ខុនដូ និងដីនៅក្រុងបាងកកងើបមិនរួចព្រោះសល់ច្រើនពេក
ប្រទេសថៃ ៖ ភ្នាក់ងារសារព័ត៌មាន Bangkok Post បានឲ្យដឹងកាលពីថ្ងៃទី១៣ កុម្ភៈ កន្លងមកថា ក្រុមហ៊ុនប្រឹក្សាយោបល់អចលនទ្រព្យ CBRE…
ប្រទេសថៃ ៖ ភ្នាក់ងារសារព័ត៌មាន Bangkok Post បានឲ្យដឹងកាលពីថ្ងៃទី១៣ កុម្ភៈ កន្លងមកថា ក្រុមហ៊ុនប្រឹក្សាយោបល់អចលនទ្រព្យ CBRE Thailand បាននិយាយថា តម្លៃដី និងខុនដូជាមធ្យមក្នុងទីក្រុងបាងកកនឹងមិនកើនឡើងទេក្នុងឆ្នាំនេះ ព្រោះតែរងសម្ពាធពីកំណើនខុនដូ និងដីដែលមិនទាន់លក់ចេញ ។
អ្នកស្រី Aliwassa Pathnadabutr ដែលជានាយកគ្រប់គ្រងរបស់ក្រុមហ៊ុនខាងលើបាននិយាយថាតម្លៃមធ្យមរបស់ដី និងខុនដូនៅឆ្នាំនេះនឹងមានការធ្លាក់ចុះបន្តិចបន្ទាប់ពីកើនឡើងអស់៣ឆ្នាំមក ។
អ្នកស្រីបានឲ្យដឹងទៀតថាក្នុងកំឡុងឆ្នាំ ២០១៥ ដល់ ២០១៨ តម្លៃដីមមធ្យមក្នុងទីក្រុងបាងកកបានកើនឡើង ១២.៥%ក្នុងមួយឆ្នាំ ខណៈដែលធ្លាក់ចុះមកត្រឹម៧ទៅ៨%ប៉ុណ្ណោះក្នុងពេលថ្មីៗនេះ ហើយកំណើនតម្លៃដីជាមធម្យមអាចកើនបានតែពី០ទៅ៥%ប៉ុណ្ណោះក្នុងឆ្នាំនេះ ។
ក្រុមហ៊ុនអចលនទ្រព្យមួយចំនួនបានទិញដីក្នុងតម្លៃមិនសមរម្យដែលធ្វើឲ្យបង្កើនតម្លៃខុនដូ និងបង្កឲ្យមានខុនដូជាច្រើនដែលលក់មិនចេញ ។ ចំនួនខុនដូនៅកណ្តាលទីក្រុងបាងកកដែលលក់មិនចេញនៅចុងឆ្នាំ ២០១៨ ស្មើប្រមាណ ៩,៤០០យូនីត ហើយក្នុងនោះរួមមាន ៣០%ជាខុនដូដែលត្រូវបានសាងសង់រួចទៅហើយ ។
តំបន់ Sukhumvit មានខុនដូលក់មិនចេញច្រើនជាងគេដែលស្មើប្រមាណ៦២%នៃខុនដូដែលមានលើទីផ្សារ ឬ១៦,០០យូនីត ។ តំបន់ Pathumwan ជាប់ចំណាត់ថ្នាក់លេខពីរដែលមាន ២ពាន់យូនីតមិនទាន់លក់ចេញក្នុងចំណោមខុនដូសរុប៤ពាន់យូនីត ។ តំបន់ទាំងពីរនេះមានខុនដូលក់មិនចេញច្រើនព្រោះមានការចេញលក់ខុនដូច្រើនលើទីផ្សារកាលពីឆ្នាំមុន ។
អ្នកស្រី Aliwassa បានបន្ថែមទៀតថា «ក្រុមហ៊ុនអចលនទ្រព្យដែលមានខុនដូលក់មិនទាន់ចេញក្នុងតំបន់ដែលមានភាពប្រកួតប្រជែងខ្លាំងដូចជា Sukhumvit ត្រូវលក់ខុនដូដែលមានឲ្យចេញដូចជាលក់បញ្ចុះតម្លៃជាដើម ។ អ្នកដែលមានគម្រោងចេញលក់ខុនដូក្នុងតំបន់ទាំងនោះគួរតែរងចាំសិនបើមិនដូច្នេះទេពួកគេនឹងត្រូវប្រកួតប្រជែងជាមួយនឹងខុនដូដែលលក់មិនចេញទាំងនោះ» ៕
ចែករំលែកព័តមាននេះ