រាជធានីភ្នំពេញ៖កន្លងមកតារាមួយចំនួនបានចេញមុខរិះគន់ផលិតករដែលមិនបើកប្រាក់កម្រៃដែលពួកគេចូលរួមសម្តែង ។ ថ្មីៗកន្លងមកក៏មានតារាសម្តែង២នាក់ទៀតជួបរឿងបែបនោះដែរ ធ្វើឲ្យពួកគេមិនសប្បាយចិត្ត ។
កញ្ញាចូចូ ដែលមានមុខសម្ដែងច្រើនឆ្នាំមកហើយនោះបានបង្ហោះសារដដែលៗ រិះគន់ផលិតករមួយចំនួនដែលមិនបើកប្រាក់កម្រៃ ។ នាងឲ្យដឹងថាភាពយន្តបានថតចប់យូរហើយ តែមិនបើកប្រាក់កម្រៃឲ្យសោះ។
កញ្ញាចូចូ លើកឡើងថា «តារានៅស្រុកខ្មែរល្អតែមើល តែមិនល្អស៊ីទេ បងប្អូនណាខ្លះដូចខ្ញុំ ថតឲ្យ៥ផលិតកម្ម ដល់ពេលចង់បើកលុយតេមិនលើក ឆាតមិនតប ទៅផ្ទះមិនជួប ហើយធ្វើអ៊ីចឹងធ្វើអី ។ ខ្ញុំគ្រាន់តែចង់បានលុយញើសឈាមដែរអ្នកប្រើខ្ញុំតើ ? ហើយមានផលិតកម្មខ្លះបើកលុយមិនទាន់គ្រប់ផងបែរជាថាបើកឲ្យអស់ហើយ ! នេះហើយមកពីទុកចិត្តគេពេក ។ ពេលត្រូវការខ្ញុំហេតុអីអ្នកស្រួលម្ល៉េះ?»។
នេះមិនមែនជាការបង្ហោះលើកទី១នោះទេ ហើយក៏មិនមែនជាតារាតែម្នាក់ ដែលបានរិះគន់ផលិតករដោយប្រយោលនោះដែរ ។ តែក្រៅពីកញ្ញាចូចូ ក៏មានតារាជាច្រើននាក់ទៀតបានបង្ហោះ និងខ្លះចេញមុខរិះគន់បែបនេះដែរ ។
ចំណែកកញ្ញាភីយ៉ា ថា រូបនាងបើតាមតែខឹងក្នុងពេលត្រូវការលុយ ម្ដងៗ ហើយម្ចាស់ផលិតកម្មមួយចំនួនដែលហៅនាងថតមិនបើកប្រាក់ឲ្យ គឺនាងចង់តែបង្ហោះតាមហ្វេសប៊ុកជាសាធារណ: ដោយសារតែនាងយល់ថា គឺជារឿងហួសហេតុពេក ។ ថតចប់គឺរកអ្នកបើកលុយមិនបាន ធ្វើឲ្យនាងចង់ដាច់បាយ ម្ដងៗ។ នាងថា«ខ្ញុំសព្វថ្ងៃចេញថតស្ទើររកពេលទំនេរមិនឃើញ ប៉ុន្តែសម្រាប់ប្រាក់ចំណូលមិនច្រើននោះទេ គឺបានត្រឹមតែទិញសម្លៀកបំពាក់ ដើម្បីស្លៀកថត និងចាយវាយក្នុងពេលចុះថតប៉ុណ្ណោះ ខណ:រឿងខ្លះ គឺថតបានតម្លៃខ្លួនមិនគ្រប់ចំណាយផង »។
