រាជធានីភ្នំពេញ ៖ ស្ត្រីម្នាក់បានកាន់រូបថតប្រុសស្នេហ៍មកប្តឹងសមត្ថកិច្ចមូលរដ្ឋាន ដើម្បីឱ្យជួយអន្តរាគមន៍ ក្រោយពីស្គាល់គ្នាតាមរយៈហ្វេសប៊ុកប្រហែលជាង២ខែ ស្រាប់តែខាងបុរសបោកយកទូរស័ព្ទដៃ និងម៉ូតូមួយគ្រឿងគេចខ្លួនទៅបាត់ ។ ករណីនេះកើតឡើងតាំងពីរសៀលថ្ងៃទី១៥ ខែកុម្ភៈ…
រាជធានីភ្នំពេញ ៖ ស្ត្រីម្នាក់បានកាន់រូបថតប្រុសស្នេហ៍មកប្តឹងសមត្ថកិច្ចមូលរដ្ឋាន ដើម្បីឱ្យជួយអន្តរាគមន៍ ក្រោយពីស្គាល់គ្នាតាមរយៈហ្វេសប៊ុកប្រហែលជាង២ខែ ស្រាប់តែខាងបុរសបោកយកទូរស័ព្ទដៃ និងម៉ូតូមួយគ្រឿងគេចខ្លួនទៅបាត់ ។ ករណីនេះកើតឡើងតាំងពីរសៀលថ្ងៃទី១៥ ខែកុម្ភៈ ឆ្នាំ២០១៩ នៅមុខផ្សារស៊ិនជូរីផ្លាហ្សា តាមបណ្តោយផ្លូវមហាវិថីសហព័ន្ធរុស្សី ក្នុងភូមិតាងួន សង្កាត់កាកាប១ ខណ្ឌពោធិ៍សែនជ័យ។
ស្ត្រីរងគ្រោះជាម្ចាស់ម៉ូតូឈ្មោះ អាន ស្រីលីន អាយុ១៩ឆ្នាំ មុខរបរកម្មការិនីរោងចក្រ ស្នាក់នៅបន្ទប់ជួលភូមិក្បាលដំរី សង្កាត់កាកាប២ ខណ្ឌពោធិ៍សែនជ័យ ចំណែកប្រុសស្នេហ៍ដែលឆបោកម៉ូតូគេចខ្លួនបាត់ត្រូវបានជនរងគ្រោះប្រាប់ថា ឈ្មោះ ណាក់ ភារះ អាយុ៣២ឆ្នាំ មុខរបរជាប៉ូលិស (មិនស្គាល់ផ្ទះ)។
ប្រភពពីនារីរងគ្រោះបានឲ្យដឹងថា នាងបានស្គាល់គ្នាជាមួយបុរសខាងលើតាមរយៈហ្វេសប៊ុក ប្រហែលជាង២ខែ ក្នុងអំឡុងស្គាល់គ្នានេះបុរសខាងលើប្រាប់ថា គេជាប៉ូលិសនៅក្នុងខណ្ឌពោធិ៍សែនជ័យ និងធ្លាប់ណាត់ជួបគ្នាដើរលេងបាន២ដង ប៉ុន្តែមិនដែលស្គាល់ផ្ទះបុរសខាងលើនោះឡើយ។ លុះដល់ថ្ងៃទី១៤ កុម្ភៈ មុនកើតហេតុ បុរសខាងលើប្រាប់ថា ចង់ទៅលេងស្រុកនាង ដើម្បីស្គាល់សាច់ញាតិ ពេលនោះណាត់គ្នាជួបនៅមុខព្រលានយន្តហោះអន្តរជាតិភ្នំពេញ និងបានជិះម៉ូតូនាងម៉ាកឌ្រីមសង់សេ១២៥ ពណ៌ខ្មៅ ស៊េរី២០១៨ ពាក់ស្លាកលេខភ្នំពេញ 1NT-2943 ឌុបគ្នាទៅលេងស្រុកកំណើតនាងនៅខេត្តកំពង់ចាម។
ស្ត្រីដដែលឲ្យដឹងទៀតថា ក្រោយពីដេកនៅស្រុកកំណើតនាងមួយយប់ លុះដល់ព្រឹកថ្ងៃទី១៥ កុម្ភៈ បានត្រឡប់មកភ្នំពេញវិញ ខណៈមកដល់ចំណុចមុខផ្សារស៊ិនជូរីផ្លាហ្សា បុរសខាងលើបានប្រាប់ថា ឱ្យនាងចាំនៅមុខផ្សារមួយភ្លែត គាត់ជិះម៉ូតូទៅយកកូនសោចូលផ្ទះដែលផ្ញើនឹងមិត្តភក្តិនៅអធិការដ្ឋាននគរបាលខណ្ឌពោធិ៍សែនជ័យ ព្រមទាំងយកទូរស័ព្ទដៃនាងម៉ាកហូវ៉ៃមួយគ្រឿងទៅផង ស្រណុកខលរកមិត្តភក្តិក្រែងទៅរកមិនជួប ហើយក៏ទៅបាត់រហូតតែម្តង។
ដោយចាំបាត់ៗខលទៅរកមិនចូល សូម្បីអាខោនហ្វេសប៊ុកក៏ប្លុកចោលទៀត នាង និងបងប្អូនក៏សម្រេចចិត្តមកប៉ុស្តិ៍នគរបាលរដ្ឋបាលកាកាប១ ដើម្បីមកដាក់ពាក់បណ្តឹង ព្រមទាំងមានកាន់រូបថតបុរសខាងលើមកជាមួយផង។
ចែករំលែកព័តមាននេះ