សហរដ្ឋអាមេរិក ៖ ប្រធានាធិបតីអាមេរិក លោកដូណាល់ត្រាំបានចុះហត្ថលេខា កាលពីថ្ងៃទី១៥កុម្ភៈ លើការប្រកាសអាសន្នជាតិជានីតិវិធីពិសេស ដើម្បីបានប្រាក់មកចំណាយ ក្នុងការកសាងជញ្ជាំងព្រំដែនជាមួយម៉ិកស៊ិក។ បែបនោះនាំឲ្យមានការតតាំងគ្នាខាងតុលាការជាមួយពួកអ្នកប្រឆាំងលោក។
នៅក្នុងសួនច្បារសេតវិមាន នាឱកាសនៃសន្និសីទសារព័ត៌មានមួយ លោកត្រាំថ្លែងថា គ្រប់គ្នាដឹងហើយថា ជញ្ជាំងព្រំដែនចាប់ពីពេលនេះទៅដំណើរការហើយ។ លោកលើកពីការប្រឆាំងចំពោះការលុកលុយនៃគ្រឿងញៀននិងពួកឧក្រិដ្ឋជន។
ការប្រកាសអាសន្ននោះអាចឲ្យលោកត្រាំ ពុំចាំបាច់ឆ្លងកាត់សភា ដើម្បីឲ្យទទួលបានមូលនិធិសហព័ន្ធ ពិសេសសម្រាប់មន្ទីរប៉ង់តាហ្គោន យកទៅកសាងសំណង់ប្រឆាំងពួកអន្តោប្រវេសន៍លួចលាក់។ សរុបទឹកប្រាក់ចំនួនប្រមាណជា១,៤ពាន់លានដុល្លារ ត្រូវបានសភាសម្រេចផ្ដល់ឲ្យ ហើយបើយោងតាមសេតវិមានថាលោកត្រាំអាចប្រមូលប្រាក់ ប្រមាណជា៨ពាន់លានដុល្លារ សម្រាប់ការកសាងជញ្ជាំងព្រំដែន ដូចការសន្យាជាប់របស់លោក ចាប់តាំងពីយុទ្ធនាការឃោសនាបោះឆ្នោតមក។
បណ្ដាមេដឹកនាំក្រុមប្រឆាំង ក្នុងផ្ទៃគណបក្សប្រជាធិបតេយ្យ ដែលប្រឆាំងនឹងការប្រកាសអាសន្នបែបនោះ បានបរិហារភ្លាមៗការផ្ដួចផ្ដើមគំនិតនេះ ដែលពួកគេថាផ្ទុយនឹងរដ្ឋធម្មនុញ្ញ ហើយវាយតម្លៃទៀតថា ដំណើរការនោះរបស់ប្រធានាធិបតី ជាការប្រព្រឹត្តផ្ទុយ គោលការណ៍នៃការបែងចែងអំណាច។ លោកស្រីNANCY PELOSI ប្រធានសភានិងលោកCHUCK SCHUMER ប្រធានក្រុមព្រឹទ្ធសមាជិកនៃគណបក្សប្រជាធិបតេយ្យអះអាងថា ការប្រកាសដោយខុសច្បាប់របស់ប្រធានាធិបតី នាំឲ្យមានវិបត្តិមួយដែលពុំធ្លាប់មាន ហើយវាជាការរំលោភបំពាន លើរដ្ឋធម្មនុញ្ញរបស់យើង នឹងនាំឲ្យអាមេរិកលែងសូវមានភាពប្រាកដប្រជា៕
ចែករំលែកព័តមាននេះ