រាជធានីភ្នំពេញ ៖ អ្នកទេសចរជនជាតិចិនម្នាក់បានត្រូវនគរបាលប៉ុស្តិ៍ភ្នំពេញថ្មីឃាត់ខ្លួន បន្ទាប់ពីមានទំនាស់គ្នាជាមួយស្រីស្នេហ៍ ហើយយកដុំថ្មវាយបំបែកកញ្ចក់រថយន្ត ។ អំពើហិង្សានេះ កើតឡើងកាលពីវេលាម៉ោង៩និង៣០នាទីយប់ថ្ងៃទី១៣ កុម្ភៈ នៅមុខភោជនីយដ្ឋានអង្គរធំ តាមផ្លូវលេខ១០១៩ ភូមិបាយ៉ាប សង្កាត់ភ្នំពេញថ្មី ខណ្ឌសែនសុខ ។
ជនជាតិចិនដែលប្រើហិង្សាហើយត្រូវបានឃាត់ខ្លួននេះ នគរបាលឱ្យដឹងថា ឈ្មោះ Xu Bo ភេទប្រុស អាយុ៣៥ឆ្នាំ ស្នាក់នៅក្នុងរោងចក្រកាណាឌីយ៉ាជាមួយមិត្តភក្តិ តាមផ្លូវវេងស្រេង ក្នុងភូមិត្រពាំងថ្លឹង សង្កាត់ចោមចៅ១ ខណ្ឌពោធិ៍សែនជ័យ ។ ចំណែកម្ចាស់រថយន្ត ដែលជាស្រីស្នេហ៍ជនជាតិខ្មែរ មុខរបរ
លក់ខោអាវ ស្នាក់នៅផ្ទះលេខ៣ ផ្លូវបេតុង ភូមិដីថ្មី សង្កាត់គោកឃ្លាង ខណ្ឌសែនសុខ ហើយរថយន្តដែលវាយបែកកញ្ចក់ចំហៀងខាងស្តាំជារថយន្តកូរ៉េមីនី ពណ៌លឿង ពាក់ផ្លាកលេខ ភ្នំពេញ ២AJ-៤១០០ ។
តាមស្ត្រីម្ចាស់រថយន្តនិយាយថា នាងទើបរាប់អានគ្នាជាមួយបុរសជនជាតិចិនម្នាក់នេះបាន១២ថ្ងៃប៉ុណ្ណោះ ប៉ុន្តែគាត់ដូចជាប្រចណ្ឌច្រើនខឹងច្រើន ។ ការស្គាល់គ្នានេះ គឺតាមរយៈអ្នកបកប្រែភាសាចិនម្នាក់ ហើយអំឡុងពេលសុំស្នេហ៍និងសុំស្រឡាញ់រូបនាង គឺនាងកំពុងស្ថិតក្នុងការពិចារណានៅឡើយទេ ។
នារីរូបនេះបន្តថា មុនពេលកើតហេតុ រូបនាងបានដឹកបុរសជនជាតិចិនរូបនេះពីរោងចក្រកាណាឌីយ៉ានៅផ្លូវវេងស្រេង មកលេងផ្ទះនាងនៅភូមិថ្មី និងបានទិញស្រាមួយដបផឹករហូតបុរសចិននេះស្រវឹង ។ បន្ទាប់មក ពួកនាងទាំង២នាក់ក៏មានទំនាស់ពាក្យសម្តីគ្នា ហើយដោយមានសភាពស្រវឹងផងនោះ នាងក៏បើករថយន្តដឹកបុរសចិននេះទៅរោងចក្រជាកន្លែងស្នាក់នៅវិញ ។
លុះពេលធ្វើដំណើរដល់ចំណុចខាងលើ ស្រាប់បុរសចិននេះយកដៃទាញហ្វ្រាំងរថយន្តឲ្យឈប់ រួចចុះពីរថយន្តយកដុំថ្មគប់កញ្ចក់ចំហៀងខាងស្តាំ បណ្តាលឲ្យបែក ក៏មានការឆោឡោឡើង ។ ភ្លាមនោះ កម្លាំងនគរបាលល្បាតប៉ុស្តិ៍ភ្នំពេញថ្មីឃើញក៏នាំខ្លួនបុរសចិនទៅសាកសួរនៅអធិការដ្ឋាននគរបាលខណ្ឌសែន និងត្រូវបានឃាត់ខ្លួនដើម្បីអនុវត្តតាមនីតិវិធី ៕
ចែករំលែកព័តមាននេះ