ខេត្តស្វាយរៀង ៖ ផ្ទះមួយខ្នងត្រូវបានភ្លើងឆាបឆេះយ៉ាងសន្ធោសន្ធៅបង្កការភ្ញាក់ផ្អើលដល់អ្នកភូមិ និងនាំគ្នាជួយបាញ់ទឹក និងជះពន្លត់ ប៉ុន្តែអកុសលហួសពេលទៅហើយ ខណៈដែលម្ចាស់ផ្ទះយកភ្លើងមកដុតសំបុកឪម៉ាល់នៅលើដំបូលក្នុងផ្ទះរបស់ខ្លួន ធ្វើឱ្យអណ្តាតភ្លើងឆាបឆេះផ្ទះអស់ក្លាយជាផេះផង់បង្កឱ្យមានការភ្ញាក់ផ្អើលកាលពីម៉ោង៨យប់ នៅថ្ងៃទី១៥ ខែកុម្ភៈ ឆ្នាំ២០១៩ ស្ថិតក្នុងភូមិចុងព្រែក ឃុំអណ្តូងពោធិ៍ ស្រុករមាសហែក។
បើតាមសមត្ថកិច្ចនគរបាលស្រុករមាសហែកបានឲ្យដឹងថា ម្ចាស់ផ្ទះរងគ្រោះឈ្មោះ សៅ អ៊ាន ភេទប្រុស អាយុ៣៥ឆ្នាំ មុខរបរកសិករ រស់នៅភូមិចុងព្រែក ឃុំអណ្តូងពោធិ៍ ស្រុករមាសហែក ចំពោះផ្ទះដែលខូចខាតមានបណ្ដោយទំហំ៦ម៉ែត្រគុណ៦ម៉ែត្រ សង់អំពីឈើដំបូលប្រក់ស័ង្កសី ជញ្ជាំងស្លឹក ចំណែកសម្ភារខូចខាតរួមមាន ស្រូវចំនួន២៥០គីទ្បូ សសរផ្ទះ១២ដើមម៉ាស៊ីនបាញ់ថ្នាំស្រូវ១គ្រឿង កង់១គ្រឿង និងលុយមួយចំនួនធំ។
បើតាមម្ចាស់ផ្ទះបានឲ្យដឹងថា មុនកើតហេតុ គឺគាត់មានគោលបំណងយកសំបុកឪម៉ាល់ចេញពីដំបូលផ្ទះក្នុងផ្ទះរបស់ខ្លួន បន្ទាប់មកក៏បានយកភ្លើងមកដុតសំបុកនោះ ប៉ុន្តែមិនប្រយ័ត្នស្រាប់តែឆាបឆេះជញ្ជាំងឡើង ធ្វើឲ្យគាត់ស្រឡាំងកាំង និងស្រែកហៅអ្នកភូមិនាំគ្នាមកជួយបាញ់ទឹកពន្លត់ ប៉ុន្តែអកុសលហួសពេលទៅហើយ ដោយផ្ទះជញ្ជាំងស្លឹកផង ភ្លើងឆាបឆេះយ៉ាងខ្លាំង ទម្រាំអ្នកស្រុករកទឹកយកមកបានបាញ់ពន្លត់ គឺអណ្តាតភ្លើងបានឆាបឆេះអស់ទៅហើយ ទាំងទ្រព្យដែលមានតិចតួច សល់តែខោអាវមួយចង្កេះ៕
ចែករំលែកព័តមាននេះ