រាជធានីភ្នំពេញ៖ អ្នកនាងឡេង មុនីរចនាជួបរឿងប្រេះឆាស្នេហ៍ម្តងហើយម្តងទៀត ។ ចុងក្រោយនេះនាងបានទម្លាយរឿងបែកបាក់ស្វាមីហើយប្រកាសចូលប្រឡូកសិល្បៈវិញ ។
ឡេង មុនីរចនា ធ្លាប់រៀបការលើកទី១ជាមួយអ្នកនៅឯនាយសមុទ្រ តែបានបែកបាក់គ្នា ។ រំលងបានប៉ុន្មានឆ្នាំក្រោយ នាងក៏រៀបការម្តងទៀតជាមួយគូថ្មី ។ ពេលនេះស្រាប់តែបែកគ្នាទៀត ។
ឡេង មុនីរចនា បានទាំងសម្រេចប្តូរឈ្មោះជាឡេង ផាយ៉ា ហើយបានបង្ហោះសារតាមហ្វេសប៊ុកនាពេល ថ្មីៗកន្លងមកថា«សូមប្រាប់ថា រាល់ថ្ងៃនាងខ្ញុំនៅលីវមិនមានគ្រួសារទេដោយលែងគ្នាតាំពីឆ្នាំ២០១៦ មកម្ល៉េះ ។ សង្ឃឹមថា បងៗក្រុមការងារនឹងបានដឹង កុំឲ្យច្រឡំ អរគុណ ! សម្រាប់ការនៅរាប់អាននាងខ្ញុំ និងចងចាំតារាជើងចាស់មួយនេះ»។
ឆ្នាំ២០១៩នេះតារាចម្រៀងឡេង មុន្នីរចនា ត្រូវលោកញ៉ែម សំអូន ដែលជាប្រធានក្រុម ក្រុម Daraentertainment បានជ្រើសរើសយកនាងចូលជាសមាជិកក្នុងក្រុមរបស់លោក ដោយសម្លឹមើលឃើញពីសមត្ថភាពរបស់នាង ។ កាលពីអំឡុង២០០០ ឡេង មុន្នីរចនា គឺជាម្ចាស់បទ«សង្ស័យថាមានថ្មី» «រាងអូនស្អាតទេ » និងបទចម្រៀងជាច្រើនទៀតក្នុងផលិតកម្ម ស្ទឹងសង្កែ ដែលមានការគាំទ្រយ៉ាងពីស្រទាប់យុវវ័យ ។
នាងមិនត្រឹមតែជាតារាចម្រៀងទេ ក៏ធ្លាប់ធ្វើជាពិធីការិនីក្នុងកម្មវិធី«នាទីចុងក្រោយ»នៅទូរទស្សន៍ជាត ធ្លាប់ជាតារាបង្ហាញម៉ូដក្នុងក្រុម Cambodia និងធ្លាប់បានចូលរួមសម្តែងភាពយន្តដូចជា រឿង«នាងលាជនាងលក្ខិ» រឿង«សាយ័ន្តស្នេហ៍» រឿង«អាខ្វាក់អាខ្វិន» និងរឿង«អាត់បី»ជាដើម ។ នាងក៏ធ្លាប់ថតឈុតពាណិជ្ជកម្មឲ្យក្រុមហ៊ុនមួយចំនួនផងដែរ ។
រហូតមកដល់ពេលនេះឡេង មុន្នីរចនា នៅតែស្រស់ស្អាត ។ ក្រៅពីការងារសិល្បៈនាងក៏ជាអ្នកលក់គ្រឿងក្រអូប និងផលិតផលម៉ាកល្បីៗជាច្រើន ។
ឡេង មុន្នីរចនា ស្ទើរតែធ្វើឲ្យមហាជនភ្លេចមុខទៅហើយក្នុងប៉ុន្មានឆ្នាំចុងក្រោយនេះ ដោយនាងមិនដែលបង្ហាញមុខតាមកញ្ចក់ទូរទស្សន៍ ឬកម្មវិធីអ្វីឡើយ ។ ទោះជាយ៉ាងណាក្តីពេលនេះឡេង មុនីរចនា បានត្រឡប់មកពិភពសិល្បៈវិញហើយ ៕
ចែករំលែកព័តមាននេះ