ខេត្តបន្ទាយមានជ័យ ៖ ក្មេងប្រុសស្រីចំនួន៦នាក់បាននាំគ្នាទៅងូតទឹកអាងពង្រ បណ្តាលឱ្យក្មេងស្រី២នាក់លង់ទឹកស្លាប់ ចំណែកក្មេងប្រុសស្រីចំនួន៤នាក់ផ្សេងទៀតត្រូវបានគេជួយសង្គ្រោះទាន់ ។ ហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោង១១និង៣០នាទីព្រឹកថ្ងៃទី១៧ កុម្ភៈ ឆ្នាំ២០១៩ ស្ថិតក្នុងភូមិពង្រ សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ ។
បើតាមការឲ្យដឹងពីនាយប៉ុស្តិ៍នគរបាលរដ្ឋបាល សង្កាត់ទឹកថ្លា បានឲ្យដឹងថា ជនរងគ្រោះទាំង២នាក់ខាងលើដែលស្លាប់ ក្នុងនោះម្នាក់ឈ្មោះ បឿន ស្រីណូ ភេទស្រី អាយុ៩ឆ្នាំ មានឪពុកឈ្មោះ ប៊ិត ប៊ុននី អាយុ៣២ឆ្នាំ និងម្តាយឈ្មោះ តែម ស៊ីម អាយុ២៨ឆ្នាំ រស់នៅភូមិពង្រ សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ បច្ចុប្បន្នឪពុកម្តាយក្មេងស្រីរងគ្រោះបានទៅធ្វើការងារនៅប្រទេសថៃ ហើយក្មេងស្រីរងគ្រោះរស់នៅជាមួយជីដូន ។
ចំណែកជនរងគ្រោះម្នាក់ទៀតឈ្មោះ ប៉ុច សុឃីម ភេទស្រី អាយុ១១ឆ្នាំ មានឪពុកឈ្មោះ កែវ ម៉ៅ អាយុ៤១ឆ្នាំ និងម្តាយឈ្មោះ សេក សោម អាយុ៤៣ឆ្នាំ រស់នៅភូមិពង្រ សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ ។
លោកវរសេនីយ៍ឯក ស៊ី ឌី អធិការនគរបាល ក្រុងសិរីសោភ័ណ បានឲ្យដឹងថា ជារៀងរាល់ថ្ងៃនៅអាងទឹកពង្រនេះ មានក្មេងៗប្រុសស្រីជាច្រើននាក់បាននាំគ្នាមកងូតទឹក អាងរណ្តៅដីដែលមានជម្រៅពី៣ទៅ៤ម៉ែត្រ ។ លុះនៅថ្ងៃនេះកើតហេតុ មិនដឹងជាចៃដន្យអ្វី ក៏ស្រាប់តែមានក្មេងប្រុសស្រីចំនួន៦នាក់បានលង់ទឹក តែត្រូវបានប្រជាពលរដ្ឋជាអ្នកបង់ត្រីនៅក្បែរនោះឮថាមានក្មេងលង់ទឹក ហើយពួកគាត់ក៏នាំគ្នាចុះទៅជួយសង្គ្រោះបានតែ៤នាក់ (ក្នុងនោះស្រី២នាក់) ចំណែកក្មេងស្រីរងគ្រោះ២នាក់ទៀតបានលិចទៅក្នុងទឹកអាង ទំរាំរាវរកឃើញ ក្មេងស្រីរងគ្រោះទាំង២នាក់បានស្លាប់បាត់បង់ជីវិតទៅហើយ។
ក្រោយពេលកើតហេតុ សពក្មេងស្រីរងគ្រោះទាំង២នាក់ត្រូវបានក្រុមគ្រួសារសាច់ញាតិយកទៅធ្វើបុណ្យតាមប្រពៃណី ៕
ចែករំលែកព័តមាននេះ