រាជធានីភ្នំពេញ ៖ បន្ទាប់ពីអតីតចៅអធិការវត្តពោធិ៍ព្រះបាត្រ ហៅវត្តច្បារអំពៅ ត្រូវបានផ្សឹក និងបញ្ចប់តួនាទីកាលពីពេលថ្មីៗរួចមក នៅវេលាព្រឹកថ្ងៃទី១៦ ខែកុម្ភៈ ឆ្នាំ២០១៩ នេះភិក្ខុ…
រាជធានីភ្នំពេញ ៖ បន្ទាប់ពីអតីតចៅអធិការវត្តពោធិ៍ព្រះបាត្រ ហៅវត្តច្បារអំពៅ ត្រូវបានផ្សឹក និងបញ្ចប់តួនាទីកាលពីពេលថ្មីៗរួចមក នៅវេលាព្រឹកថ្ងៃទី១៦ ខែកុម្ភៈ ឆ្នាំ២០១៩ នេះភិក្ខុ ង៉ែត រ៉ាល់ ត្រូវបានតែងតាំងជាព្រះចៅអធិការវត្តជំនួសវិញ ដែលពិធីប្រកាសតែងតាំងនេះធ្វើឡើងក្រោមអធិបតីភាពសម្ដេចសង្ឃនាយក នន្ទ ង៉ែត និងមេគណៈរាជធានីភ្នំពេញសម្ដេច ឃឹម សន មានការនិមន្ដចូលរួមពីព្រះសង្ឃ តាជី យាយជី ពុទ្ធបរិស័ទចំណុះជើងវត្តផងដែរ ។
ក្នុងពិធីនៅព្រឹកមិញនេះក្រៅពីភិក្ខុ ង៉ែត រ៉ាល់ ដែលត្រូវបានតែងតាំងជាចៅអធិការវត្តច្បារអំពៅនោះ, ភិក្ខុ ហាស់ សុជាតិ ត្រូវបានតែងតាំងជាគ្រូសូត្រស្ដាំ និងភិក្ខុ ឈឿន ចំរុង ជាគ្រូសូត្រឆ្វេង ព្រមទាំង៥អង្គផ្សេងទៀត តែងតាំងជា គណៈវិន័យ និងលេខា ។
គួររំលឹកថា កាលពីយប់ថ្ងៃទី១៣ ខែកុម្ភៈ ឆ្នាំ២០១៩ អន្ទិត ហោ សុខុន អតីតចៅអធិការវត្តច្បារអំពៅត្រូវបានគណៈសង្ឃជាច្រើនអង្គ នៃក្រសួងធម្មការ និងសាសនា សម្រេចធ្វើការផ្សឹក ដោយបញ្ចប់តួនាទីពីចៅអធិការវត្តច្បារអំពៅ និងទីប្រឹក្សាសម្តេចព្រះសង្ឃរាជ ទេព វង្ស និងសង្ឃនាយក នន្ទ ង៉ែត ផងដែរ ។ ការផ្សឹក និងសម្រេចបញ្ចប់តួនាទីចៅអធិការវត្តច្បារអំពៅខាងលើ គឺដោយរកឃើញថា ចៅអធិការអង្គនេះបានប្រព្រឹត្តប្រាសចាកទៅនឹងក្រមវិន័យរបស់សង្ឈ ។
កាលពីវេលារសៀលថ្ងៃទី១១ ខែកុម្ភៈ ឆ្នាំ២០១៩ អាជ្ញាធររាជធានីភ្នំពេញរួមជាមួយគណៈសង្ឈ នៃមន្ទីរធម្មការ និងសាសនា និងអាជ្ញាធរពាក់ព័ន្ធ ជាច្រើននាក់បានចុះទៅដល់ទីតាំងវត្តច្បារអំពៅជួបជាមួយអតីតព្រះចៅអធិការវត្តខាងលើ ដើម្បីជជែកវែកញែកអំពីបញ្ហាដែលចៅអធិការរូបនេះបានបង្ហោះវីឌីអូនៅលើបណ្តាញទំនាក់ទំនងសង្គមហ្វេសប៊ុកដោយមានសង្ឃដីការអំពីបញ្ហាប្រទេសជាតិធ្វើអោយប៉ះពាល់ដល់មជ្ឈដ្ឋានខាងក្រៅមានការយល់ច្រលំ ។
ការជជែកវែកញ៉ែកគ្នានេាះគឺតម្រូវអោយអតីតចៅអធិការវត្តបញ្ឈប់ការ Live វីឌីអូមានសង្ឃដីការអំពីបញ្ហាប្រទេសជាតិតទៅទៀត ប៉ុន្តែក្រោយការអប់រំបាន២ថ្ងៃអតីតចៅអធិការវត្តខាងលើ ក៏ត្រូវបានចាប់ផ្សឹកនៅយប់ថ្ងៃទី១៣ ខែកុម្ភៈ ឆ្នាំ២០១៩នេះតែម្តង ដោយមន្ត្រីថ្នាក់ដឹកនាំសង្ឈ នៃក្រសួងធម្មកា និងសាសនា រកឃើញថាចៅអធិការអង្គខាងលើគឺមានកំហុសធ្ងន់ខុសនឹងវិន័យសង្ឃដែលមិនអាចលើកលែងអោយបានទើបសម្រេចធ្វើការចាប់ផ្សឹកតែម្តងទៅ ៕
ចែករំលែកព័តមាននេះ