រាជធានីភ្នំពេញ ៖ រឿងរ៉ាវដែលបុរសចំណាស់ម្នាក់អះអាងថា ជាមន្ត្រីនគរបាលខណ្ឌទួលគោកចូលនិវត្តន៍ធ្វើដំណើរទៅកាន់សាលាសង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ ។
ដើម្បីដាក់ពាក្យប្ដឹងចោទប្រកាន់ថា កូនស្រីទី៣ របស់គាត់ម្នាក់ជំពាក់លុយគាត់ជាង៥ម៉ឺនដុល្លារមិនព្រមសង ហើយថែមទាំងជេរប្រមាថ និងគំរាមហៅនគរបាលវាយខ្នោះគាត់ថែមទៀតនោះ បានធ្វើឲ្យមានការចាប់អារម្មណ៍យ៉ាងខ្លាំងពីមជ្ឈដ្ឋាននានាដែលខ្លះបានវាយប្រហារខ្លាំងៗទៅលើកូនៗរបស់គាត់ ។ ហើយបន្ទាប់ពីមានហេតុការណ៍បែបនេះកើតឡើងកូនៗរបស់គាត់បាននាំគ្នាទៅកាន់សាលាសង្កាត់ចោមចៅ៣ កាលពីថ្ងៃទី១៣ ខែកុម្ភៈ ឆ្នាំ២០១៩ ធ្វើការបំភ្លឺជូនអាជ្ញាធរសង្កាត់ថា រឿងរ៉ាវខាងលើមិនមែនជាការពិតនោះឡើយ តាមពិតបុរសជាឪពុករបស់ពួកគាត់ម្នាក់នេះចាស់ជរា និងមានជម្ងឺ ហើយវង្វេងទេ ចំណែកការរៀបរាប់របស់គាត់ខាងលើមិនមែនជាការពិតឡើយ ។
កន្លងមកពួកគាត់ដែលជាកូនៗមិនឲ្យឪពុកចេញដើរទៅណាមកណាម្នាក់ឯងទេ ព្រោះលោកឪពុកវង្វេង ហើយពួកគាត់ជាកូនៗតែងចំណាយលុយម្នាក់បន្តិចៗជូនគាត់ជារៀងរាល់ខែ ក្នុង១ខែៗ៥០០ដុល្លារសម្រាប់ឪពុកចាយវាយ និងបាននាំគាត់ព្យាបាលជម្ងឺជាបន្តបន្ទាប់មិនមែនមិនដែលគិតគូឡើយ ។ បុរសចំណាស់ខាងលើមានឈ្មោះ ហ៊ុយ ប៉ាង អាយុ៧៥ឆ្នាំ ហើយគាត់បានអះអាងថា ជាអតីតជាមន្ត្រីនគរបាលខណ្ឌទួលគោក តែចូលនិវត្តន៍និង មានទីលំនៅបច្ចុប្បន្នក្នុងភូមិទួលថ្ងាន់ សង្កាត់ទួលសង្កែ១ ខណ្ឌឫស្សីកែវ រាជធានីភ្នំពេញ ។
បើតាមលោកវ៉ា សាវឿន ចៅសង្កាត់ចោមចៅ៣ បានប្រាប់ឲ្យដឹងថា ក្រោយពីបុរសចំណាស់ខាងលើរត់រកអន្តរាគមន៍ពីអាជ្ញាធរសង្កាត់ដោយចោទប្រកាន់កូនស្រីជំពាក់លុយអត់សង និងគម្រាមចាប់ ហើយជេរប្រមាថគាត់ទៀតនោះបានបង្កឲ្យមានការភ្ញាក់រហូតមានសារព័ត៌មានចុះផ្សាយផងដែរ ។ ប៉ុន្តែ១ថ្ងៃក្រោយមកកូនៗរបស់គាត់ក៏បាននាំគ្នាទៅកាន់សាលាសង្កាត់ចោមចៅ៣ ធ្វើការបំភ្លឺផងដែរ ហើយយោងតាមការអះអាងរបស់កូនៗទើបដឹងថា អ្វីដែលបុរសខាងលើរៀបរាប់នោះ គឺមិនមែនជាការពិតឡើយ ។ លោកចៅសង្កាត់បានបន្តថា តាមពិតបុរសខាងលើជាមនុស្សចាស់ហើយ មានជម្ងឺ និងវង្វេងដែលកន្លងមកកូនចៅមិនដែលឲ្យដើរចេញក្រៅម្នាក់ឯងនោះទេ ព្រោះខ្លាចគាត់វង្វេងបាត់មានគ្រោះថ្នាក់ ។
