ខេត្តស្វាយរៀង ៖ មានការភ្ញាក់ផ្អើលពេញបណ្ដាញសង្គមបង្ហោះហ្វេសប៊ុក ដែលក្មេងស្រីម្នាក់ត្រូវសត្វឆ្មាខាំ និងក្រញៅអស់រយៈពេលជាង២ខែមកនេះ បានស្លាប់បាត់បង់ជីវិតហើយ ដោយបន្សល់ទុកសំឡេងទ្រហោយំពីឪពុកម្តាយ និងសាច់ញាតិសោកស្តាយរូបកាយក្មេងស្រីរងគ្រោះមិនគួរណាឡើយស្លាប់ទាំងវ័យក្មេងបែបនេះសោះ។
ពាក់ព័ន្ធនឹងករណីខាងលើនេះ លោកហួត សាម៉ៃ ចៅសង្កាត់ច្រកម្ទេសបានឲ្យដឹងថា ពិតជាមានក្មេងស្រីស្លាប់ដោយសារសត្វឆ្មាខាំ ក្រញៅពិតប្រាកដមែន នៅក្នុងភូមិធ្លក សង្កាត់ច្រកម្ទេស ខណៈក្មេងស្រីរងគ្រោះត្រូវបានបូជាកាលពីថ្ងៃទី១៣ ខែកុម្ភៈ ឆ្នាំ២០១៩ នៅស្រុកកំណើត។
លោកបន្តថា ក្មេងស្រីដែលស្លាប់មានឈ្មោះ ទាវ វត្តី អាយុ១១ឆ្នាំ មានឪពុកឈ្មោះទាវ បូរ៉ា អាយុ៣៣ឆ្នាំ មុខរបរកសិករ និងប្រពន្ធឈ្មោះ គឹម ពិសី អាយុ៣៣ឆ្នាំ មានទីលំនៅស្ថិតក្នុងភូមិធ្លក សង្កាត់ច្រកម្ទេស ក្រុងបាវិត។
បើតាមម្តាយក្មេងស្រីរងគ្រោះបានប្រាប់ឲ្យដឹងថា កូនស្រីរបស់គាត់ជំងឺធ្វើទុក្ខខ្លាំងនិយាយលែងដឹងខុសត្រូវ និងប្រកាច់សន្លប់ញឹកញាប់ ហើយបាននាំមកព្យាបាលជំងឺឆ្កែឆ្កួតនៅមន្ទីរពេទ្យប្រទេសវៀតណាម ប៉ុន្តែពេទ្យវៀតណាមមិនទទួល ទើបនាំយកមកមន្ទីរពេទ្យរាជធានីភ្នំពេញ ប៉ុន្តែគួរឲ្យសោកស្តាយគ្រូពេទ្យប្រាប់ថា គ្មានវិធីព្យាបាលទេ គឺមានតែយកទៅផ្ទះដើម្បីធ្វើបុណ្យតាប្រពៃណីតែប៉ុណ្ណោះ។
ម្តាយក្មេងស្រីរងគ្រោះបន្តថា ក្រោយពេលនាំកូនមកដល់ផ្ទះ នៅពេលយប់ឡើងកូនរបស់គាត់ក៏ប្រកាច់សន្លប់ ហើយបាត់បង់ជីវិតនៅយប់ថ្ងៃទី១២ កុម្ភៈ វេលាម៉ោង១រំលងអធ្រាត្រឈានចូលថ្ងៃទី១៣ ចោលឪពុក-ម្តាយ ធ្វើឲ្យរូបគាត់មិនអស់ចិត្តសោះ មិនគួរណាស្លាប់ទាំងវ័យក្មេងបែបនេះ។ កូនស្រីរបស់គាត់ត្រូវឆ្មាខាំតាំងពីដើមខែធ្នូ ឆ្នាំ២០១៨មកម្ល៉េះ ប៉ុន្តែពួកគាត់មិនបានយកមកចាក់ថ្នាំការពារនៅមន្ទីរពេទ្យទេ គឺយកទៅចាក់ថ្នាំការពារនៅក្នុងភូមិ ហើយគ្រូពេទ្យភូមិប្រាប់ថា មិនអីទេ ទើបមិនបានស្វះស្វែងយកទៅព្យាបាល។
ម្តាយក្មេងស្រីរងគ្រោះបន្តទៀតថា លុះជាង២ខែក្រោយមក ទើបមានអការជំងឺកើតឡើងហើយវិវដ្ដកាន់តែខ្លាំងជារៀងរាល់ថ្ងៃក៏យកកូនស្រីទៅវៀតណាម ប៉ុន្តែគ្រូពេទ្យវៀតណាមក៏ប្រាប់ថា គ្មានលទ្ធភាពសង្គ្រោះទេ ទើបយកត្រឡប់មកព្យាបាលនៅពេទ្យក្នុងរាជធានីភ្នំពេញ គឺយកទៅមន្ទីរពិសោធប៉ាស្ទ័រ ដើម្បីពិនិត្យឈាម តែជាការសោកស្តាយគ្រូពេទ្យប្រាប់ថា មិនអាចជួយសង្គ្រោះជីវិតបានទេ មេរោគនោះវិវដ្ដធ្ងន់ធ្ងរហើយឲ្យយកទៅផ្ទះធ្វើបុណ្យទៅ ធ្វើឲ្យស្ត្រីជាម្តាយនិងជីដូនស្លុតចិត្តយំអាណិតកូនស្រី និងចៅដែលនៅនិយាយចច្រិច ហើយពេទ្យប្រាប់ថា គ្មានលទ្ធភាពជួយសង្គ្រោះបាន។
ជុំវិញករណីក្មេងស្រីរងគ្រោះដែលត្រូវឆ្មាខាំខាងលើ មន្ត្រីសុខាភិបាលខេត្តស្វាយរៀងបានអំពាវនាវដល់ឪពុក-ម្តាយ និងអាណាព្យាបាលគ្រប់រូបត្រូវប្រុងប្រយ័ត្នទាំងអស់គ្នាចំពោះកូនៗ ព្រោះក្មេងស្រីម្នាក់អាយុ១១ឆ្នាំ ត្រូវឆ្មាខាំ និងក្រញៅបានឆ្លងជំងឺឆ្កែឆ្កួតនិយាយមិនសូវដឹងអ្វី ហើយមានអការប្រកាច់ៗ បណ្តាលឲ្យបាត់បង់ជីវិតទៅហើយនៅយប់ថ្ងៃទី១២ ឈានចូលថ្ងៃទី១៣ កុម្ភៈ២០១៩កន្លងទៅនេះ។
បើមានករណីត្រូវឆ្កែ ឬឆ្មាខាំសូមប្រញាប់នាំជនរងគ្រោះមកកាន់មន្ទីរពេទ្យឲ្យបានឆាប់ ដើម្បីក្រុមគ្រូពេទ្យជួយសង្គ្រោះចាក់ថ្នាំការពារជំងឺឆ្កែឆ្កួតទាន់ពេលវេលា កុំទុករហូតធ្ងន់ធ្ងរដូចករណីក្មេងស្រី ព្រោះជំងឺនេះមានផ្ទុកមេរោគយ៉ាងកាចសាហាវណាស់៕
ចែករំលែកព័តមាននេះ