ខេត្តកំពង់ធំ ៖ តាមសេចក្តីរាយការណ៍បឋមបានឱ្យដឹងថា ដូនចាស់ម្នាក់ដើរឆ្លងថ្នល់ត្រូវម៉ូតូមួយគ្រឿងបើកបរក្នុងល្បឿនលឿនបុក បណ្តាលឱ្យរងរបួសធ្ងន់ ក្រោយមកក៏បានស្លាប់ពេលបញ្ជូនទៅសង្គ្រោះនៅមន្ទីរពេទ្យ ចំណែកអ្នកបើកបរម៉ូតូបានរងរបួសស្រាល ។ គ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង៥និង៥០នាទីល្ងាចថ្ងៃទី១៦ ខែកុម្ភៈ ឆ្នាំ២០១៩ នៅលើផ្លូវកំណាត់ផ្លូវជាតិលេខ៦ ចន្លោះគីឡូម៉ែត្រលេខ១១៦-១១៧ ស្ថិតក្នុងភូមិសំរោង ឃុំបារាយណ៍ ស្រុកបារាយណ៍ ខេត្តកំពង់ធំ ។
សមត្ថកិច្ចនគរបាលចរាចរណ៍ប្រាប់ថា ម៉ូតូមួយគ្រឿងខាងលើ ម៉ាកហុងដាឌ្រីម ធុនC125 ពណ៌ខ្មៅ ពាក់ផ្លាកលេខ កំពង់ធំ ១I-៩២៦៦ អ្នកបើកបរឈ្មោះ ញឿន ណុយ ភេទប្រុស អាយុ២៥ឆ្នាំ មុខរបរកម្មករលាងរថយន្ត រស់នៅភូមិគ្រួស ឃុំដូង ស្រុកប្រាសាទបល្ល័ង្ក ខេត្តកំពង់ធំ បានរងរបួសស្រាល ត្រូវសមត្ថ
កិច្ចនាំខ្លួនទៅអធិការដ្ឋាននគរបាលស្រុកបារាយណ៍ ។
ចំណែកជនរងគ្រោះដែលស្លាប់ឈ្មោះ ឈឹម ម៉ក់ ភេទស្រី អាយុ៨៥ឆ្នាំ រស់នៅភូមិឃុំកើតហេតុខាងលើ ។
បច្ចុប្បន្ន អ្នកបើកបរ និងម៉ូតូត្រូវបានសមត្ថកិច្ចនាំមករក្សាទុកនៅអធិការដ្ឋាននគរបាលស្រុកបារាយណ៍ ដើម្បីរង់ចាំដោះស្រាយតាមនីតិវិធី ។ ចំណែកសពជនរងគ្រោះត្រូវបានក្រុមគ្រួសារយកទៅធ្វើបុណ្យតាមប្រពៃណី ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