ខេត្តប៉ៃលិន ៖ រថយន្តដឹកទំនិញ១គ្រឿងបានជ្រុលចង្កូតធ្លាក់ចូលក្នុងទឹកអូរព្រំដែនកម្ពុជា-ថៃ ខណ:បើកបរក្នុងទិសដៅពីកើតទៅលិចបម្រុងយកផ្លែឈើទៅលក់នៅក្នុងទឹកដីប្រទេសថៃ ស្រាប់តែរថយន្តដាច់ហ្វ្រាំងជាន់មិនជាប់ក៏ជ្រុលចង្កូតទៅខាងឆ្វេងដៃធ្លាក់ចូលក្នុងទឹកអូរទាំងព្រឹកតែម្តង ។ ចំណែកម្ចាស់រថយន្តរងរបួសស្រាលត្រូវបានគេបើកទ្វាររថយន្តយកចេញមកព្យាបាល ។
ហេតុការណ៍នេះបានកើតឡើងកាលពីវេលាម៉ោង០៩និង៣៥នាទីព្រឹក ថ្ងៃទី១៤ ខែកុម្ភៈ ឆ្នាំ២០១៩ ស្ថិតនៅចំណុចស្ពានអូរព្រំដែន ក្បែរច្រកទ្វាអន្តរជាតិផ្សារព្រំ ក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ។
ប្រភពព័ត៌មានបានឱ្យដឹងថា អ្នកបើកបររថយន្តមានឈ្មោះ ជួន សុខា ភេទប្រុស អាយុ៣៦ឆ្នាំ មានស្រុកកំណើត នៅឃុំព្រៃវែង ស្រុកព្រៃវែង ខេត្តព្រៃវែង ដោយបើកបររថយន្តម៉ាកហ៊ីយិនដាយ ( HYUNDAI) ពណ៌ឈាមជ្រូក ពាក់ផ្លាកលេខ ភ្នំពេញ 4A-4073 ដឹកស្វាយពីខ្មែរបម្រុងចូលទឹកដីថៃ ។
ប្រភពបន្តទៀតថា ក្នុងករណីខាងលើមិនបង្កគ្រោះថ្នាក់ធ្ងន់ធ្ងរដល់អ្នកបើកបររថយន្ត និងអ្នករួម ដំណើរទេ គឺគ្រាន់តែខូចខាតរថយន្ត និងផ្លែស្វាយមួយចំនួនប៉ុណ្ណោះ ។
ពាក់ព័ន្ធនឹងបញ្ហានេះបច្ចុប្បន្នផ្លែស្វាយក្នុងរថយន្តត្រូវបានម្ចាស់ហៅកម្មករផ្ទេរដាក់រថយន្តមួយផ្សេងទៀត ដើម្បីដឹកបន្តទៅលក់ដូរនៅក្នុងប្រទេសថៃ រីឯរថយន្តត្រូវនគរបាលរៀបចំស្ទូចឡើង ដើម្បី យកទៅជួសជុលនៅក្នុងក្រុងប៉ៃលិន ៕
ចែករំលែកព័តមាននេះ