រាជធានីភ្នំពេញ ៖ ឡុង សំណាង មកពីក្លិបសាលវ័ន្តកីឡា និងឌុម កែវដា មកពីក្លិមកុដរាជសីហ៍ បើទោះជានៅសល់១ប្រកួតម្នាក់ក្នុងដៃទៀតមែន ប៉ុន្តែឆ្លងកាត់ការប្រកួតនៅលើសង្វៀនស៊ីធីអិុន កាលពីថ្ងៃអាទិត្យ ទី១៧ កុម្ភៈ កន្លងមកនេះ គេទាំង២មានឱកាសច្រើនក្នុងការឡើងទៅកាន់កៅអីប្រកួតនៅវគ្គពាក់កណ្ដាលផ្ដាច់ព្រ័ត្របន្តទៀត។
លោក មាស វណ្ណឌី មន្ត្រីគណៈកម្មការបច្ចេកទេសរៀបចំការប្រកួតបានឱ្យដឹងថា ឡុង សំណាង បន្ទាប់ពីយកឈ្នះកីឡាករថៃ Pit Sayfa ដោយពិន្ទុលើកនេះទៀត គេមាន៩ពិន្ទុនៅក្នុងដៃហើយ។ ដូច្នេះបើទោះជានៅសល់១ប្រកួតទៀតក៏ដោយ តែគេមានភាគរយច្រើនក្នុងការឡើងទៅកាន់កៅអីប្រកួតវគ្គបន្ត។ ដូចគ្នាជាមួយកីឡាករ ឌុម កែវដាដែរ លើកនេះត្រូវបានគណៈកម្មការរៀបចំការប្រកួតផ្ដល់ពិន្ទុឱ្យឈ្នះកីឡាករថៃ Check Nuon ដោយស្វ័យប្រវត្តិ ខណៈកីឡាករថៃម្នាក់នេះមិនអាចរក្សាទម្ងន់បាន គេលើសទម្ងន់ជិត៥គីឡូក្រាម ហើយកីឡាករឌុម កែវដាក៏មាន៩ពិន្ទុនៅក្នុងដូចគ្នាជាមួយកីឡាករ ឡុង សំណាងដែរ។
លោកបានឱ្យដឹងទៀតថា សម្រាប់ការប្រកួតវគ្គសន្សំពិន្ទុឈានទៅដណ្ដើមខ្សែក្រវាត់អន្តរជាតិក្នុងប្រភេទទម្ងន់៦៣,៥គីឡូក្រាមនេះ ក្នុងចំណោមកីឡាករកម្ពុជា៤រូបមានតែកីឡា ឡុង សំណាង និងឌុម កែវដាប៉ុណ្ណោះ ដែលមានពិន្ទុច្រើនលើសគេ។ ដោយឡែកកីឡាករ ផាន់ គ្រាន់ មកពីក្លិបពុទ្ធសេរីវង្សពោធិ៍សែនជ័យ សម្រាប់ការប្រកួត៣លើកមកនេះ ឈ្នះ២ប្រកួតចាញ់អស់១ប្រកួត។ រីឯកីឡាករ ពុយ វណ្ណៈ មកពីក្លិបឃ្លាំងមឿងកីឡាវិញនោះកាន់តែអស់ផ្លូវអ៊ុតថែមទៀត ដោយសារតែការប្រកួតទាំង៣លើករបស់គេរួចមកហើយនោះ ស្គាល់ឈ្នះតែ១ប្រកួតប៉ុណ្ណោះ។
ប៉ុន្តែលោកមាស សុខគ្រី ដែលជាមន្ត្រីសម្របសម្រួលកម្មវិធីប្រកួតកីឡាប្រដាល់ប្រចាំសង្វៀនស៊ីធីអិុន និងស៊ីអិុនស៊ីវិញនោះ បានឱ្យដឹងថា សម្រាប់ការប្រកួតដណ្ដើមខ្សែក្រវាត់នេះ គណៈកម្មការរៀបចំការប្រកួតបានប្រើរូបមន្តខុសគេ នៅត្រង់ថា មិនថាកីឡាករខ្មែរ ឬបរទេសនោះទេ សំខាន់ឱ្យតែអ្នកណាមានពិន្ទុច្រើនជាងគេចំនួន៤នាក់ ទើបអាចមានឱកាសឡើងទៅប្រកួតនៅវគ្គបន្តទៀតបាន ។ ដូច្នេះគេនៅរង់ចាំអ៊ុតមើលការបូកសរុបពិន្ទុរបស់កីឡាករទាំង៨នាក់ ក្នុងនោះកម្ពុជា៤នាក់ ថៃ៤នាក់ នៅពេលចប់ការប្រកួតទាំងស្រុងសិន។ ជួនកាលកីឡាករកម្ពុជាយើងអាចឡើងទៅដល់វគ្គប្រកួតបន្ត៣នាក់ ថៃ១នាក់ក៏ថាបានដែរ។
ចំណែកគូប្រកួតមិត្តភាពវិញនោះ ព្រឿង សុជាតិ មកពីក្លិបកងពលធំអន្តរាគមន៍លេខ២ ប្រកួតចាញ់ពិន្ទុកីឡាករថៃឈ្មោះ Sok San ខណៈ កីឡាករ គាង សុភេន មកពីក្លិបវិបុលដារិទ្ធពោធិ៍សែនជ័យ ប្រកួតចាញ់ពិន្ទុកីឡាករ អេង ស៊ាវឡុង ក្លិបតាព្រហ្មមានជ័យ៕
ចែករំលែកព័តមាននេះ