្មោះប្រាសាទដែលមានទាំងអក្សរខ្មែរ និងអក្សរអង់គ្លេស ធ្វើពីថ្មភក់ប្រមាណ១១៨ផ្ទាំង ហើយគ្រោងនឹងលើកដាក់តាមប្រាសាទនានាក្នុងរមណីយដ្ឋានអង្គរនាពេល ឆាប់ៗខាងមុខនេះ ។
ផ្ទាំងស្លាកឈ្មោះប្រាសាទនេះបង្ហាញជូននូវព័ត៌មាន សំខាន់ៗ មួយចំនួនពាក់ព័ន្ធនឹងប្រាសាទដូចជា ឈ្មោះប្រាសាទ អាយុកាល សាងសង់ប្រាសាទ ទិសច្រកចូល ប្រាសាទ និងអមដោយស្លាកសញ្ញា (Logo) ចំនួន៤គឺ ស្លាកសញ្ញាអាជ្ញាធរជាតិអប្សរានៅចំកណ្តាលខាងលើឈ្មោះប្រាសាទ និងស្លាកសញ្ញា៣ផ្សេងទៀតដែលនៅខាងក្រោមគឺ ស្លាកសញ្ញាយូណេស្កូ ស្លាកសញ្ញាបេតិកភណ្ឌពិភពលោក និងស្លាកសញ្ញាអនុសញ្ញាក្រុងឡាអេឆ្នាំ១៩៥៤ សម្រាប់ការការពារសម្បត្តិវប្បធម៌ក្នុងគ្រាមានជម្លោះប្រដាប់អាវុធ ។
ផ្ទាំងស្លាកសញ្ញាឈ្មោះប្រាសាទ នេះមាន៣ទំហំផ្សេងគ្នា ដោយគិតទៅតាមទីតាំងជាក់ស្តែង នៃច្រកចូលប្រាសាទដែលដំឡើងបាន គឺទំហំធំចំនួន១៦ផ្ទាំង កម្ពស់១.៥០០មីល្លីម៉ែត្រគុណនឹង៩១៤មីល្លីម៉ែត្រ កម្រាស់៤៦៤មីល្លីម៉ែត្រ។ ទំហំមធ្យមចំនួន៥២ផ្ទាំង កម្ពស់១,២០០មីល្លីម៉ែត្រxបណ្ដោយ៧៣១មីល្លីម៉ែត្រxកម្រាស់៣៧១មីល្លីម៉ែត្រ ។ ទំហំតូចចំនួន ៥០ផ្ទាំងកម្ពស់១,០០០មីល្លីម៉ែត្រxបណ្ដោយ៦១៣មីល្លីម៉ែត្រxកម្រាស់៣១១មីល្លីម៉ែត្រ ។
ក្នុងដំណើរពិនិត្យការដ្ឋានធ្វើស្លាកសញ្ញានៅ Artisans Angkor នារសៀលថ្ងៃទី១៤ ខែកុម្ភៈ ឆ្នាំ២០១៩ លោកសុខ សង្វារ អគ្គនាយករងទទួលបន្ទុកនាយកដ្ឋានអភិវឌ្ឍន៍ទេសចរណ៍អង្គរបញ្ជាក់ថា មកដល់ពេលនេះផ្ទាំងស្លាកឈ្មោះរបស់ប្រាសាទដែលបានធ្វើរួចរាល់ហើយមានចំនួនប្រហែល២៥%នៃ ចំនួនផ្ទាំងសរុប ខណៈដែលផ្ទាំងខ្លះទៀតកំពុងស្ថិតនៅក្នុងការឆ្លាក់អក្សរ លាបពណ៌បេតិកភណ្ឌ (ពណ៌ឈាមជ្រូក) និងខ្លះទៀតកំពុងឆ្លាក់ក្បាច់លម្អ ។
ចំនួនផ្ទាំងនេះគឺមិនបានដំឡើងគ្រប់ប្រាសាទទាំងអស់ក្នុងតំបន់រមណីយដ្ឋានអង្គរឡើយ ដោយហេតុថា ប្រាសាទខ្លះនៅជ្រៅក្នុងព្រៃមិនមានទីតាំងដាក់បាន ។ ចំពោះទីតាំងដែលដំឡើងស្លាកឈ្មោះប្រាសាទនេះ ក្រុមការងារ បានគិតទៅចំណុច៣ គឺនៅក្បែរច្រកចូលទស្សនាប្រាសាទ ទីតាំងងាយមើលឃើញរបស់ភ្ញៀវទេសចរ និងទីតាំងដែលមិនប៉ះពាល់ដល់ទិដ្ឋភាពប្រាសាទទាំងមូល ។
អាជ្ញាធរជាតិអប្សរាសង្ឃឹមថា សមិទ្ធផលនេះនឹងជួយផ្ដល់ភាពងាយស្រួល និងបទពិសោធន៍ល្អសម្រាប់ភ្ញៀវទេសចរ ក្នុងការទស្សនាតំបន់អង្គរ ឆ្លើយតបតាមតម្រូវការចាំបាច់របស់ភ្ញៀវទេសចរ លើកតម្លៃប្រាសាទនិងកិត្យានុភាពជាតិ និងទទួលបាននូវព័ត៌មានមួយចំនួន ដែលធ្វើឲ្យដំណើរកម្សាន្ត កាន់តែមានភាពងាយស្រួល និងច្បាស់លាស់បន្ថែមទៀត ៕
ចែករំលែកព័តមាននេះ