អ្នកស្រីចាន់ សោភ័ណ្ឌ ហៅរ៉េតរ៉ូស ក៏បានត្អូញត្អែរដែរថា ម្ចាស់ផលិតកម្មមួយចំនួនថតបានលុយថោកហើយ ពិបាកបើកលុយទៀត ជាពិសេសក្នុងពេលដែលអ្នកស្រីត្រូវការលុយកាក់ដើម្បីប្រើប្រាស់ចាំបាច់ក្នុងគ្រួសារ ។ ទោះបីជាយ៉ាងណាក្តីអ្នកស្រីមិនដាច់ចិត្តបង្ហោះបើកកកាយដូចតារាមួយចំនួនទេ ដោយសុខចិត្តស៊ីអត់ស៊ីឃ្លាន និងយកលុយចាស់មកចំណាយ ទម្រាំតែម្ចាស់ផលិតកម្មគិតគូរ ។ អ្នកស្រីថា«តារាស្រុកខ្មែរអ្នកខ្លះថាអាចសល់រាប់ម៉ឺនដុល្លារ ប៉ុន្តែការពិតឲ្យតែម្ចាស់ផលិតកម្មបើកឲ្យ មួយពេលៗ បានចាយវាយនោះ គឺវាល្អណាស់ទៅហើយ។
តាំងពីបោះបង់មុខជំនួញមកទទួលថតភាពយន្តយ៉ាងសស្រាក់សស្រាំ គឺបានតែល្អមើលប៉ុណ្ណោះ ប៉ុន្តែខ្ញុំមិនបោះបង់ការតាំងចិត្តនោះទេ ដោយសារតែខ្ញុំក៏សប្បាយចិត្តនឹងទីផ្សារឈានឡើងរបស់ខ្លួន »។
កញ្ញាវ៉ាន់ លីលី ក៏បានបង្ហោះសារត្អូញត្អែរ ជុំវិញករណីផលិតករមិនបើកលុយឲ្យដែរថា «បណ្ដាម្ចាស់ផលិតកម្មមួយចំនួនស្ងាត់ឈឹង តើមានលុយឯណាជូនម៉ែនៅស្រុក និងមានលុយសប្បាយនឹងគេ »។កន្លងមានតារាមួយចំនួនបានបង្ហោះរឿងផលិតករមិនបើកប្រាក់ និងខ្លះឈានដល់ផ្ទុះជម្លោះជាមួយគ្នាទៀតផង ។
ចំពោះតារាក្មេងៗ ដែលត្រូវការឱកាសចូលរួមសម្ដែង ភាគច្រើនពួកគេមិនហ៊ានបញ្ចេញប្រតិកម្មទេ ដោយពួកគេបានត្រឹមតែរអ៊ូមិនឲ្យឮ និងខ្លះសុខចិត្តចោលជាដើម ដើម្បីបានឱកាសសម្តែងលើកក្រោយទៀត ។
មានតារាជាច្រើននាក់លើកឡើងដែរអ្នកដឹកនាំតួសម្តែងស៊ីពីលើមួយជាន់ហើយ ម្ចាស់ផលិតកម្មក្របើកប្រាក់ឲ្យ ឬបើកមិនគ្រប់ទៀត។
ជុំវិញប្រតិកម្មទាំងនោះ ម្ចាស់ផលិតកម្មជាច្រើនបានអះអាងថា ខ្លួនផលិតភាពយន្តសព្វថ្ងៃមិនបានចំណេញទេ គឺបានតែជួយលើកស្ទួយវិស័យសិល្ប:កុំឲ្យដួលរលំប៉ុណ្ណោះ ខណ:ដែលភាពយន្តដុំបញ្ចាំងតាមរោងមិនសូវមានការគាំទ្រដូចភាពយន្តថៃ ។ ចំណែករឿងភាគទូរទស្សន៍វិញក៏ត្រូវបណ្ដាទូរទស្សន៍ជំពាក់លុយរាប់ខែរាប់ឆ្នាំបណ្ដាលឲ្យផលិតមិនមានលុយបង្វិលទាន់ពេលទៅឲ្យតួសម្តែង ។
ផលិតករភាគច្រើនដែលរងការរិះគន់និយាយថា ផលិតករមិនមែនមិនដឹងពីសុខទុក្ខរបស់តារាសម្តែងទេ ប៉ុន្តែមកពីផលិតករក៏មានផលវិបាកដែរ ទើបស្នើឲ្យតារាដែលថតចប់មិនទាន់បានលុយមានការយោគយល់ ៕
ចែករំលែកព័តមាននេះ