រាជធានីភ្នំពេញ ៖ ជនសង្ស័យជាមុខសញ្ញាចោរលួចរថយន្តយ៉ាងសកម្មម្នាក់បានធ្វើសកម្មភាពលួចយករថយន្ត១គ្រឿងជាកម្មសិទ្ធិរបស់ស្ត្រីម្នាក់បានសម្រេច រួចទៅសម្ងំលាក់ខ្លួននៅក្នុងផ្ទះល្វែងមួយកន្លែង ប៉ុន្តែត្រឹមតែប្រមាណ៦ម៉ោងប៉ុណ្ណោះក៏ត្រូវកម្លាំងនគរបាលនៃអធិការដ្ឋានខណ្ឌពោធិ៍សែនជ័យស្រាវជ្រាវយ៉ាងក្តៅគគុករហូតចាប់ខ្លួនបាន។ ការចាប់ខ្លួននោះធ្វើឡើងកាលពីម៉ោង១១ព្រឹក ថ្ងៃទី១៦ ខែកុម្ភៈ ឆ្នាំ២០១៩ នៅចំណុចផ្ទះល្វែងក្បែរផ្សារ ស៊ិនជូរី ផ្លាហ្សារ ស្ថិតក្នុងភូមិតាងួន សង្កាត់កាកាបទី១ ខណ្ឌពោធិ៍សែនជ័យ ។
ជនសង្ស័យខាងលើមានឈ្មោះ យិន តារា អាយុ៤៧ឆ្នាំ អតីតមន្ត្រីយោធា ត្រូវបណ្តេញចេញពីអង្គភាព បច្ចុប្បន្នរស់នៅផ្ទះល្វែងជាន់ទី៣ លេខ២០អឺុ១សេ ស្ថិតក្នុងភូមិ-ឃុំខាងលើ និងមានស្រុកកំណើតនៅក្នុងភូមិខ្សាម សង្កាត់កំពង់ឆ្នាំង ក្រុងកំពង់ឆ្នាំង ខេត្កំពង់ឆ្នាំង។
ជនសង្ស័យនេះបានលួចរថយន្ត១គ្រឿងម៉ាកកូរ៉ូឡា ពណ៌ខ្មៅ ស៊េរីឆ្នាំ២០០៤ ពាក់ស្លាកលេខ ភ្នំពេញ 2E-7708 ដែលជាកម្មសិទ្ធិរបស់ស្ត្រីម្នាក់ឈ្មោះ ឡាច ចរិយា អាយុ៣៤ឆ្នាំ មុខរបរបុគ្គលិកក្រុមហ៊ុន ស្នាក់នៅផ្ទះលេខ២២E២ ភូមិតាងួន សង្កាត់កាកាបទី១ ខណ្ឌពោធិ៍សែនជ័យ និងមានស្រុកកំណើតនៅក្នុងភូមិកោះគរ ឃុំមានជ័យ ស្រុកស្រីសន្ធរ ខេត្តកំពង់ចាម។
តាមប្រភព័ត៌មានបានឲ្យដឹងថា ជនសង្ស័យបានធ្វើសកម្មភាពលួចយករថយន្ត១គ្រឿងខាងលើកាលពីវេលាជិតភ្លឺថ្ងៃទី១៦ ខែកុម្ភៈ ហើយពុំទាន់ដឹងថា យកទៅលាក់ទុកនៅកន្លែងណាមួយនៅឡើយ បន្ទាប់មកបានទៅសម្ងំលាក់ខ្លួននៅក្នុងផ្ទះខាងលើ ។ ក្រោយមកបន្ទាប់ពីម្ចាស់រថយន្តដឹងថា រថយន្តរបស់ខ្លួនត្រូវចោរលួចបាត់ ស្ត្រីជាម្ចាស់រថយន្តបានដាក់ពាក្យប្ដឹងសុំឲ្យនគរបាលជួយធ្វើការស្រាវជ្រាវ។ រយៈពេលប្រមាណ៦ម៉ោង ក្រោយពីការធ្វើសកម្មភាពត្រូវបានកម្លាំងនគរបាលនៃអធិការដ្ឋានខណ្ឌពោធិ៍សែនជ័យ កំណត់បានមុខសញ្ញា ទើបឈានដល់ការចាប់ខ្លួនតែម្ដង។
ប្រភពដដែលបន្តថា ក្រោយពេលចាប់ខ្លួននគរបាលធ្វើការឆែកឆេរផ្ទះជនសង្ស័យរកឃើញម៉ូតូម៉ាក MSX ១គ្រឿង ពណ៌ស ពាក់ស្លាកលេខខេមរភូមិន្ទ 01- 1-1521 និងម៉ាកស៊ីទីសេ១០០កូរ៉េពណ៌ក្រហម ពាក់ស្លាកលេខ 1-3265ភព1 មួយគ្រឿង ខ្សែក្រវាត់ស៊ិនតារ៉ុង១ ខ្សែក្រវាត់សម្រាប់ក្រវាត់កាំភ្លើងនៅក្រោមក្លៀក១ ស្រោមកាំភ្លើងខ្លីម៉ាករ៉ូឡូ១ មានគ្រាប់៦គ្រាប់ ស្រោមកាំភ្លើងខ្លីម៉ាកកា៥៤ ចំនួន២ និងមានគ្រាប់ចំនួន៧គ្រាប់។ ប៉ុន្តែចំពោះកាំភ្លើងខ្លីមិនទាន់រកឃើញឡើយ ហើយនគរបាលកំពុងសាកសួរជនសង្ស័យ ដើម្បីរកកាំភ្លើង និងទីកន្លែងលាក់រថយន្តដែលលួចបានហើយ៕
ចែករំលែកព័តមាននេះ