ជាងនេះទៀតអ្វីដែលគាត់ចោទថា កូនស្រីជំពាក់លុយជាង៥ម៉ឺនដុល្លារអត់សងហើយជេរប្រមាថ និងប្រុងហៅនគរបាលចាប់គាត់ទៀតនោះពុំពិតឡើយ ។ ព្រោះគ្មានកូនណាម្នាក់ជំពាក់លុយគាត់ទេ ហើយក៏មិនដែលមានកូនណាម្នាក់ជេរប្រមាថគាត់ដែរ ផ្ទុយទៅវិញកូនចៅទាំងអស់គោរពគាត់ខ្លាំងណាស់ ។ មិនតែប៉ុណ្ណោះក្នុង១ខែៗកូនចៅបានរៃលុយគ្នាម្នាក់បន្តិចៗចំនួន៥០០ដុល្លារសម្រាប់ជូនដល់គាត់ចាយវាយ និងបាននាំគាត់ព្យាបាលជម្ងឺជាបន្តបន្ទាប់ ។
ដោយឡែកនៅថ្ងៃទី១៣ ខែកុម្ភៈ កូនចៅបានរៃលុយគ្នាបានចំនួន៤០០ដុល្លារ ជូនគាត់នៅនឹងមុខលោកដោយផ្ទាល់ផងដែរ ។ ប្រភពដដែលបានបន្តទៀតថា កាលពីមុនគាត់បានរស់នៅឯសហរដ្ឋអាមេរិកជុំប្រពន្ធគាត់ ប៉ុន្តែក្រោយមកគាត់បានមករស់នៅក្នុងប្រទេសកំណើតវិញបែកពីប្រពន្ធ ហើយនៅស្រុកខ្មែរក្រោមការមើលថែយ៉ាងយកចិត្តទុកដាក់ពីសំណាក់កូនៗ ។ ហើយដោយសារតែគាត់វង្វេងបែបនេះបើទោះជាគាត់និយាយលើសលោះយ៉ាងណាក៏កូនចៅមិនដែលប្រកាន់ខឹងគាត់ដែរ ព្រោះគាត់ជាឪពុកជាអ្នកមានគុណធំធេងដែលបង្កើតកូនមកហើយរកស៊ីចិញ្ចឹមរហូតទុកដាក់ឲ្យកូនមានគូស្រករ ព្រមទាំងទិញផ្ទះឲ្យនៅគ្រប់ៗគ្នាថែមទៀតផង ។
លោកចៅសង្កាត់ខាងលើបានបន្តថា នៅពេលបានស្ដាប់ការរៀបរាប់របស់កូនៗរបស់គាត់ទើបហួសចិត្តនូវអ្វីដែលគាត់ចោទប្រកាន់កូន ហើយនៅក្នុងពេលនោះលោកក៏មិនដឹងថា ត្រូវធ្វើកំណត់ហេតុបែបណាដែរ ។ ចំណែកបុរសចំណាស់ខាងលើកាលបើកូនចៅនិយាយបែបនេះគាត់ក៏គ្មានអ្វីតបតដែរ លុះក្រោយមកគាត់បានសុំកូនៗទៅបួសជាព្រសង្ឃតែម្ដង និងឈប់គិតពីអ្វីទៀតហើយ ។ ចំណែកកូនៗបន្ទាប់ពីបានឮលោកឪពុកសុំទៅសាងផ្នួសបែបនេះម្នាក់ៗសប្បាយចិត្ត និងបានឯកភាពតាម ហើយកំពុងរកថ្ងៃ ដើម្បីបំបួសលោកឪពុករបស់ខ្លួនហើយ៕
ចែករំលែកព័តមាននេះ