ខេត្តស្វាយរៀង ៖ មានការភ្ញាក់ផ្អើលមួយកើតឡើង ខណៈពលរដ្ឋក្នុងភូមិបាននាំគ្នាដើរអូសត្រីក្នុងប្រឡាយទឹកដោយនឹកស្មានថាជាប់ត្រីធំខំអរ បែរជាជាប់សពបុរសម្នាក់ទៅវិញ។ ហេតុការណ៍នេះបានកើតឡើងកាលពីវេលាម៉ោង១និង១៥នាទីរសៀលថ្ងៃទី១៣ ខែកុម្ភៈ ឆ្នាំ២០១៩ ស្ថិតនៅភូមិចំបក់ ឃុំតាសួស ស្រុកស្វាយជ្រំ ។
បើតាមសមត្ថកិច្ចនគបាលប៉ុស្តិ៍រដ្ឋបាលឃុំបានឱ្យដឹងថា ក្រោយទទួលបានព័ត៌មានពីពលរដ្ឋឈ្មោះសោម សារី ភេទប្រុស អាយុ៣៥ឆ្នាំ រស់នៅភូមិចំបក់កោង ឃុំតាសួស ស្រុកស្វាយជ្រំរាយការណ៍មកថា ខ្លួនទៅអូសអញ្ចងក្នុងទឹកប្រឡាយនៅភូមិឃុំកើតហេតុខាងលើ ស្រាប់តែមានរបស់ធ្ងន់ជាប់នឹងអញ្ចងក៏នាំគ្នាខំទាញអូសឡើងមកលើគោក ដោយនឹកស្មានថា ជាប់ត្រីធំ លុះពេលអូសអញ្ចងលើកចេញពីទឹក បែរជាឃើញសពបុរសម្នាក់ទៅវិញ ក៏ស្រែកឆោឡោផ្អើលដល់អ្នកភូមិ និងរាយការណ៍មកសមត្ថកិច្ចដើម្បីឱ្យចុះមកពិនិត្យតែម្តង។
ប្រភពដដែលបានបន្តទៀតថា បន្ទាប់ពីទទួលព័ត៌មានខាងលើភ្លាម កម្លាំងសមត្ថកិច្ចបានចុះទៅដល់កន្លែងកើតហេតុធ្វើការស្រាវជ្រាវទើបស្គាល់អត្តសញ្ញាណជនរងគ្រោះឈ្មោះឈួនប្រុស ភេទប្រុស អាយុ៣១ឆ្នាំ មានទីលំនៅភូមិនារាទេន ឃុំឈើទាល ស្រុកស្វាយជ្រំ។
ក្រោយពីពិនិត្យសពរួច រកឃើញថា ជនរងគ្រោះកើតខ្យល់គរបណ្តាលឱ្យដួលធ្លាក់ទឹកលង់ស្លាប់ ពុំមែនជាអំពើឃាតកម្មនោះទេ ហើយឪពុកម្តាយរបស់ជនរងគ្រោះក៏បានមកធ្វើលិខិតធានាអះអាងថា កូនរបស់ពួកគាត់មានជំងឺវិកលចរិក ដើរបាត់ពីផ្ទះគ្មានគោលដៅនោះទេ ហើយក៏មិនដែលចូលផ្ទះអស់រយៈពេលជាច្រើនថ្ងៃមកហើយ ស្រាប់តែមានគេមកប្រាប់ថា កូនរបស់ពួកគាត់ធ្លាក់ទឹកប្រឡាយ បណ្តាលឱ្យលង់ស្លាប់បាត់ទៅហើយ ទើបពួកគាត់មកទទួលយកសពទៅធ្វើបុណ្យតាមប្រពៃណី៕
ចែករំលែកព័តមាននេះ