រាល់ពេលចង់កម្ចាត់កំណកកំបោរជាប់ធ្មេញ, បាក់តេរីក្នុងមាត់ និងក្លិនខ្យល់ដង្ហើមមិនល្អ ភាគច្រើននៃពួកយើងប្រើប្រាស់ទឹកខ្ពុរមាត់ ។ ប៉ុន្តែថាតើអ្នកធ្លាប់ដឹងទេថាផលិតផលនេះអាចប្រើប្រាស់ដោះស្រាយបញ្ហាបានយ៉ាងច្រើនលើសពីគ្រាន់តែយកមកខ្ពុរសម្អាតមាត់ ?
អ្វីដែលធ្វើឱ្យទឹកខ្ពុរមាត់មានអត្ថប្រយោជន៍គួរឱ្យភ្ញាក់ផ្អើលនោះ គឺសារធាតុម៉ុងតុល និងជាតិអាល់កុលដែលវាមានផ្ទុក ។ ប្រយោជន៍ជាច្រើនផ្សេងទៀតនៃទឹកខ្ពុរមាត់ ប៉ុន្តែត្រូវចាំថា មានតែទឹកខ្ពុរមាត់ប្រភេទផ្ទុកជាតិអាល់កុលប៉ុណ្ណោះដែលមានប្រសិទ្ធភាពដោះស្រាយបញ្ហាមួយចំនួនខាងក្រោម ៖
១. កម្ចាត់មុន ៖ អ្វីដែលអ្នកត្រូវធ្វើ គឺគ្រាន់តែលាបទឹកខ្ពុរមាត់លើមុនក្បាលខ្មៅទាំងនោះជាការស្រេច។ ជាតិអាល់កុលដែលមានផ្ទុកនៅក្នុងទឹកខ្ពុរមាត់សម្ងួតមុនទាំងនោះយ៉ាងឆាប់រហ័ស ព្រមទាំងសម្លាប់បាក់តេរីទប់ស្កាត់មិនឱ្យឆ្លងមេរោគផងដែរ ។ បើប្រៀបធៀបទៅនឹងទឹកថ្នាំកម្ចាត់មុនដទៃទៀតដាក់លក់តាមទីផ្សារដែលមានផ្ទុកសារធាតុគីមីខ្លាំង នោះទឹកខ្ពុរមាត់ គឺជាផលិតផលប្រសើរបំផុតសម្រាប់សុខភាពស្បែករបស់អ្នក ។
២. ទឹកលាងសម្អាតស្បែកមុខ ៖ អ្វីដែលអ្នកត្រូវធ្វើ គឺគ្រាន់តែប្រើប្រាស់បន្ទះសម្លីជ្រលក់ក្នុងទឹកខ្ពុរមាត់ដែលមានផ្ទុកជាតិអាល់កុលរួចផ្ដិតជូតវា ថ្នមៗលើស្បែកមុខ ដើម្បីកម្ចាត់ដី និងសម្លាប់មេរោគបាក់តេរី ។ រីឯសារធាតុម៉ុងតុលវិញផ្ដល់ឱ្យស្បែកនូវភាពត្រជាក់ និងជួយបង្រួមរន្ធញើស ។
៣. កម្ចាត់ក្លិនជើង ៖ អ្វីដែលអ្នកត្រូវធ្វើ គឺលាយទឹកក្ដៅ ឧណ្ហៗជាមួយនឹងទឹកខ្ពុរមាត់មានផ្ទុកជាតិអាល់កុល។ កូរឱ្យសព្វសឹមត្រាំជើងក្នុងទឹកល្បាយនេះសម្រាប់រយៈពេលប៉ុន្មាននាទី ឬរហូតដល់ទឹកចុះត្រជាក់តែម្ដង ។ វិធីនេះក្រៅពីជួយកម្ចាត់ក្លិនជើងមិនល្អហើយនោះ ក៏ជួយធ្វើឱ្យអ្នកមានអារម្មណ៍ធូរស្រាលផងដែរ ។
៤. ព្យាបាលស្នាមជាំ ៖ អ្វីដែលអ្នកត្រូវធ្វើ គឺគ្រាន់តែម៉ាស្សាទឹកខ្ពុរមាត់មួយចំនួនលើស្នាមជាំជាការស្រេច ។ វិធីនេះជួយបំបាត់ស្នាមជាំឆាប់រហ័សដោយបង្កើនចរន្តឈាមរត់ ។
៥. កម្ចាត់រោគផ្សិតលើក្រចក ៖ អ្វីដែលអ្នកត្រូវធ្វើ គឺគ្រាន់តែលាយទឹកក្ដៅឧណ្ហៗជាមួយទឹកខ្ពុរមាត់ ហើយកូរឱ្យសព្វ សឹមត្រាំដៃ ឬជើងក្នុងទឹកល្បាយនេះរហូតដល់ទឹកចុះត្រជាក់ជាការស្រេច ។
៦. កម្ចាត់អង្គែស្បែកក្បាល ៖ ប្រសិនបើអ្នកអស់ ឬគ្មានសាប៊ូកម្ចាត់អង្គែទេនោះ ចូរប្រើប្រាស់ទឹកខ្ពុរមាត់ជំនួសវិញ ។ អ្វីដែលអ្នកត្រូវធ្វើ គឺគ្រាន់តែម៉ាស្សាទឹកខ្ពុរមាត់មួយចំនួនដោយផ្ទាល់លើស្បែកក្បាលជាការស្រេច ។ វិធីនេះក៏ផ្ដល់ឱ្យក្បាលរបស់អ្នកនូវក្លិនជីរអង្កាមស្រស់ស្រាយផងដែរ ។
៧. កម្ចាត់ក្លិនក្លៀក ៖ គ្រាន់តែប្រើប្រាស់បន្ទះសម្លីជ្រលក់ទឹកខ្ពុរមាត់ រួចលាបត្រង់ក្លៀកជាការស្រេច ។ ទឹកខ្ពុរមាត់កម្ចាត់ពពួកបាក់តេរីដែលបង្កក្លិនក្លៀក ហើយធ្វើឱ្យអ្នកមានក្លិនស្រស់ស្រាយក្នុងរយៈពេលយូរ (ប្រភពពី៖ Health.com.kh) ៕
ចែករំលែកព័តមាននេះ