ខេត្តបន្ទាយមានជ័យ ៖ សមត្ថកិច្ចចម្រុះថៃមួយក្រុមបានចូលមកកម្ពុជារករឿងកសិករខ្មែរដោយបញ្ជាឲ្យដកដំឡូងមីឲ្យអស់នៅថ្ងៃទី១៦ កុម្ភៈ ឆ្នាំ២០១៩ បើទោះជាម្ចាស់ចំការសុំពេល៣ខែទុកឲ្យដំឡូងធំសិនក៏ដោយ ។ ចំណុចកើតហេតុស្ថិតនៅបន្ទាត់ព្រំដែនក្នុងភូមិល្បើកស្វាយ ឃុំស្វាយចេក ស្រុកស្វាយចេក…
ខេត្តបន្ទាយមានជ័យ ៖ សមត្ថកិច្ចចម្រុះថៃមួយក្រុមបានចូលមកកម្ពុជារករឿងកសិករខ្មែរដោយបញ្ជាឲ្យដកដំឡូងមីឲ្យអស់នៅថ្ងៃទី១៦ កុម្ភៈ ឆ្នាំ២០១៩ បើទោះជាម្ចាស់ចំការសុំពេល៣ខែទុកឲ្យដំឡូងធំសិនក៏ដោយ ។
ចំណុចកើតហេតុស្ថិតនៅបន្ទាត់ព្រំដែនក្នុងភូមិល្បើកស្វាយ ឃុំស្វាយចេក ស្រុកស្វាយចេក ឈមទឹកដីថៃ ភូមិណងយ៉ាកែវ ឃុំគ្កធ្យូង ស្រុកគ្កធ្យូង ខេត្តស្រះកែវ ។ ទីតាំងកើតហេតុមានដំឡូងមីមិនទាន់គ្រប់អាយុចំនួន៦ហិកតា ដាំដោយគ្រួសារចំនួន២ ក្នុងនោះគ្រួសារទី១-ឈ្មោះសំណាង ភេទប្រុស អាយុ៥៩ឆ្នាំ និងប្រពន្ធឈ្មោះស៊ាង ឡេង អាយុ៦១ឆ្នាំ មានចំនួន៥ហិកតា ចំណែកគ្រួសារទី២-ឈ្មោះសេង សុខា អាយុ៥៣ឆ្នាំ និងប្រពន្ធឈ្មោះភួយហឿត អាយុ៣៣ឆ្នាំ មានចំនួន១ហិកតា ។
គ្រួសាររងគ្រោះទាំង២ខាងលើជាបងប្អូននឹងគ្នា រស់នៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ។
គ្រួសាររងគ្រោះទាំង២ខាងលើបានប្រាប់កោះសន្តិភាពឱ្យដឹងថា ពួកគាត់ជួលដីគេដាំដំឡូងមី ដើម្បីអាស្រ័យផល ព្រោះគ្រួសាររបស់ពួកគាត់ក្រីក្រគ្មានមុខរបរ។
គ្រួសាររងគ្រោះទាំង២ខាងលើបានបន្តថា កាលពីដើមឡើយ គ្មានអ្នកណាហាមឃាត់ ឬរារាំងទេ ទើបមួយ រយៈចុងក្រោយនេះ ពោលគឺនៅដើមខែកុម្ភៈ ឆ្នាំ២០១៩នេះ សមត្ថកិច្ចថៃតែងតែមករករឿងដោយឲ្យគ្រួសាររបស់ពួកគាត់ធ្វើការដកដំឡូងលើផ្ទៃដីដែលដាំចំនួន៦ហិកតាឲ្យអស់ បើទោះជាដំឡូងមីរបស់ពួកគាត់នៅមើមតូចមិនទាន់ដល់អាយុកាលដែលត្រូវដក ព្រោះទើបដាំបានត្រឹមតែរយៈពេល៤ខែក្តី ។
គ្រួសាររងគ្រោះទាំង២ខាងលើបានប្រាប់ថា កាលពីព្រឹកថ្ងៃទី១៦ កុម្ភៈ សមត្ថកិច្ចថៃបានយកគ្រឿងចក្រមួយគ្រឿងពណ៌ក្រហម (ត្រាក់ទ័រ) មកក្នុងចំការរបស់ពួកគាត់គំរាមថា បើពួកគាត់មិនដកដំឡូងមីតាមពួកគេស្នើសុំទេពួកគេនឹងយកត្រាក់ទ័រឈូសឆាយកម្ទេចចោលតែម្តង ។ ទោះបីយ៉ាងណាក៏ដោយ បញ្ហាខាងលើត្រូវបានស្អប់ទៅវិញ ដោយកម្លាំងជួរមុខកម្ពុជាធ្វើការរារាំងមិនឲ្យភាគីថៃធ្វើអ្វីតាមអំពើចិត្តឡើយ ហើយសមត្ថកិច្ចថៃបានដកកម្លាំងទៅវិញនៅព្រឹកដដែល។
តាមលោកវរសេនីយ៍ត្រីសួន បូរ៉ា មេបញ្ជាការសេនាធិការនៃនគរបាលការពារព្រំដែនគោកវរសេនាតូចលេខ៩១១ ក៏ដូចជាយោធាជួរមុខកម្ពុជាដែលមានវត្តមាននៅកន្លែងកើតហេតុប្រាប់ថា មុនពេលកើតហេតុ ភាគីថៃបានចូលមកជួបខាងលោក២ដងមកហើយៗ គេលើកពីចំណុចកើតហេតុគឺនិយាយពីMOU ដោយថា ចង់រក្សាអ្វីៗឲ្យនៅដដែលទាំងសងខាងមិនឲ្យឈូសឆាយឬមិនឲ្យធ្វើអ្វីឡើយ។
កម្លាំងជួរមុខបានបន្តថា កន្លងមកបានហាមឃាត់មិនឲ្យពលរដ្ឋខាងលើធ្វើចំការនៅចំណុចកើតហេតុទេ ព្រោះជាតំបន់ប្រទាញប្រទង់ ឬហាមឃាត់ ព្រោះទុកឲ្យគណៈកម្មការព្រំដែននៃប្រទេសទាំង២ជាអ្នកសម្រេច ។
គ្រួសាររងគ្រោះទី២ខាងលើនិយាយថា គ្រួសារគាត់ និងងគ្រួសារបងរបស់គាត់អង្គុយយំមួយព្រឹកហើយ ព្រោះតែយកប្រាក់ធនាគារទៅផ្សងសំណាងធ្វើចំការក្រែងបានផល និងមានការងារធ្វើនឹងគេ ដឹងអីពេលនេះភាគីថៃមករករឿងឲ្យដកទាំងដំឡូងមីនៅតូចពុំទាន់មានម្សៅល្អ ម្យ៉ាងអាកាសធាតុគ្មានភ្លៀង ដីរឹងដកផលដំឡូងមីក៏យ៉ាប់ទៀត ។ ពួកគាត់និយាយថា មិនគួរសោះជាដីខ្មែរ បែរជាភាគីថៃមានសិទ្ធិមករករឿងសព្វបែបយ៉ាង ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