ខេត្តបាត់ដំបង ៖ បញ្ហាទំនាស់ដីធ្លីរវាងប្រជាពលរដ្ឋ១គ្រួសារ ជាមួយនឹងមន្ត្រីយោធាម្នាក់ ស្ថិតនៅភូមិបួររុន ឃុំត្រែង ស្រុករតនមណ្ឌល ខេត្តបាត់ដំបង ត្រូវបានអភិបាលរងស្រុករតនមណ្ឌល ហៅទៅធ្វើការដោះស្រាយ នៅព្រឹកថ្ងៃទី១៥ ខែកុម្ភ: ឆ្នាំ២០១៩ ស្ថិតនៅក្នុងសាលាស្រុករតនមញ្ឌល ។
តែការដោះស្រាយនេះ មិនទទួលបានផលផ្លែជូនពលរដ្ឋនោះឡើយ ព្រោះមិនបានកោះហៅអ្នកពាក់ព័ន្ធលក់ដូរ និងអាជ្ញាធរភូមិ-ឃុំ ដែលចុះហត្ថលេខារឿងដីមកបំភ្លឺ ដោយគ្រាន់តែហៅម្ចាស់ដី និងមន្ត្រីយោធាមកចរចាប៉ុណ្ណោះ ។
បើតាមប្រភពព័ត៌មានពីលោក អឹម ប៊ុនធឿន ហៅយក្សអតីតយោធាកាន់ផ្នែកកងរថក្រោះ បានឱ្យដឹងថា គាត់បានទិញដីចំនួន៥ហិកតាពីឈ្មោះ ឈុន ស៊ីណាត ភេទប្រុស រស់នៅឃុំរស្មីសង្ហារ ស្រុករតនមណ្ឌល ខេត្តបាត់ដំបង កាលពីចុងឆ្នាំ២០១២ និង បានធ្វើបង្កាន់ដៃចេញពីមេភូមិ និងមេឃុំ ហើយក៏ជួលគេឱ្យចូលទៅដោះគ្រាប់មីន និងជួលគ្រឿងចក្រឈូសឆាយព្រៃ ដោយចំណាយថវិកាអស់ជាច្រើន ។
លុះរហូតមកដល់ឆ្នាំ២០១៧ ស្រាប់តែលេចចេញបុរសម្នាក់ឈ្មោះ ច្រិក ណារ៉េត ហៅឆ្លូញ ជាមន្ត្រីយោធា មានបុណ្យស័ក្តិធំ នៅភូមិភាគ៥ បានមកអះអាងថា ដីរបស់គាត់មួយចំហៀងនេះ ដែលទទឹង១៣០ម៉ែត្រ និងបណ្តោយ១០០០ម៉ែត្រ គឺជាកម្មសិទ្ធិរបស់គាត់ រួចគេយកបង្កាន់ដៃដែលចេញដោយអភិបាលស្រុកទៅបង្ហាញ ដោយគ្មានការចុះហត្ថលេខាពីមេភូមិ ឬមេឃុំនោះឡើយ ។
លោកបន្តទៀតថា ការដោះស្រាយ គឺមិនទទួលបានផលផ្លែអ្វីនោះឡើយ ដោយដីលោកខំទិញពីគេ ហើយជួលគេដោះគ្រាប់មីន និងគាស់ឬសគល់អល់លុយជាច្រើន បែរជាលោក ហ៊ិន ហូ អភិបាលរងស្រុករតនមណ្ឌលបង្ខំឱ្យលោកចែកពាក់កណ្តាលឱ្យទៅមន្ត្រីយោធានោះទៅវិញ ។
ព័ត៌មានពិស្តារមានផ្សាយនៅកាសែតកោះសន្តិភាព
ចែករំលែកព័តមាននេះ