សម័យមួយពួកញាតិទាំងឡាយនិយាយទៅកាន់កុដុម្ពីថា នែអ្នក! ភរិយារបស់អ្នកឯងជាស្ត្រីអាឥតមានកូន ចូរឯងរកភរិយាដទៃមកក្រែងមានកូននឹងបានតវង្សត្រកូលកុំឱ្យដាច់ពូជ ។ ឯភរិយានោះក៏បាននិយាយទៅកាន់កុដុម្ពីជាប្តីដែរថា ខ្ញុំជាស្ត្រីអាគ្មានកូនទេ ពូជពង្សវង្សត្រកូលមុខជានឹងត្រូវរលត់ផុតត្រឹមនេះមិនខានឡើយ ដើម្បីបន្តពូជពង្សរបស់បង ចូរបងរកភរិយាមួយមកទៀតចុះ…
សម័យមួយពួកញាតិទាំងឡាយនិយាយទៅកាន់កុដុម្ពីថា នែអ្នក! ភរិយារបស់អ្នកឯងជាស្ត្រីអាឥតមានកូន ចូរឯងរកភរិយាដទៃមកក្រែងមានកូននឹងបានតវង្សត្រកូលកុំឱ្យដាច់ពូជ ។
ឯភរិយានោះក៏បាននិយាយទៅកាន់កុដុម្ពីជាប្តីដែរថា ខ្ញុំជាស្ត្រីអាគ្មានកូនទេ ពូជពង្សវង្សត្រកូលមុខជានឹងត្រូវរលត់ផុតត្រឹមនេះមិនខានឡើយ ដើម្បីបន្តពូជពង្សរបស់បង ចូរបងរកភរិយាមួយមកទៀតចុះ ។
ចំណែកកុដុម្ពីគ្រាន់តែឮភរិយាខ្លួនព្រមហើយ ក៏យកប្រពន្ធមួយទៀត មិនយូរប៉ុន្មាន ភរិយាក្រោយនេះក៏មានគភ៌។ ឯភរិយាដើមឃើញនាងប្រពន្ធក្រោយនោះមានគភ៌បែរជាគិតថា នាងមានកូនមិនយូរទេនឹងបានជាមេផ្ទះធំ ត្រូតត្រាលើអញជាមិនខាន ដូច្នេះអញត្រូវរកឧបាយកល ពន្លូតគភ៌នោះទើបបាន ។
គិតហើយនាងក៏ជួលគ្រូពេទ្យម្នាក់ ដែលប្រសប់ខាងផ្សំថ្នាំសម្រាប់ពន្លូតគភ៌។ លុះគ្រូពេទ្យផ្សំថ្នាំយកមកឱ្យនាងហើយផ្តាំថា ចូរនាងយកថ្នាំនេះដាក់លាយនឹងបាយឱ្យស្ត្រីនោះបរិភោគ គភ៌នោះនឹងរលូតភ្លាម ស្ត្រីអាធ្វើតាមបណ្តាំពេទ្យ ក៏សម្រេចដូចបំណងមែន ។
កាលគភ៌នោះរលូតផុតទៅ នាងប្រពន្ធក្រោយនោះក៏និយាយរឿងរ៉ាវប្រាប់ដល់ស្វាមី, ម្តាយ និងញាតិទាំងអស់របស់ខ្លួន អំពីគំនិតអាក្រក់របស់ស្ត្រីអានោះ ឯពួកញាតិបានស្តីបន្ទោសស្ត្រីនោះជាច្រើន តែស្ត្រីអាមិនព្រមទទួលការពិតទេ ហើយហ៊ានស្បថទាំងបំពានថា បើនាងបានធ្វើអំពើអាក្រក់បែបនេះមែន សូមឱ្យធ្លាក់រងទុក្ខវេទនាក្នុងនរក រួចពីនោះមកកើតជាប្រេតស៊ីតែកូនឯង សូមឱ្យអត់បាយក្រហាយទឹក ឱ្យមានខ្លូនក្លិនស្អុយអសោចិ៍ ។
ដោយអំណាចនៃបាបកម្ម លុះអស់អាយុសង្ខារទៅ ស្ត្រីអានោះក៏ធ្លាក់ទៅសោយទុក្ខក្នុងឋាននរក រួចពីនរកមកកើតជាប្រេតញីអាស្រ័យនៅក្នុងព្រៃក្បែរភូមិមួយ ។
ឯប្រេតញីនោះគ្មានសំពត់ស្លៀក មានខ្លូនអាក្រក់ក្រៃ មានក្លិនស្អុយអសោចិ៍ មានរុយរោមពេញទាំងខ្លូន មកនៅអាស្រ័យក្នុងព្រៃនេះ ។ បាបកម្មនេះក៏ព្រោះតែនាងធ្លាប់ប្រព្រឹត្តអំពើអាក្រក់កាលពីអតីតជាតិ ។
ចែករំលែកព័តមាននេះ