សេពគ្រឿងស្រវឹងហួសប្រមាណមិនត្រឹមតែធ្វើឱ្យលោកអ្នកមិនអាចគ្រប់គ្រងខ្លួនឯងបាននោះទេ ថែមទាំងផ្ដល់នូវគុណវិបត្ដិមួយចំនួនដល់សុខភាព ប៉ះពាល់ទាំងផ្លូវកាយ និងផ្លូវចិត្ដ ជាពិសេសអាចធ្វើឱ្យប៉ះពាល់ដល់ខួរក្បាលបាត់បង់ការចងចាំ វង្វេងវង្វាន់អាចឈានដល់កើតជំងឺវិកលចរិត ។ លើសពីនេះទៀត ការសេពសុរាបង្កបញ្ហាសព្វបែបយ៉ាង ដូចជាគ្រោះថ្នាក់ចរាចរណ៍ ប្រើអំពើហិង្សាក្នុងគ្រួសារ បង្កភាពចលាចលក្នុងស្រុក-ភូមិជាដើម ។
លោកវេជ្ជបណ្ឌិត យឹម សុបុត្រា ឯកទេសវិកលវិទ្យានៃគ្លីនិកសាន់រ៉ាយបានប្រាប់ឱ្យដឹងថា ទស្សនៈរបស់ប្រជាពលរដ្ឋមួយចំនួនយល់ថា សុរាគឺជាភេសជ្ជៈ និងថ្នាំដែលព្យាបាលអាការឈឺចុករោយសាច់ដុំ ឈឺក្បាល ជួយធ្វើឱ្យឈាមរត់បានស្រួល និងព្យាបាលរោគបេះដូង ។ លោកវេជ្ជបណ្ឌិតបន្ដថា តាមពិតសុរាជាសារធាតុពុលទៅវិញទេ បង្កឱ្យមានផលប៉ះពាល់ដល់សុខភាពមិនអាចគេចផុត បើការប្រព្រឹត្ដធ្វើឡើងជារឿយៗ ។ ជាក់ស្ដែង កាលពីមួយឆ្នាំមុន ក្នុងខេត្ដពោធិ៍សាត់ មានជនរងគ្រោះជាច្រើននាក់ដោយសារការសេពសុរាដែលមានសារធាតុពុលនេះ ។ គ្រឿងស្រវឹងបានផ្ដល់ផលប៉ះពាល់ជាច្រើនដូចជា ៖
ប៉ះពាល់ថ្លើមៈ បើសិនជាលោកអ្នកទទួលទានស្រាហួសកម្រិតមានរយៈពេលយូរនឹងប្រឈមមុខជំងឺក្រិនថ្លើម ហើយបើនៅតែប្រព្រឹត្ដបន្ដទៀតនឹងវិវឌ្ឍទៅជាជំងឺទាចទឹក ក្នុងករណីមិនឈប់ អាចឈានទៅរកជំងឺមហារីកថ្លើមស្ថិតក្នុងសភាពធ្ងន់ធ្ងរបំផុត ។
ប៉ះពាល់ដល់ប្រដាប់រំលាយអាហារៈ គ្រឿងស្រវឹងធ្វើឱ្យរលាកបំពង់រំលាយអាហារ ចំណីអាហារនៅក្នុងក្រពះត្រូវចង្អោរ ឬភើឡើងលើវិញទៅជារលាកក្រពះ យូរៗអាចទៅជាជំងឺមហារីកពោះវៀនតូច ដោយសារការរំលាយអាហារមិនបាន ។ ជាធម្មតា អ្នកសេពគ្រឿងស្រវឹងមិនសូវហូបអាហារទេ ជាហេតុនាំឱ្យជាតិស្រាបង្កការរលាកពោះវៀនតូច ពោះវៀនធំ និងបង្កឱ្យងាយបាត់បង់សារជាតិចិញ្ចឹមសរីរាង្គ ។
ប៉ះពាល់ទៅដល់បេះដូងៈ ស្រាធ្វើឱ្យចង្វាក់បេះដូងលោតខុសប្រក្រតី បើទទួលទានខ្លាំងមែនទែនទៅអាចធ្វើឱ្យគាំងបេះដូងស្លាប់ ឬលើសឈាម ឬក៏សាច់ដុំបេះដូងខ្សោយដោយសារការលោតញាប់នៃចង្វាក់បេះដូង ។
ប៉ះពាល់ដល់ខួរក្បាលៈ សុរាធ្វើឱ្យការចងចាំមិនបានល្អដោយសារប៉ះពាល់ដល់តំបន់ចងចាំជាតិពុលនៃស្រាទៅបំពុលកោសិកាខួរក្បាលរហូតដល់ស្លាប់ ។ បើទទួលទានកាន់តែយូរនឹងបង្កបញ្ហាកាន់តែធ្ងន់ធ្ងរ អ្នកជំងឺចាប់ផ្ដើមនិយាយត្រដិត វង្វេងវង្វាន់ ភ្លេចភ្លាំង និងអាចវិវឌ្ឍទៅជាជំងឺវិកលចរិតទៀតផង ។
ប៉ះពាល់ដល់ផ្លូវភេទៈ ពេលសេពគ្រឿងស្រវឹងច្រើននាំឱ្យអសមត្ថភាពនៃការរួមសង្វាសថយចុះ និងបំផ្លាញសុខភាព បំបាត់សេចក្ដីសុខរបស់ខ្លួន គ្មានថ្ងៃវិលត្រឡប់បើមិនលះបង់ ។
ជារួមការទទួលទានគ្រឿងស្រវឹងជោកជាំរាល់ថ្ងៃមិនត្រឹមតែប៉ះពាល់សុខភាពប៉ុណ្ណោះទេ ថែមទាំងបង្កឱ្យមានអំពើហិង្សាក្នុងគ្រួសារ ឃាតកម្ម ការចាប់រំលោភ និងខ្ជះខ្ជាយថវិកាទៀតផង ។ លើសពីនេះជាតិពុលនៃគ្រឿងស្រវឹងធ្វើឱ្យអ្នកប្រព្រឹត្ដបាត់បង់ស្មារតីបង្ហាញកេរ្ដិ៍ភេទប្រាកដឡើងដល់អ្នកដទៃលែងអៀនខ្មាស លែងស្គាល់បាបបុណ្យ គុណទោស អាក្រក់ល្អវិវឌ្ឍទៅជាមនុស្សវិបល្លាស ។ ប៉ុន្ដែបើលោកអ្នកទទួលទានគ្រឿងស្រវឹងក្នុងកម្រិតត្រឹមត្រូវណាមួយដែលមិនប៉ះពាល់ដល់សុខភាព និងសេចក្ដីថ្លៃថ្នូរ ទើបមិនបង្កឱ្យមានបញ្ហាចំពោះខ្លួនឯង និងអ្នកនៅជុំវិញខ្លួន ៕
ចែករំលែកព័តមាននេះ